Papating sa Comelec

 Bisan sa pasidaan ni Comelec Chairman Sixto Brillantes Jr., mga magpapili sa eleksiyon sunod tuig wa gyud papugong sa pagkabayo sa Kalagkalag aron pagpangampanya sud sa labing dagkong mga minteryo dinhi sa Sugbo ug ubang bahin sa nasud.

 Madutlan ba sa awhag ni Brillantes sa mga botante nga isalikway ang mga politiko nga namolitika sa mga dapit sa paghinumdom ug pagpangaliya alang sa mga minatay? Unya pa ni sa Mayo 13 mahibaw-an. Sa kadaling makalimot sa mga botante ug sa kadaghan sa motumaw pang mga kontrobersiya sa mosunod nga mga buwan, mahimong di kasilotan ang mga buhi nga nanggamit sa mga Santos ug mga kalag.

***

 Nga klarong mao say gipanghinaot ni Atty. Marchel Sarno, election officer sa Cebu City North District. Kinsa way kukaluoy nga nipapahawa sa mga magparehistro unta apan nauwahi sa taas kaayong linya sa mga botante. Apan wa say kukauwaw nga nilubag sa mga lagda aron mas unang marehistro ang pipila ka artista nga di lang mas uwahi kon dili wa pa gyud magtagad sa paglinya.

 Niangkon si Sarno nga iyang gipalusot ang mga artista kay gitawgan siya sa niaging semana ni kanhi bise gobernador Enrique Rama. May sukaranan ang kabalaka nga kon may manawag ni Sarno nga mas gamhanang politiko nga mangayo og mas dakong pabor, nga posibleng makaapektar sa sangpotanan sa piniliay, mahimong iya sang palutson.

***

 Dihang namantala ang hulagway sa paniudto nilang Sarno ug sa negosyanteng si Rex Wakee Salud, gusto kong motuo nga inosente ang ilang panag-abot. Ug kay wa may labot si Sarno sa pagduma sa piniliay sa Cordova, di angayng mahulga ang kampo ni Mayor Adelino Sitoy nga mahimong bukubukuhon siya sa Comelec sa umaabot nga piniliay.

 Human ko nakabati sa papating ni Sarno, nga inay mangayo og pasaylo sa iyang paglapas sa ilang kaugalingong lagda sa rehistrasyon niinsistir na hinuon nga sakto ang iyang panglaktod kay mas dakong kaguliyang ang mamugna kon gipalinya pa niya ang mga artista, nahadlok na ko parang Sitoy.

***

 Mangahas ko paghagit ni Comelec 7 Director Temmie Lambino pagsusi sa mga pasangil batok sa iyang mga sakop. Nibahad siya og lahugay human na-letratohan si Cebu Provincial Election Supervisor Lionel Marco Castillano nga nakighagwa sa taga One Cebu, apan way nahitabo. Nikumpisal na si Talisay City Election Officer Corazon Moran nga nakalapas sa sugo ni Comelec Chairman Brillantes nga di negusyohon ang lamination sa voters IDs, apan way ek si Lambino.

 Ma-mirisi hinuong tibuok Comelec kon, atubangan sa arogante nilang panulisok sa mga botante nga nauwahi pagpalista, ipatigbabaw sa Korte Suprema ang petisyon paglugway sa rehistrasyon hangtod sa Enero. Hinaot nga, kon mahitabo, way dugang artista nga manawag aron mosal-ot na sab.

***

 Email: [email protected]