Pasingit sa helmet

Saligi ang burukrasya sa gobyerno nga manglawgaw.  Inay motabang pagpatuman sa yanong balaod nga gitumong pagpanalipod sa mga manakay og motorsiklo gikan sa kamatayon ug dagkong kadaot kon magiagom sa mga aksidente sa kadalanan, giumol ang mga lagda nga nakapayagaw, nakahasol ug nakapaulbo sa kaspa sa tanang hingtungdan.

 Ang labi maayo untang gihimo mao ang paglusad og lapad nga kampanya pag-edukar sa mga tag-iya ug mga pasahero sa motorsiklo sa panginahanglan pagsul-ob sa tukmang mga helmet aron nga di mabuak ang ilang mga ulo kon mabangga o mabanggaan sa mas dagkong sakyanan.  Apan gitingob hinuon sa mga buhatan sa gobyerno ang ilang mga paningkamot pag-umol og mga lagda nga imposibleng mapatuman.

* * *

 Way bilib ang gobyerno sa katakos sa tawo pagluwas sa iyang kaugalingon.  Nga kon hatagan lang sa tanang gikinahanglan nga makahuloganong kasayuran, ang katawhan boluntaryong motuman sa mga lagda nga gitumong pagpanalipod nila gikan sa katalagman.

 Mao nga inay isangyaw ang minimum nga panginahanglan sa mga helmet—makatabon hangtod sa dunggan, may hunulhunol nga hapin sa ulohan ug may lig-ong higot sa liogan—gihilabtan sa gobyerno ang pagpili sa tukma nga mga helmet, giawhag ang manufacturers pagsumiter og sampol sa ilang helmets ug gilista ang brands sa helmets nga giingong nakapasar sa pagsuway sa ilang laboratoryo.

* * *

  Gawas nga gidiktahan nang mga motorista unsa ray brands nga mahimo nilang paliton, gimandoan pa gyud sila sa gobyerno sa pagpakita sa napalit nilang helmets aron matagsa-tagsa pagsusi sa mga inspektor sa Department of Trade and Industry (DTI).  Kay wa may garantiya nga ang nalista nga brands nakapasar ba sa mga minimum nga mga lagda sa kaluwas.

 Nganong nagpahigayon pa man og laboratory tests?  Nga tagsa-tagsaon man lang diay gihapon pagsusi ang helmets?  Ang DTI mismo niangkon nga posibleng ang brands nga wa malista mas lig-on pa kay sa naapil sa listahan.  Gideklarar nga gahi og ulo ang manufacturers nga wa mosumiter og sampol sa ilang helmets.  Busa ang nakapalit nga mga motorista maoy gipahimungtan.

* * *

 Mayoriya sa mga helmet di masusi hangtod karong Agosto 1.  Di ni sayop sa mga motorista.  Kon dili sa DTI nga nagpatugatuga apan wa diay igong kawani ni panahon pagtagsa-tagsa paghiling sa helmets.  Maong manguros na lang tang daan sa mas dakong kagubot inig sugod na og dinakpanay sa mga motoristang mas sayop nga helmets.

 Mao ni mahitabo sugod karong Agosto 1:  Parahon ang tanang motorsiklo, bisang mga magsul-ob sa tukmang helmets aron pagsusi may napilit bang stickers, nga matino lang pinaagi sa pagtan-aw sa serial numbers, busa subayon pa sa mga ahente sa Land Transportation Office (LTO) ang taas nilang listahan sa serial numbers.  Igo gyong mahuman pagsusi sa unang helmet makamugna na’g usa ka kilometrong linya sa nangusmong mga motorsiklo.  Ug higanteng pagkabara sa trapiko.  

* * *

Email:  leo_lastimosa@abs-cbn.com