Nagmika sa Minglanilla

 Haskang salbahisa sa gihimo sa lokal nga mga opisyal sa Minglanilla, habagatang Sugbo: Dihang gipangutana nganong silay labing daghan og kaso sa dengue sa tibuok lalawigan sa Sugbo, ilang gitulisok ang mga molupyo nga wa motabang sa kampanya batok sa dengue. Kuwang na lang og diyutay nga ilang basulon ang mga na-ospital ug ang mga tagtungod sa mga nangamatay sa dengue ug ingnon nga "Mirisi!"

 Inay mopadayag og simpatiya sa mga naigo sa makamatay nga sakit ug mopasalig nga himuon ang tanan aron nga mabadlong ang pagkatap sa dengue sa labing daling panahon, gipili nila ang minaru nga lusot ni Pilato, ang pagpanghunaw og bisan unsang responsibilidad sa katalagman.

*   * *

Human namatyi, nag-mist spraying ang lokal nga mga opisyal sa Minglanilla sa naapektahan nga mga barangay. Hingpit nilang gisalikway ang pasidaan sa Department of Health (DOH) ug ubang mga eksperto nga way kapuslanan ang paggamit og kemikal kay:

 • Di makapatay sa mga lamok nga nagda sa dengue nga sayon ra kaayong makalupad palayo sa di pa magsugod ang misting o fogging; hinunoa

 • Mahimong makapakatap sa dengue sa silingang mga barangay nga maoy dangpan sa manglikay nga mga lamok; ug

 • Mameligro hinuon ang kahimsog sa mga molupyo, labi na sa mga bata ug hamtong nga huyang og immune system, mga hayop ug mga tanom tungod sa makadaot nga mga kemikal.

* * *

 Gibungul-bungolan lang sa lokal nga mga opisyal sa Minglanilla ang napamatud-an nang tambag nga ang labing epektibong paagi paglikay sa dengue mao ang pagpanlimpiyo sa tibuok palibot. Ambot pila na ka tuig nga gibalikbalik pagpasabot ngadto nila ug ubang mga politiko nga mas epektibo kay sa bisan unsang kemikal ang mga silhig, pala ug kakugi sa pagpuo sa tanang posibleng tagoanan sa mga lamok.

 Hinaot nga hinay lang ang ilang pangutok. Hinaot nga dugay lang gyod silang makasabot. Hinaot nga tapolan lang sila. Nga di lang ganahang maghago pagpangu sa mga molupyo sa pagpasingot. Ug hinaot nga di lang ni tungod kay mas gamay ang komisyon sa silhig ug pala kay sa kemikal.

* * *

 Si Konsehal Robert John "Jojo" Selma, tsirman sa committee on health sa Minglanilla Municipal Council, nipasabot nga wa sila mamalit og kemikal. Matod niya ang tanang kemikal nga ilang gigamit batok sa dengue hinatag sa Kapitolyo. Wa siyang kahibawo sa mist spraying. Ang iya rang nahinumdoman mao nga pulbos nga kemikal, kansang ngan iyang nakalimtan, ang ilang gipamutang sa nagpundong tubig duol sa kabalayan.

 Ang Minglanilla gikaintapan tungod sa kapakyas pagsulbad sa mga suliran sa trapiko, ilegal nga drugas, sugal ug pangisda ug ubang krimen. Inutil sab diay sa nagbalikbalik nang hulga sa dengue. Mas nakapait mao nga morag way kalibotan ang mga tagduma unsay nahitabo sa ilang nataran. 

* * *

Email: [email protected]