Tumoy sa ilong

Isip iyang bosing, unsa may imong gustong isulti ni PNoy sa iyang SONA?  Mao ni among pangutana sa Pulso sa DYAB Abante Pa, Bisaya! ug Maayong Buntag, Kapamilya sa ABS-CBN Channel 3.  Ug mao ni ang pipila sa mga tubag nga among nadawat:

Hinaot iyang hapsayon ang dagan sa among trapiko sa eskina Punta ug F. Llamas; badlungon among barangay kapitan sa Lagtang nga laagan; disiplinahon niyang MCWD nga wa katabon sa ilang mga kinawotan; ayuhon niyang among dan sa Panadtaran, San Fernando; sulbaron niyang ilegal nga drugas diri sa Duljo-Fatima; ipahunong niya ang paghimong terminal sa ilawom sa flyover sa Tabunok; ug uban pa.

***

Daghang hubad sa mga tubag nga nalista sa ibabaw:  Tinuod gyud tingali nga daghan pang wa kahibawo unsay responsibilidad sa presidente kon itandi sa mga gimbuhaton sa mga barangay kapitan, mga mayor o mga gobernador; o tinuod tingali hangtod karon ang paniid ni Dr. Jose Rizal nga ang kinabag-an sa mga Pilipinhon wa pay sense of nationhood; o gusto lang mopahungaw ang katawhan sa ilang giisip nga labing dinaliang suliran bisan unsa pay among pangutana sa Pulso.

May hubad sab nga ang mga tubag timaan sa ka-desperado sa katawhan.  Kay wa man matabangi sa lokal nga mga opisyal, nanghinaot na lang nga malilian sa Malakanyang.

***

Kon mao ni pagtan-aw sa pipila sa presidente, posible diay nga motaas o mo-us-os ang ilang pagsalig niya depende sa kahapsay sa ilang trapiko, o pagkaayo sa ilang dan, o pagkahipos sa ilang basura?

Kon mao nga wa silang kahibawo sa tinuoray nga mga gimbuhaton sa labing gamhanan nga buhatan sa gobyerno, unsa man diay ang sukaranan sa ilang pagpili og presidente?  Kon kinsa lay nakalamano o nakapaletrato uban nila?  Kon kinsay gipaluyohan sa mga haligi sa ilang pamilya?  Kon kinsa lang letrato ug slogan ang nagustohan nila?  O kon kinsa ang gipangampanyahan sa ilang paboritong mga artista?

***

Sa bahin ni Presidente Aquino, mahimong iyang palihukon ang makinarya sa propaganda sa gobyerno pagdetalye sa iyang job description.  O pagpasabot nganong mas mahinungdanon ang nasudnong interes kay sa nagkasungi nga personal nga mga interes.  O dawaton ang kamatuoran nga di pa gyud andam ang katawhan sa nasudnong panaghiusa kay di pa kakita lapas sa tumoy sa ilang ilong.

O mahimong ilhon ni Aquino nga sa pagtapos sa adlaw (Binisaya sa iyang kinaham nga panultihong “at the end of the day”), responsibilidad sa iyang pamunoan ang bisan unsang panghitabo sa bisan asang bahin sa nasud.  Kay imposible mang siyay mangolekta sa tanang basura, motapak sa tanang libaong, o modakop sa tanang durugista, labing menos niyang mahimo mao ang pagtino nga ang tanang buhatan sa gobyerno makatuman sa ilang tahas.

***

Email:  [email protected]