Kinsa ipuli?

Husto si Mayor Michael Rama sa iyang pag-ingon nga kon dili pa tungod sa pangedaron, si Sir Jose “Dodong” Gullas usa sa angayan nga itudlo nga Secretary sa Department of the Interior and Local Government (DILG).

Kinahanglan gayud tuod nga ang itudlo nga Secretary sa DILG mao kadtong tawo nga wala maghunahuna nga makaangkon siya og kahamugaway sa paghupot niya sa katungdanan.

Matud ni Rama nga husto kaayo nga gikan sa “academe” kon kadtong mga tawo nga adunay kasinatian pagdumala og tunghaan ang sunod nga DILG Secretary.

Nakabaton ko og garbo sa pamahayag ni Rama kay si Gullas maoy among chairman sa The Freeman. Misanong ko sa obserbasyon ni Rama nga matinud-anon si Gullas sa iyang serbisyo.

Dihang nahimo nga kongresista si Gullas diha sa First Congressional District, mitungas siya sa kabukiran sa iyang distrito.

Hapit mitulo ang luha ni Sir Dodong nga nakakita sa mga bata nga maghukas tawon sa ilang sapatos ug magbitbit sa ilang sinelas nga moubog sa sapa aron makaabot sa ilang tunghaan.

Natan-aw ni Sir Dodong nga angay’ang tagdon dayon ang maong problema kay risgo kaayo ang kahimtang sa mga bata kay duna na gani’y pipila kanila nga naanud sa baha.

Gipasaligan ni Sir Dodong ang mga lumolupyo didto sa bukiran nga bahin sa Naga, kana kon wala ko malimot, nga tukoran sila’g taytayan. Bisan hinapos na ang termino pagka kongresista ni Sir Dodong, gipatukoran gihapon niya’g tulay ang maong dapit.

Wala na magpapili pag-usab si Sir Dodong pagka kongresista ug mibanos kaniya ang iyang igsoon nga si Sir Eddie Gullas. Pagkahuman sa taytayan, dili na kongresista si Sir Dodong.

Abi ninyo, bisan dili na siya kongresista ug wala nay plano nga molansar sa politika, gibalik ni Sir Dodong ang maong dapit aron pagtugyan sa taytayan ngadto sa mga lumolupyo ug mitataw nga dili siya maantigo nga mamakak.

Ingon niini ang rason nga si Sir Dodong haum unta nga itudlo sa mga tag-as nga katungdanan sa kagamhanan, apan mora’g dili na kini mahatagan og katumanan.

Gisugyot usab ni Rama ngadto sa kaabag ni Presidente Aquino si kanhi Tourism Secretary Joseph “Ace” Durano kay tan-aw niya batan-on, abogado ug nahimo na nga sakop sa gabinete kaniadto.

Anaa ra ni Presidente Aquino ang pagtimbang-timbang kay daghan kaayo nga mga ngalan ang girekomendar nga himoong sunod nga DILG Secretary.

* * *

Ngano ba gayud nga gahi man og ulo ang kadagkoan sa telecommunications companies nga hangtod karon wala gihapon motangtang sa ilang mga linya nga nagkumbitay na sa dalan Escario?

Mora’g maisip kini nga bugal-bugal alang ni Mayor Rama kay samtang ang mayor mihatag og ultimatum kanila nga kutob ra gani unta kaniadtong Hulyo 1, apan karon hapit na lang Septiyembre.

Ang Visayan Electric Company (Veco) mikuha na sa ilang mga alambre apan dili pa nila matangtang ang ilang kahoy nga poste nga anaa na sa tunga sa karsada kay maladlad sa karsada ang alambre sa mga telecommunications companies.

Maayo tingali nga mohunong na si Mayor Rama sa paghimo’g ultimatum unya walay gihimo nga aksyon. Ang City Traffic Operations Management (CITOM) mitangtang na gani sa traffic lights sa maong dapit.

Ang maong mga poste peligro pa nga madam-agan sa mga sakyanan ug makabalda kini nga ang karsada magamit na unta nga two-way.

Lapad na kaayo ang karsada nga gigastohan og milyon-milyon ka pesos sa kagamhanan apan tungod sa pagdugay-dugay sa pagkuha sa maong mga linya sa kumunikasyon, nagpabiling “one way” ang maong karsada.