Basin bayad la’y giapas

Risgo g’yud kaayo alang sa mga pasahero kon mopugos sila pagsakay sa mga sakyanan bisan puno ug nagsugwak na kaayo sa mga tawo.

Kon ang drayber sa sakyanan magdanghag lang, sigurado nga mabalintuwad g’yud ni anha sa mga lugsongon ug likoon nga bahin. Una, tungod sa kabug-at sa karga mahimong ma “out-balance” ang sakyanan, mahimong dili na mapugngan sa brake ang sakyanan.

Ang ubang drayber dili mobutang sa “low gear” sa kambyada sa sakyanan kon sila maglugsong ug magsalig lang sa brake aron pugngan ang sakyanan. Kon maglisud pagpugong ang brake, tamakan g’yud ni nila og maayo, mao nga ang resulta, buto ang brake.

Dunay mga drayber nga bisan og likoon nga bahin, hala pabulhot lang gihapon mao nga dili na mabalanse ug usahay… matumba ang sakyanan. Unsaon, kining ubang drayber mga badlongon man.

Dili man gani motuman sa lagda nga sila mosul-ob gayud sa puti nga uniporme (polo o kaha T-shirt nga may kwelyo) kon mag-drive. Tan-aw nako, ang mga operator angayan usab nga mabasol kay gipili man nila ang badlongong drayber.

* * *

Nagpabilin nga wala matandog, wala mapalawmi ang ubay-ubay’ng bahin sa atong kasapaan sama sa Parian Creek. Gikuyawan g’yud ko nga basin og ang mga kontraktor niining maong dredging project mokolekta na og bayad sa City Hall.

Awhagon nako si Mayor Michael Rama nga ipasusi niya kini sa mga kawani sa Department of Engineering and Public Works (DEPW) aron matarong kini sa pagtrabaho. Unsaon, walay klaro ang monitoring sa DEPW sa mga project.

Diha lang lagi mismo sa V. Gullas Street duol diri sa The Freeman, giayo kunohay ang drainage system apan gibiyaan nga wala gani makompleto ang mga tabon. Unsa, wala makahunahuna ang tagdumala sa Ana Construction nga peligro ang ilang gihimo?

Kon dunay kusog nga uwan kining maong karsada pirmi nga malunopan sa tubig og ang mga tawo maglakaw na lang, dili ba posible nga mahulog niining maong mga lawom nga lungag nga nagpabiling walay mga tabon?

Hain na gud tawon ang inyong mga utok! Unya nganong wala man kini makit-i sa mga sakop sa DEPW nga gi-assign sa pagmonitor niining maong mga project? Maayo lang kaayo kamo mokobra sa inyong sweldo unya wala magtarong sa trabaho?

Palihog, City Engineer Kenneth Enriquez, palihoka kanang imong mga sakop nga gitahasan nimo sa pag-monitor sa mga project. Ang maayo tingali ikaw mismo ang motan-aw sa project aron duna kay “personal knowledge.”

Kabahin sa mga sapa nga wala gihapon mapalawmi, anha pagpahimutang sa taytayan sa P. Burgos duol sa kinatumyan sa Colon Street, tan-awa dili ba pakita nimo kon ngano nga ang tubig kon dunay uban makapalunop sa downtown area.

Balikon nako, gikuyawan ko nga ang ang ubang mga kontraktor nga gikuha sa dakbayan aron mopalawom sa atong kasapaan mokobra na lang sa bayad apan walay gihimo sa pagsulbad sa problema.

Tungod sa kuwang og pagpakabana sa mga opisyal sa City Hall nagsugod na ko pagduda nga nakadawat mo’g bahin sa ganansya sa mga kontraktor. Maayo man lang mo nga mga opisyal sa City Hall, labi na mga department head, kay magsakay ra man mo sa bag-ong sakyanan nga dili maabut sa tubig kon dunay baha.

Ako kon mokusug ang uwan dili na makaadto sa opisina sa The Freeman kay ang tubig sa among palibot taga tuod ang giladmon.

Alang ni Mayor Rama, kon imong mawagtang ang lunop sa Colon pinaagi sa pagpalawom sa sapa, sigurado ko nga minindot ang dagan sa imong kandidatura. Ayaw na gamita ang rason nga kay gilaslasan ang budget karong tuiga mao nga wala masulbad ang problema, dili ra kana maoy rason.

Ang rason mao nga daghan sa mga opisyal ug kawani sa City Hall mga ligoy! Siyaro ug wala ka makabantay ani mayor? Kon dili ka mangisog dili sila molihok.