Magyagaw ang korte

Mas maayo si Chief Justice Renato Corona nga manubag og pangutana.  Kay sa pasagdan nga mao rang usa nga maglitaniya.  Mas maayo siyang paminawon nga modiretso og sulti.  Kay sa sal-otan og hingos, hilak ug walkout.  May mga tawo nga maayong tan-awon kun mohilak.  Si Corona way angay.  Labi na kay nag-inartista lang.

Sa iyang pagbalik pag-atubang sa Senate Impeachment Court niadtong Biyernes sa hapon, klarong nagsubay sa script nga luya siya—gihatod og ambulansiya sa The Medical City Hospital, nag-agbay sa iyang asawa ug kaabag aron makalahutay paglakaw ug nag-aginod ang iyang tubag nilang Senate President Juan Ponce Enrile ug Senador Miriam Defensor Santiago.  Hangtod nga nangutana si Senador Alan Peter Cayetano.  Labihan nang abtika ni Corona, nanapaw na gani.

***

Nakahinumdom og balik si Corona sa script dihang gisuspenso ni Enrile ang husay kay gituki sa mga senador unsaon pagtagad ang iyang gitanyag-gibawi-ug-gitanyag na sab nga waiver sa iyang bank accounts.  Dihang gihunghongan sa iyang umagad, si Dr. Constantino “Jojo” Castillo, urologist-surgeon sa Medical City, nga maoy nipahibawo nga giatake siya og hypoglycemia human ni-walkout niadtong Martes, nikalit lang og duka-duka si Corona.

Nakapahumok sa kasingkasing sa mga giluod sa acting ni Corona ang panag-uli nilang Cristina ug kaparyentihan, human tawga ni Corona ang namatay’ng si Jose Basa nga “spoiled brat.”  Di boluntaryo ang panag-uli.  Gihikay to sa mga kolumnistang lunod-patay ni kanhi presidente Gloria Arroyo.

***

Mao ni problema ni Corona.  O ang problema sa katawhan niya.  Isip labing taas nga mahistrado, siya unta ang labing unang mosandig sa mga argumentong legal pagpanalipod sa iyang kaugalingon.  Apan nangahas hinuon siya pagpamasol sa emosyon sa katawhan.

Tungod sa iyang pakauwaw, mas modako ang problema sa sistema sa hustisya:  Ang mga sinumbong mahimo nang mosunod niya nga modiskurso una manubag og mga pangutana; maghilak-hilak ug di gyod mohunong bisan pahinumdoman sa huwes pagdiretso sa punto; ug kun di gyod mosalir ang inartista, mo-walkout ug magpa-sakitsakit.

***

Makapakugang ang pagpa-undayon sa mga senador sa salida ni Corona.  Bisan klarong gibinastosan sila.  Si Santiago, nga labihang nakapangasaba ni Atty. Vitaliano Aguirre nga nanampong sa dunggan samtang nagdiskurso siya, ug Enrile, nga puwerteng sukoa kay gipadad-an ni Harvey Keh og mga dokumento batok ni Corona, kuwang na la’g diyutay nga motabang paghapyud-hapyod ni Corona.

Ila ba lang gipakita nga bisan unsa pay gihimo ni Corona angay gihapong tahuron ang iyang buhatan ug ang institusyon nga iyang girepresentahan?  O tungod sa dakong kahadlok nga tingali og kapasanginlan nga di tawhanon kun apikihon si Corona bisan sa duha niya ka operasyon sa kasingkasing ug 20 anyos nga diabetes?

O kabahin na lang sa hanig aron di kapangitaan og buslot ang ilang pagkonbikto ni Corona?  

***

Email:  [email protected]