Motoo ba mo?

Angay’ng dayonon gayud ni T. Padilla Barangay Captain Michael Ralota ang pagkiha niadtong babaye nga mipasangil nga siya gidala ni Ralota sa hotel aron ipakumbinsir sa iyang amigo nga palansaron pagka konsehal sa dakbayan sa Sugbo.

Kana kon dili tinuod ang pasangil nga gidala ni Ralota si Marieta De Los Santos didto sa Harolds Hotel sa Gorordo Avenue niadtong Oktobre 2 ug gipaatubang kini sa usa ka amigo sa barangay kapitan.

Matud ni Marieta nga giingnan siya sa tawo nga gihulagway niya nga usa ka “bungi” nga bayaran siya og P200,000 bugti sa pag-file og certificate of candidacy pagka konsehal sa dakbayan.

Samtang giangkon ni Ralota nga gipatawag niya si De Los Santos, kinsa lumolupyo sa Barangay T. Padilla, apan didto ra sa barangay hall ug gitanyagan nga himoon niya kini nga lider sa Women’s Group sa ilang barangay.

Kinsa kaha g’yud ang namakak, si Ralota o kadtong babaye nga nagpaila nga si Marieta De los Santos?

* * *

Buyno, ang gibutyag ni Marieta katoohan nga mahitabo apan dunay mga punto nga angay’ng hinuktokan pag-ayo.

Una, sa gidak-on sa kantidad nga iyang gitug-an nga maoy ibayad kaniya mora’g maglisud ko sa pagtoo. Tiaw mo ba nga P200,000 bugti lang sa pagpasaka og certificate of candidacy?

Kon tinuod man nga buot lawgawon sa Bando Osmeña Pundok-Kauswagan (BOPK) ang kandidatura ni Lahug Barangay Konsehal Mary Ann De Los Santos pinaagi sa pagpadagan og tawo nga pareho niya og apelyedo, nangita tingali sila og tawo nga katoohan ‘sab.

Dili man pagpakaubos ni Marieta apan sa iyang dagway dili ka makatoo nga molansar kini pagka konsehal sa dakbayan. Unya, dako kaayo ang kantidad nga itanyag kaniya?

Kon miingon pa si Marieta nga P20,000 ang gitanyag kaniya bugti sa paglansar isip konsehal sa dakbayan, mora’g motoo pa tingali ko’g gamay.

Pananglit ang BOPK gusto gayud nga mopadagan og kandidato nga susama og bansagon ni Mary Ann, tingali mangita na lang usab sila og tawo nga ang dagway katoohan gayud nga molansar kay dako ang kantidad nga gitanyag, kon tinuod man.

Ang akong baruganan nga kinahanglan nga si Ralota, kinsa naglingkod nga sakop sa Cebu City Council kay siya mana ng presidente sa Association of Barangay Councils (ABC) modayon gayud sa iyang plano pagkiha ni Marieta.

Pinaagi niini, kon tinuod man nga si Marieta gisugo lang sa mga kontra ni Ralota, tingali molutaw kini sa hinay-hinay.

* * *

Si Marieta didto ma-interview sa mga reporters sa balay ni Mayor Michael Rama. Dihang gipangutana namo nganong nahiabot siya didto, mitug-an siya nga ang nagdala kaniya didto mao ang usa ka “Ian Hasamal.”

Kinsa ma kini si Ian Hasamal? Basi sa akong nahibaw-an, kini si Hasamal konsehal kini sa Barangay T. Padilla nga alalay ni Mayor Rama.

Gani dihang ang City Hall nanghatag og bag-o nga sakyanan alang sa barangay, si Hasamal maoy gitugyanan sa mayor sa bag-o nga sakyanan.

Kini maoy nakapaduda kanako nga dunay politika nga naglambigit niining maong isyu. Duna usa’y posibilidad nga tinuod nga si Ralota mohimo og lakang nga makalawgaw sa pagpapili ni Mary Ann sa pagka konsehal.

Basi sa survey, si Ralota anaa sa kinaubsan ug si Mary Ann maoy kusug-kusug sa mga kandidato sa Team Rama nga posible nga iyang ikasangka sa pwesto. Apan ang butang lang nga dili makapakumbinsir nako mao ang kantidad nga P200,000.

* * *

Ang laing gimik nga mahitabo sa umaabot nga mga adlaw mao nga posible nga dunay kandidato nga pasibogon sa iyang kandidatura ug hulipan kini og may lig-on nga kandidato.

Duna ko’y mga higala nga anaa sa masi’g ka kampo sa Team Rama ug BOPK nga mitug-an nako kinsa ang kusug sa ilang mga kandidato.

Dili lang hinoon nako kini ibutyag kay basin og kadtong mahibawo nga hinay sila, mohilak unya. Dunay usa ka kandidato nga abi nako og kusug kay sikat, apan tua ra man sa iwit.

Sige lang, ayaw pagpakawala sa paglaum Capt.