Corruption sa OBO, ipahunong

Hugot gayud diay ang pagtoo ni Mayor Michael Rama nga dunay mga kawani sa Office of the Building Officials (OBO) nga mangilkil sa mga moaplay og permit sa ilang opisina.

Kini maoy tahas ni Rama kang City Engineer Kenneth Carmelita Enriquez nga ipahunong sa labing dali nga panahon. Matuman kaha ang gilantaw ni Rama? Kon ako ang pangutan-on makaingon ko nga lisud kini matuman.

Si Enriquez man gud gitahasan ni Rama nga maoy molingkud isip acting chief sa OBO human kini nga nahimo na gayud nga departamento pipila ka buwan ang nakalabay.

Akong gipangutana si Rama kon bisan walay nasakpan nga nangilkil sa mga kawani sa OBO motoo ba siya sa report. Matud sa mayor nga dili na kini malilong kay dugay na kini kaayo.

Bisan ako nagtoo man gayud nga dunay pipila ka kawani diha sa OBO nga tuyoon gayud sa paglangan-langan ang pag-aprobar sa dukomento aron nga mapugos ang mga applicant sa paghatag og suborno.

Ambot mahimo ba kaha nga pangilisan ang mga sakop sa OBO? Kon buhaton kini dili ba usab kaha makakat-on na ang mga ipuli unya kanila?

* * *

Kinahanglang atubangon gayud sa anak-babaye ni Acting Cebu City Treasurer Ofelia Oliva ang gipatawag nga husay sa kadagkoan sa Land Transportation Office (LTO) karong buntag aron sutaon kon makataronganon ba nga wala niya ihatag ang iyang driver’s license sa mga LTO agents.

Gipadad-an og summon si Karen Olvido nga motambong sa husay alas 9:30 sa buntag adto sa LTO-7 Regional Office sa Natalio Bacalso Avenue. Hatagan si Olvido og higayon nga mopasabot kon nganong nagdumili siya paghatag sa iyang lisensya.

Klaro man gud kaayo sa balaod nga gilatid sa Section 19 sa Republic Act 4136 kon Transportation and Traffic Code nga katungdanan sa mga drayber sa mga motor vehicles nga mohatag sa ilang lisensya kon pangayoan sa mga road law enforcers.

Apan bisan giunsa sa mga LTO law enforcers nga gipangulohan ni Bimboy Arnaiz Jr., si Karen Olvido wala gayud motunol sa iyang driver’s license ug nanawag hinoon sa iyang inahan nga abtik usab kaayo nga milaban sa iyang anak.

Nahibaw-an nga hangtod kaniadtong miaging semana ang “registration records” sa gimaneho nga sakyanan ni Karen Olvido wala makita sa “uploaded LTO masterlist” sa mga rehistrado nga sakyanan.

Gialarma na gani kini sa LTO aron nga dili marehistro bisan asa nga dapit sa nasud, kana kon wala pa kini marehistro. Apan ikaduha ra kana nga isyu nga tubagon ni Karen kabahin sa iyang sakyanan.

Ang una gayud niya nga tubagon mao kon nganong wala siya mohatag sa iyang lisensya dihang gipangayoan sa mga sakop sa LTO Task Force Alpha kaniadtong Mayo 25.

Natural nga parahon gayud ang sakyanan ni Karen kay depektoso man ang iyang tuo nga headlight. Unya, wala pay current year sticker ang plate number sa sakyanan. Usa kini sa rason nga parahon aron pagsuta kon rehistrado ba sa maong tuig ang sakyanan.

Inay ihatag ang iyang lisensya, nanirado man hinoon human miingon “Unsa ning inyo, modus ni sa pangwarta?” Pastilan, dili tawon mangilkil ang mga sakop sa TFA uy. Bisan walay sweldo ang mga sakop sa TFA, apan mibarog kini sa ilang kawsa nga pagtabang ra sa pagdisiplina sa mga masalaypong drayber.

Pulos dunay mga maayong trabaho ang mga sakop sa TFA ug dili mangilkil.

Sige, maniid ta og unsay sangpotan sa husay sa reklamo sa LTO batok sa anak-babaye ni Oliva.

* * *

May sugyot diay ko aron nga mapaminus-minosan ang kahuot sa mga sakyanan diha sa Escario Street atubangan sa Kapitolyo.

Dili ba maayo nga panipsan nato ang lapad kaayo nga “center island” sa Escario? Sa akong tan-aw, ang gilapdon sa mao nga center island katumbas sa usa ka lane sa karsada.

Angay’ng tun-an kini sa mga sakop sa City Traffic Operations Management (CITOM) Board aron irekomendar nila sa Cebu City Council.