Natuman bang Citizen's Charter?

Sa pagsaulog sa ika-112 nga anibersaryo sa Philippine Civil Service sa tibuok Septiyembre karong tuiga, angayng pasidunggan ang mga kawani sa gobyerno nga nagtinarong sa ilang trabaho ug pahinumdoman ang mga ligoy nga, kon tinud-on ang SONA ni Presidente Noynoy Aquino nga mga kugihan na lay makadawat og dugang benepisyo, mahimong mapupos nang malipayon nilang mga adlaw. Nalipay kong nahibawo gikan ni Atty. Ariel Bacatan, legal officer sa Civil Service Commission sa Central Visayas, nga ang Sugbuanon nga kataposang nakadawat sa labing taas nga pasidungog mao ang janitor sa usa ka public school sa Dakbayan sa Lapulapu.

Labing unang politiko nga nakadawat sa nasudnong pasidungog mao si anhing DILG Secretary Jesse Robredo, dihang mayor pa siya sa Naga City, sa Camarines Sur. Ang bugtong politiko sa Central Visayas nga nakadawat sa samang pasidungog mao si Gobernador Edgar Chatto sa Bohol.

***

Nibukas sa tibuok buwan nga kasaulogan ang “Service Fair” sa pipila ka buhatan sa gobyerno nga nisanong sa pagdapit sa CSC 7. Hinaot nga ang tibuok adlaw nga kalihokan sa ParkMall sa Dakbayan sa Mandaue masustinihan ug mas mapalapdan pa aron pagpaduol sa gobyerno sa katawhan. Mas dakong “caravan” sa mga serbisyo sa gobyerno ang gikatakdang ilusad sa Visayas Ombudsman sa di pa matapos karong tuiga.

Ang “one-stop shop” sa pipila ka serbisyo sa gobyerno kabahin na sa “Grand Halad sa Kapamilya,” ang labing dakong piyesta sa libreng mga pangalagad sa ABS-CBN Cebu matag Hunyo ug Nobyembre matag tuig. Hinaot nga ang pagpasiugda sa CSC o sa Ombudsman makatanyag og mas daghang pangalagad.

***

Sa kasarangang mga adlaw, kinahanglan hinuon tang motultol sa mga buhatan aron paghipos sa tanang panginahanglan sa mga transaksiyon. Nga maoy tinubdan sa way kinutobang bagulbol. Ang taas nga mga linya sa National Statistics Office (NSO), Social Security System (SSS), Government Service Insurance System (GSIS), Philippine Regulation Commission (PRC) ug Department of Foreign Affairs (DFA) maoy di malalis nga mga ebidensiya sa kalbaryo sa mga magbubuhis.

Ambot nganong wa pa gyud masulbad ning problema nga nakahasol sa katawhan sud na sa daghang katuigan. Nagkadaghan ba lang ang mga kliyente? O nangiyugpos lang ang mga tagduma sa paghimong mas sayon sa ilang mga pangalagad?

***

Kapaninglan hinuon sa mga magbubuhis ang mga buhatan sa gobyerno paghatag sa minimum nga pangalagad nga gitakda sa balaod. Ang Anti-Red Tape Act of 2007 nimando sa matag buhatan pag-umol ug pagmantala og “Citizen’s Charter” nga maglakip sa:

• Lista sa tanang pangalagad;

• Ngan sa opisyal o kawani nga gitahasan sa pangalagad;

• Oras nga gikinahanglan paghatag sa pangalagad;

• Bayranan ug ubang panginahanglan sa pangalagad; ug

Mga paagi pagreklamo kon di matagbaw sa pangalagad. 

***

Email: [email protected]