Trabaho ra mi Ma'am uy

Ang pag-drive og motor vehicle panahon sa gabii nga depektoso ang headlights makuyaw nga makamugna og aksidente. Kini maoy rason nga parahon gayud kini sa mga law enforcers.

Basi sa balaod kon ang drayber parahon gani sa mga road law enforcers, sama sa mga sakop sa Land Transportation Office (LTO) kinahanglan nga mohunong gayud sila og ihatag ang ilang lisensya kon pangayoon kini sa mga law enforcers.

Ang Section 19 sa Republic Act 4136 kon Land Transportation and Traffic Code naglatid sa mosunod.

“The license shall be carried by the driver at all times when operating a motor vehicle, and shall be shown and/or surrendered for cause and upon demand to any person with authority under this Act to confiscate the same.”

Ang pagmaneho gud og sakyanan dili kini katungod sa usa ka tawo, prebilehiyo ra kini nga gihatag sa kagamhanan nga mahimong irebokar kon ang gihatagan dili motuman sa gilatid nga lagda.

Ang LTO-Manila mihatag og “authority” sa Task Force Alpha (TFA) nga moabag sa pipila ka organic personnel sa LTO sa pagpanakop sa mga drayber nga wala makatuman sa gilatid sa balaod.

Sa ato pa, dakong sayup ang gihimo ni Karen Olvido, anak-babaye ni Cebu City Acting Treasurer Ofelia Oliva, nga wala mohatag sa iyang lisensya dihang gipara ug gipangayoan niini sa LTO law enforcer.

Inay ihatag ang iyang lisensya ngadto kang LTO deputized agent Stephen Ybañez, si Karen nanirado hinoon sa iyang awto ug mitawag sa iyang inahan pinaagi sa cellphone.

Kay ngano, abi kay anak siya og treasurer dili na siya mahimong dakpon? Sayop lang gani ang desisyon sa TFA nga gitugotan ra siya nga makasibat nga wala dakpa bisan og mipakita og walay respeto sa law enforcers.

Sigurado ko nga wala kaayo mahibalo si Oliva sa tinuod nga sitwasyon. Apan dili usab maayo ang gihimo ni Oliva nga masuk-anon kaayo nga miapas sa iyang mga anak ug gipangkasab-an ang mga law enforcers.

Gipara ni Ybañez ang sakyanan nga gimaneho ni Karen kay depektoso ang tuo nga bahin sa iyang suga. Wala usa’y LTO current year sticker ang plate number sa sakyanan. Natural lang sa LTO enforcer nga parahon kini aron sutaon kon narehestro ba kini sa maong tuig.

Dili angay’ng mahadlok ang mga motorista sa LTO-Task Force Alpha kay dili gayud kini mangilkil sama sa sagad nato madunggan sa ubang law enforcers. Nakadungog ba kamo nga dunay mga sakop sa TFA nga nangilkil sa dinakpang draybers?

Bisan og walay sweldo o allowance ang mga sakop sa TFA bugti sa ilang serbisyo apan dili kami mangilkil. Dili dawaton sa TFA kadtong walay arang-arang nga trabaho o negosyo.

Gani ang ubang sakop sa TFA mga dagkong negosyante. Dunay uban nga misaway sa TFA kay kuno hambugero, apan sigurado ko kadtong mga nasuko mao ang mga nadakpan namo nga nakahimo’g salaud.

* * *

Dunay ubang tawo nga mikwestyon kay ngano kuno nga wala man pangdakpa sa TFA ang mga PUJ drivers nga wala magpasiga og suga nga magdagan diha sa karsada.

Ang mga sakop sa TFA katulo ra sa usa ka semana nga maghimo og operation sa lainlaing dapit. Panahon sa operation, kining mga PUJ driver mopasiga man sa ilang mga suga.

Nasayud ko nga wala makasabot ang ubang tawo sa sistema. Angay nila nga adto ipadangat ang reklamo sa mga government traffic enforcers nga anaa kanunay sa karsada apan maghinan-aw lang sa mga dakponon.

Alang kanako, inay nga sawayon, angay pa gani nga daygon ang mga sakop sa TFA kay miserbisyo kini nga wala mangilkil bisan og wala sila’y gidawat nga sweldo o kaha bisan usa ka sentimo nga allowance gikan sa LTO.

Ang mga sakop sa TFA mao pa ang makagasto. Sama kanako, gasto ko og palit sa printer ink alang sa paghimo og apprehension report. Nakadungog ba gud mo nga nangilkil ko sa mga drayber?