Bisan kanus-a, Kapamilya

Imbitado ka sa dakong kumbira karong Sabado, Septiyembre 1. Sama sa nangaging mga Kumbira sa Kapamilya, magsawo ta sa atong mga bawon atol sa panihapon nga puno sa kalingawan, paglingi sa kagahapon, paglantaw sa umaabot ug paglab-as sa panaghigalaay. Maghugpong ta paglusad sa tibuok tuig nga kasaulogan sa ika-25 nga anibersaryo sa ABS-CBN Cebu.

Ang “Silverasyon” motapok sa ABS-CBN Broadcast Complex sa Jagobiao, Mandaue City sa mga kawani ug suking mga tigtan-aw ug mga tigpaminaw sa mga sibyaanan ug mga plataporma sa telebisyon ug radyo sa ABS-CBN Cebu sa niaging duha ug tunga ka dekada. Lab-ason ang labing makahuloganon nga mga handumanan sukad sa pagsugod og sibya sa ABS-CBN sa Sugbo sa niaging 24 na ka tuig.

***

Sugdan ang tibuok adlaw nga kalihokan sa paglusad sa labing bag-ong programang “Tubag!” sa alas-7 sa buntag nga dungan nga makita ug mabati sa ABS-CBN Channel 3 ug DYAB 1512 khz. Magsugod sa samang takna ang Agri Fair nga mopasundayag sa labing lab-as nga mga prutas ug mga utanon sa mga mag-uuma sa bukirang mga barangay uban ang tabang sa buhatan ni Acting Cebu City Agriculturist Apple Layon.

Ang Kapamilya Bazaar sugod sa ala-1 hangtod sa alas-5 sa hapon sa TV Barn mobaligya sa mga donasyon gikan sa manggihatagon nga mga Kapamilya nga ikuridas og pamaligya sa managsamang presyo nga P25. Ang tanang halin alang sa labing kabos ug labing masakitong mga pasyente sa mga programang Tabang Patrol, BMPM ug Halad sa Kapamilya.

***

Dunay duha ka hugna sa subasta nga dumalahon ni DYAB Anchor Neda Avinante:

• Ang unang hugna nga himuon sugod sa ala-1 sa hapon sa main lobby mohatag sa mga mamalitay og kahigayonan sa pagpalabwanay sa presyo sa hinatag nga airconditioning units, personal computers, laptops, printers, scanners, stereo sets, speakers ug ubang gadgets; ug

• Ang ikaduhang subasta himuon sa alas-6 sa gabii motanyag sa labing halandumon nga mga butang sa mga personalidad sa ABS-CBN.                

***

Santos nga misa nga saulugon ni Padre Bernard Oyao sa Our Lady of Guadalupe Parish ang mosunod sa pagtak-op sa Agri Fair ug Kapamilya Bazaar sa alas-5 sa hapon. Makabuhong nga pagsaw-anay sa mga bawon ug panihapon ang mosunod sa ikaduhang subasta sa alas-6:30 sa gabii.

Ang BYOP nga kumbira sundan sa variety show sa mga tagduma sa “Mag-TV Na!” ug “Kapamilya Mas Winner Ka!” ug dayon sa sadya nga disco sa DYLS 97.1 Lupig Sila. Hinaot nga makauban ka namo ning pormal nga pagsugod sa usa ka tuig nga kutay sa kalihokan. Nga maglakip sa mabulukon nga pagsaulog sa labing dagkong kadaogan ug pagkutlo og mahinungdanon nga mga leksiyon sa labing dagkong katalagman sa Sugbo ug mga Sugbuanon.

***

Email:  mailto:[email protected]