Oplan Red Plate 2

Usa sa mga sakyanan nga among nadakpan sa ikaduhang hugna sa Oplan Red Plate niadtong Oktubre 26, nga nasudnong holiday tungod sa Eid’l Adha, iya ni Cebu City Councilor Alvin Dizon. May logo ug marka nga “For Official Use Only” ang sakyanan ug may lehitimong lakaw ang batan-ong konsehal, apan ipatawag siya sa Visayas Ombudsman tungod sa duha ka kalapasan:

• Una, di kumpleto ang iyang trip ticket, way mga oras nga gitakda sa pag-abot sa wa mahingpit nga mga destinasyon ug wa ilista ang mga pasahero; ug

• Ikaduha, kauban ni Dizon sa sakyanan ang iyang asawa, nga ubos sa mga lagda di maisip nga authorized personnel.

***

Sa akong pakighinabi niya atol sa bag-ong programang Tubag! sa ABS-CBN Cebu ug DYAB 1512 khz, gihangop ni Dizon ang kampanya ug niangkon nga nataligam-an nila paghingpit ang trip ticket. Apan ni-text siya nako pagpasabot nga di personal ang katuyoan sa biyahe nga among naatlan sa Ayala Center kay:

• Nitambong siya sa tigom sa urban poor nga giduma sa bag-ong natudlo nga DILG Undersecretary, si Bimbo Fernandez, nga na-cover nilang Reno Tallada sa TV Patrol Central Visayas ug ubang mga sakop sa media; ug

• Nisakay ang iyang asawa nga si Maria Teresa kay nangaplay og trabaho sa DILG.

***

Duha ka sakyanan ang among nasakpan sa parking lot sa SM City Cebu:

• Ang SUV sa Casino Filipino nga way logo ni markang “For Official Use Only” ug gisakyan ni Pagcor Cebu Manager Roque Cervantes nga way trip ticket ug giingon sa iyang drayber nga nagpalit og tambal sa mall; ug

• Ang sakyanan ni Regional Director Maria Luisa Hadjula sa Bureau of Fire Protection sa Central Visayas nga way logo ni marka nga “For Official Use Only”, labaw pang way trip ticket ug ang drayber wa kahibawo nganong sa mall nag-holiday ang harang gangis sa mga bombero.

Si Graft Investigator Elmer Gutierrez ang mohimo sa pasiunang pakisusi angay ba silang kasohan.

***

Nasakpan sab namo ang pribadong mga sakyanan nga nagda og commemmorative plates nga way pagtugot gikan sa Department of Transportation and Communication (DOTC), ang “NBI” ug “LTO”. May naggamit sa plakang “PNP 111” nga gitugotan sa DOTC apan nakalapas sa lagda nga mahimo lang nga ibutang sa taas, sa ubos o sa kilid apan di mahimong isapaw sa orihinal nga license plate.

Laing pribadong sakyanan ang among naabtan sa ibabaw nga parking area sa SM City Cebu nga naggamit og vanity plate. Ang plakang “LYNLYN” sa Philippine Military Academy gisapaw sa orihinal nga license plate. I-alarma silang tanan sa Land Transportation Office atol sa pag-renew sa rehistrasyon sa mga sakyanan.

***

Email:  [email protected]