Kapamilyang Silverasyon

ABS-CBN Broadcast Complex, Jagobiao, Mandaue City—Bisan sa kusog nga bunok sa uwan, kaliboan ka tigtan-aw ug tigpaminaw sa Channel 3, MOR DYLS 97.1 Lupig Sila ug DYAB Abante Pa, Bisaya! nagpunsisok dinhi alang sa “Silverasyon,” ang pormal nga pagbukas sa tibuok tuig nga kasaulogan sa ika-25 nga anibersaryo sa ABS-CBN Cebu.

Labing gipunsisokan mao ang Kapamilya Bazaar.  Nga nitanyag sa tanang baligya, nga pulos hinatag sa labing manggihatagon nga mga Sugbuanon, sa tag-P25 matag usa. Tanang halin itabang sa labing kabos ug labing masakiton nga mga pasyente sa Tabang Patrol ug BMPM sa DYAB ug Halad sa Kapamilya sa TV Patrol Central Visayas.

* * *

Bisan among gipahibawo nga ala-1 sa hapon pa magsugod ang bazaar, nangabot nang mga mamalitay sa alas-6 pa lang sa buntag. Bisan nangabasa sa uwan kay wa kabitbit og payong ug ubang pandong, wa mobuwag sa ilang linya ug padayong nagpaabot nga pasudlon na sila sa TV barn diin gipasundayag ang tanang baligya.

Ug gigantihan ang ilang lahutay. Sila ang nakapatuyang pagpamalit sa mahalong mga sapatos, mga sinina, mga bag ug mga libro nga tag-P25 ra matag usa. Gilimitahan namo sila og tag-upat lang ka butang matag usa. Apan wa ning kapapas sa katam-is sa ilang pahiyom nga nakakuha sa mga butang nga dugay na nilang gihandom.

* * *

Nakahukom mi sa pagkuridas sa presyo sa tanang baligya aron nga mas paspas ug hapsay ang pinalitay. Nalikayan ang kahasol sa pagbutang og price tags ug sa pagpangita og sensiyo alang sa mga namalit. Gawas pa, ang labing mahinungdanong tuyo sa bazaar mao ang paghimong mas sayon sa pagsaw-anay.

Ang mga nanghatag sa mga butang gidasig sa labing lunsay nga awhag sa pagtabang. Ang mga namalit nahinangop kay dugay nang naghandom sa mga butang nga gitanyag sa labing ubos nga presyo. Ug ang sangpotanan sa ilang panag-abot mao ang pagtigom sa dakong pundo nga mapahimuslan sa labing nagkinahanglan nilang mga kapamilya.

* * *

Gidugokan ang Agri Fair sa mga mag-uuma sa bukirang mga barangay sa Dakbayan sa Sugbo nga nitanyag sa lab-as nilang mga prutas ug mga utanon. Init sang palabwanay sa subasta sa airconditioning units, refrigerators, personal computers, laptops, treadmills ug ubang kahimanan ug labing halandumon nga kabtangan sa mga personalidad sa ABS-CBN.

Gipahigayon ang Santos nga Misa uban ni Padre Bernard Oyao sa Our Lady of Guadalupe Parish, nga gisundan sa kumbira sa nagbawong mga kapamilya, variety show sa TV Production ug libreng disco sa MOR DYLS. Himuon sa mosunod nga mga adlaw ang ubang kalihokan sa “Silverasyon.” Nga molingi sa dakong papel sa ABS-CBN sa kasaysayan sa Sugbo sa niaging 25 ka tuig ug molantaw sa mas dakong papel nga iyang huptan sa umaabot nga katuigan.

* * *

Email: [email protected]