Ayaw gayud kamo kasayop
Kon dili man gayud makaya sa dakbayan sa Sugbo ang panggastos aron hingpit nga masulbad ang problema sa paglunop-baha diha sa downtown area, mas labing maayo nga magpatabang na lang sila sa publiko.
Sigurado ko nga ang mga magpapatigayon kang kansang mga tindahan sagad malunopan bisan duna la’y hinay nga uwan, dili magpanuko sa pagtabang ubos sa Public-Private-Partnership (PPP) ni Mayor Michael Rama.
Apan angay usab nga susihon ni Rama kon ngano nga bisan og gigastohan na sa dakbayan ang pagpalawom sa atong kasapaan, daw mao ra man gihapon ang sitwasyon.
Wala kaha kita mag-usik-usik lang sa kwarta nga gikan sa buhis sa katawhan nga gibayad nato sa mga private contractor nga mipahigayon og dredging sa mga sapa apan walay pulos?
Tiaw mo nga bisan og kadiyot ra kaayo ang uwan niadtong Dominggo sa gabii, apan naglunop dayon ang downtown area. Paita niining maong sitwasyon uy.
Angay’ng ipasusi ni Mayor Rama ang akong nadiskobrehan nga samtang maglunop dinhi sa dalan Colon, apan dili man moawas ang sapa didto dapit sa McArthur Boulevard.
Banabana nako, mas mabaw na ang sapa didto mao nga kon dunay uwan ang bahin diri sa downtown area maoy maglunop.
Duna man gani tawo nga nagpuyo diha gayud daplin sa sapa apan ang iyang payag dili man maabot sa tubig nga gikan sa Estero Parian.
* * *
Padayon nga nangilyopo sa kadagkoan sa Metro Cebu Water District (MCWD) ang mga lumolupyo didto sa Upper Fatima nga sakop sa Barangay Apas nga unta makonektahan na sila og tubig.
Samtang duna man sila’y tubig pagka karon apan mahal kaayo ni kay maisip man nga gipalit nila kini og tag P70 matag cubic meter gikan sa mga negosyante.
Hangyoon nako ang mga opisyal sa MCWD nga aksyonan na unta nila ang akong suwat-hangyo sa ngalan sa daghang mga lumolupyo.
Ang uban gud sa mga pamilya nga mokonsumo og 15 ka cubic meters nga tubig mogasto tawon og kapin sa usa ka libo ka pesos matag buwan.
* * *
Pwerteng lipaya sa mga senior citizens kay nakadawat na sila kagahapon og tag P3,000 nga kabahin sa P5,000 nila nga tinuig nga cash incentive gikan sa dakbayan sa Sugbo. Ang laing P2,000 adto na ihatag sa hinapos nga bahin sa tuig.
Apan pagpanglingla usab ang gihimo sa ubang opisyal sa barangay nga gigamit ang maong pagpanghatag og cash incentive sa pamolitika. Dunay mga opisyal sa barangay nga miingon nga kon si Rama lang gihapon ang modaug pagka mayor, ang P5,000 nga cash incentive himoon na nga P10,000.
Dili imposible nga mosaka ang kantidad sa cash cassistance apan bisan tingali og si Kongresista Tomas Osmeña ang modaug ingon usab niini ang mahitabo. Apan unsaon man, duna may uban nga mopahimulos gayud sa pagpamolitika.
* * *
Dunay ubang mga tawo nga nangutana kanako kon kinsa ang angay’ng suportahan kon botohan sa mga nagtinguha karon nga mag-opisyal sa dakbayan.
Ang akong gisulti kanila mao nga angay’ng pilion nila kadtong mga tawo nga mahadlokon sa balaod. Kadtong mga tawo nga matinumanon sa balaod maoy angay nato nga pilion.
May mga tawo man gud nga gusto nga mahimong opisyal sa dakbayan apan dili motuman sa balaod. Wala man gani sila motuman sa balaod karon nga dili pa sila opisyal, unsa pa kaha kon sila opisyal na. Husto ba ko?
Gusto ba kita og mga opisyal sa atong dakbayan nga masinupakon sa balaod?
Tambag nako ninyo nga mga botante, ayaw gayud mo’g botar sa mga tawo nga masinupakon sa balaod.
* * *
Nagkakita mi og ni Renato “Junjun” Osmeña nga anak ni Kanhi Vice Mayor Renato V. Osmeña. Hugot gayud diay ang iyang baruganan nga molansar pagka kongresista sa south district.
Aw kini hinoon si Junjun nakita nako ang iyang pagkamatinud-anon. Tiaw mo nga andam niya nga biyaan ang iyang pagka manager sa Pagcor bisan og wala siya’y masandigan nga partido.
Sa akong tan-aw, usa siya ka nindot nga opisyal sa kagamhanan kon molampos sa iyang tinguha nga magkongresista.
- Latest
- Trending
