"Takal" sa Cebu City Jail

Usa ka piniriso diha sa Cebu City Jail gisilotan sa mga kauban niya nga binilanggo pinaagi sa “pagtakal” kon pagbunal og bali’g ka 100.

Ang report nga miabot kanako mao nga gisilotan ang mao nga piniriso kay nasakpan kuno nga nagpadala nako og text message kaniadtong miaging semana. Gikatahapan nga espeya.

Akong klarohon nga wala ko makadawat og bisan usa ka text message gikan sa mga “sources” nako diha sa Cebu City Jail kaniadtong miaging semana. Tinuod nga duna ko’y tulo ka “informers” diha sa bilanggoan.

Ang maayo lagi, kinahanglan gayud nga hingusgan pag-ayo ang pagsakmit sa mga selpon nga gihuptan karon sa mga piniriso. Ang inpormasyon nga miabot nako nga pwerteng daghana man nga selpon diha sa bilanggoan.

Unya kon estriktohon man gayud ang pagdumala sa Cebu City Jail, angay’ng panggub-on usab ang mga “kubol-kubol” diha sulod sa bilanggoan.

Kana raba’ng lider-lider sa mga piniriso pwerting dagkoa og kwarto-kwarto sa mga selda mao nga gamay nalang ang mahabiling pwesto alang sa ilang mga kaubang binilanggo.

Dihang gihimo ang Cebu City Jail diha sa Barangay Kalunasan kaniadto, gilatid gayud nga dili na pabutangan og mga “kubol-kubol.” Apan unsaon nga ang mga nangagi nga warden mora ma’g mga pahoy.

Ila man gihapon nga gitugotan ang mga binilanggo nga makabutang og kubol-kubol kon kwarto-kwarto sulod sa ilang selda. Makasulti gayud ko niini kay nakabisita ko diha sa mga selda pipila ka buwan ang milabay.

Kini maoy rason nga ang warden nga si Superintendent Johnson Calubnga bag-o pa nga miasumer pagka  warden, maglisud na pagkoreher niini.

* * *

Alang kanako, si Kanhi Kongresista Raul Del Mar angayan gihapon nga mosalmot sa kalihukan pagdumala sa condominium nga gitukod sa karaang menteryo diha sa Barangay Lorega-San Miguel.

Wala malilong alang niadtong mga tawo nga maayo’g memory nga ang condominium project gisugdan sa pagplano atol nga siya pa si Del Mar ang kongresista sa north district.

Ang tinuod, igo lang gani nga mibanus ang iyang anak nga si Kongresista Rachel “Cutie” Del Mar sa maong proyekto. Gisakitan si Del Mar dihang si Mayor Michael Rama gikutlo nga miingon nga siya ang magbuot sa pagdumala sa condominium kay siya ang mayor.

Kong isulti man gani kini sa mayor, mora’g sakit usab kaayo ngadto ni Del Mar nga na katampo usab alang sa kalampusan sa proyekto. Ang isyu nga ilang gikabangian mao ra gayud kon pa abangon ba ang mga mopuyo sa condo.

Alang hinoon nako, angay lang nga sila mobayad og abang, dayon ang bayad nga matigum ibutang og trust fund aron nga magamit na usab pagpatukod og susama nga condo nga kapahimuslan sa uban.

* * *

Daghang order si Mayor Rama nga wala matuman. Tingali ang iyang staff utro pa nga nakalimot sa gisugo kanila.

Wala pa ko makalimot nga ang bag-ong staff sa mayor diha sa iyang opisina gisugo niya nga magpa-schedule og miting uban sa  district engineer sa Department of Public Works and Highways (DPWH), CITOM ug SPEED.

Ang tumong niini aron hisgotan nila unsay angay himoon aron mopaspas ang pagpangguba sa kabalayan diha sa tumoy nga bahin sa M. Velez ug Don Gil Garcia Streets, kilid nga bahin sa Kapitolyo.

Palapdan sa kagamhanan ang mao nga karsada apan unsaon paghimo niini nga ang mga nagpuyo sa daplin sa karsada nagdumili man sa pagbiya sa ilang nahimutangan?

Gitug-anan ko ni District Engineer Nicomedes Leonor nga ang maong yuta nga gipuy-an sa mga pamilya iya ni sa kagamhanan. Disyembre ra gani unta kini humanon ang maong karsada apan karon hapit na Hunyo.

Mao kini ang giingon nako nga kon ang mga sakop sa mayor limot-limotan lang ang gisugo kanila, walay kapuslan anang iyang plano. Daghan kaayo nga sugo sa mayor nga wala matuman.

Kasayon anang pag-schedule og miting dili ninyo mahimo?