Lacson angay sa DILG post

Nindot tuod nga si Senador Panfilo Lacson maoy itudlo ni Presidente Aquino nga mohulip sa pwesto ni Secretary Jesse Robredo sa Department of the Interior and Local Government (DILG) kana kon patay na man gayud si Robredo.

Si Lacson nga nahimo kanhi nga director general sa Philippine National Police (PNP) haum kaayo sa maong katungdanan, ilabi na nga ang PNP usa sa mga ahensya nga sakop sa DILG.

Gawas sa PNP, ang mga sakop sa DILG mao ang Bureau of Fire Protection (BFP), Bureau of Jail Management and Penology (BJMP) ug ang academy sa kapolisan.  Pinaagi ni Lacson, mahimong madisiplina pagbalik ang kapolisan.

Hinoon dunay mga pasangil nga si Lacson nalambigit og binuang apan wala kini kapamatud-i mao nga isipon gihapon nato siya nga inosente sa maong pasangil.

Ang nagustohan nako ni Lacson mao ang iyang political will nga dili mahadlok mohimo og mga lakang aron pagsulbad sa problema.

Suheto kaayo ko ni Lacson kay dihang nahimo siya nga commander sa Cebu Metro District Command (Metrodiscom) kaniadtong 1989, usa ko sa mga reporters nga kanunay niya’ng ikauban.

Tan-awa kadtong hitabo nga gidagit ang apo sa banay’ng Gaisano ug gitipigan sa mga kidnappers, duha ka adlaw nangamatay ang mga mikidnap sa bata ug naluwas ang biktima.

Kanunay namo nga hatagan si Lacson kaniadtong og “homework” aron iyang aksyonan. Pananglit makadungog mi nga dunay polis nga nagbinuang, iya dayon kini nga pahimoan og diha-diha nga aksyon sa intelligence. Usahay paubanon mi nila.

Inigka-ugma, nindot kaayo ang among balita. Agresibo usab kaayo si Lacson kaniadto nga mopahimo og “surprise inspection” sa mga police stations nga ubos sa Metrodiscom.

Sunod-sunod ang mga gabii nga daghang mga polis nga masakpang nangatulog ra sa ilang duty, ang uban gani nakuhaan og armas sa mga inspectors. Inigka-ugma, ipresentar ni Lacson ang mga polis nga tapolan.

Sa ingon nga paagi, nag-inabtik na ang mga polis nga nadestino ubos sa iyang teritoryo. Diha’y higayon nga kauban mi ni Lacson luwan sa iyang service vehicle, usa ra tawon ka L300 van.

Dihang hapit na kami miluwak sa Mandaue-Mactan bridge, kalit niyang gimandaran ang drayber. “Ihinto mo!” Sa ato pa ihunong! Diha gayud kami mohunong atubangan sa nagbarog nga polis.

Gibuksan nila Lacson ang glass window sa sakyanan ug giingnan ang polis. “Isuot mo ang sumbrero mo!” Ingon niadto si Lacson, dili gusto nga lawsi tan-awon ang mga polis.

Dihang nahimo siya nga PNP Chief, makabantay g’yud ko nga masuko siya kon makakita og mga polis nga wala motuman sa lagda.

Karon nga daghan na kaayo nga bilyako sa kapolisan, magkihanglan kita og tawo nga adunay leadership. Haum kaayo si Lacson nga modumala sa DILG. Maayo unta kon siya ang itudlo ni Noynoy ug nga modawat ‘sab si Lacson.

* * *

Gipalawman na sa mga private contractors nga gi-hire sa City Hall ang Parian Creek, kanang sapa nga anaa mag-agi ilawom sa mga department store sa Colon.

Apan tan-aw nako, ang gipalawhan nila mao ra man ang anaa daplin sa tulay nga maoy makita sa tawo. Wala man sila’y gihimo niadtong mga dapit nga dili na maabot sa ilang backhoe.

Tsk! Tsk! Tsk! Mao kini ang gikuyawan nako kon ang mga supervisor sa Department of Engineering and Public Works (DEPW) nagpatulog-tulog lang kay hayan maalkanse ta.

Basin og pirma lang usab dayon sila nga kunohay nakatuman na sa gilatid sa kontrata ang contractor apan ang tinuod, ang diha ra daplin sa karsada ang ilang gipalawman.

Tan-awa ninyo na Mayor Mike Rama.

* * *

Wala ko malimot nga gihatagan ni Mayor Rama og ultimatum ang contractor sa rehabilitation works sa karsada nga magdugtong sa Guadalupe ug Kalunasan nga humanon nila ang proyekto hangtod kagahapong adlawa.

Kini aron nga karong adlawa, Agosto 21, subhan nila ang karsada. Giadto nako kagahapon ug akong nasayran nga wala pa gihapon mahuman ang trabaho. Nagtoo ko nga naingon niini kay wala tumana sa DEPW ang tahas sa kanunay’ng pagmonitor sa trabaho.