Sipyat sa pantalan

Magtiayong negosyante naluoy sa ilang katabang nga taga Mindanao.  Kay nahasol nga naghunahuna sa iyang duha ka manghod nga wa nay klarong nag-atiman human nangamatay ang ilang mga ginikanan.  Maong nitanyag sila nga pasudlon isip katabang ang ikaduhang igsuon nga dako na ug gastohan sa eskuylahan ang kinamanghoran nga gamay pa.

Dayong larga sa katabang pagkuha sa iyang mga manghod, nanugon ang ilang mga silingan nga mahimo bang magda og lain pang mga paryente nga kasaligan kay nagkinahanglan sab sila og mga katabang.  Gihatod sa igsuon sa negosyante ang katabang sa pantalan.  Ug gipasaligan nga sugaton sa iyang pagbalik uban na sa mga manghod ug ubang paryente.

* * *

Alas-singko pa lang sa kadlawon sa gikasabotang adlaw, gisugat sa magtiayon ang katabang.  Nga tuod man nagda na sa iyang duha ka manghod ug laing duha ka paryente.  Gipahimutang dayon silang tanan sa sakyanan aron nga adto na lang sa bay sa magtiayon mamahaw.

Apan may mga tawo nga nipugong sa ilang pagbiya sa pantalan.  Nagpailang mga polis ug gidapit silang mangadto sa buhatan aron manubag og mga pangutana.  Kay wa may bisan gamay nga pagduda, nanguyog ang magtiayon ug ang bag-ong nangabot, nga wa gyud maghunahuna nga nagsugod na diay ang ilang kalbaryo.

* * *

Sa buhatan sa kapolisan, gibuwag og sukitsukit ang magtiayon ug ang ilang mga gisugat.  Napanid-an na diayng daan ang mga babaye dayon nilang sakay sa barko sa Mindanao.  Maong gipindotan nang daan ang usa ka non-government organization.  Nga mao nay ni-alarma sa kapolisan sa gidudahan nga kaso sa human trafficking.

Kusganon nga gipanghimakak sa magtiayon ang pasangil.  Ang katabang ug kaubanan sa pikas nga kuwarto nagsublisubli og pasalig sa mga imbestigador nga ligdong ang panginabuhi sa magtiayon, nga gitabangan pa gani hinuon sila ug nga wa sila magduda nga ilawog sila sa prostitusyon.  Apan padayon silang gitanggong sa kapolisan ug sa kadagkoan sa NGO.

* * *

Maong napugos ang magtiayon pagpanawag sa ilang kaparyentihan ug mga higala.  Ilang mga anak nidangop sa internet pagsabot unsay human trafficking.  Ilang mga silingan niduaw nila sa buhatan sa kapolisan pagpasalig nga sila ang namalihog og mga katabang.  Apan wa motuo ang mga imbestigador nila.  Maayo na lang nga usa sa suod sa magtiayon mao ang tag-iya sa mga sakyanan nga kanunayng abangan sa NGO sa ilang mga ronda pagluwas sa mga bata ug kababayen-an gikan sa mga bay kahilayan.

Gibuhian ang magtiayon ug kaubanan alas-7 sa gabii, 14 ka oras human sa ilang pagkatanggong.  Kon wa pay daghang kaila, mahimong matanggong og mas dugay o mapasakaan gyud og kaso sa korte.  Angayng paluyohan ang kampanya batok sa human trafficking.  Apan hinaot nga wa nay laing mga inosente nga maligsan.  

* * *

Email: [email protected]