SWAT angay pun-an

Mas nindot gayud nga dugangan pa ang mga polis nga magpatrolya nga magsakay og motorsiklo aron mosamot kapaspas ang pagresponde nila sa mga krimen.

Aw hinoon, 44 man kini sila ka polis nga sagad mga sakop sa Special Weapon and Tactics (SWAT) nga gidestino sa Motorcycle Response Unit (MRU). Kay bahinon pa man og tulo ka shift, tag-napulo ka MRU personnel ang magpatrolya sa usa ka higayon.

Apan nabantayan nako nga magkuyogay man ang mga 10 ka MRU personnel kon magpatrolya. Dili ba mas nindot kon magtinagutlo lang unta sila pagpatrolya, unya kon dunay dinagko nga alarma moapas lang ang uban.

Sa ingon niini nga paagi, daghang mga dapit nga mapatrolyahan sa usa ka higayon kay imbes usa lang ka team, mahimo na man nga tulo ka grupo ang magpatrolya sa usa ka shift.

Human nila’g responde sa alarma, magbuwag-buwag na usab ang mga sakop sa MRU, mobalik na usab sila nga magpatrolya og tinagutlo. Maayo unta kon tun-an kini ni Cebu City police director Melvin Ramon Buenafe.

Pero nindot kaayo tan-awon nga kon dunay alarma, maglumba ang mga sakop sa MRU nga moresponde. Sama sa miaging Dominggo sa gabii, naglumba ang mga MRU personnel pagresponde sa alarma didto dapit sa M.J. Cuenco Avenue.

* * *

Mora’g midaghan karon ang mga motorista nga nagtaud og commemorative plate  nga “PNP 111” sa ilang mga sakyanan. Akong balikon nga dili kini illegal apan ayaw kuhaa ug ayaw taboni ang inyong plate numbers sa atubangan.

Kon ganahan gayud mo nga magbutang niana nga mga commemorative plate, ayaw itabon ug ayaw ipuli sa original plate.Ang lagda sa Republic Act 4136 naglatid gayud nga ang sakyanan kinahanglan nga adunay plate numbers atubangan ug luyo.

Nasayud ko nga negosyo sa pipila ka tawo kining pagpamaligya niining commemorative plates. Dili kini illegal basta aprobado lang sa Land Transportation Office (LTO) unya dili itabon sa original plate.

Kon ang commemorative plate ra nga “PNP 111” maoy makita sa atubangan, maisip kini nga hinambugero aron ingnon nga polis ang tag-iya. Nasayud ko nga dili mga polis ang kadaghanang tag-iya niini nga mga sakyanan.

Pananglit masakpan mo sa checkpoint, makabayad gayud mo og P5,000 nga multa ug anugon kaayo ang maong kantidad. Ang inyong buhaton itupad ra ang commemorative plate sa original plate sa sakyanan.

Nalipay ko kay dunay uban nga mga tag-iya’g sakyanan nga migamit og “NBI-75” nga commemorative plate apan ila ra nga gitupad sa original plate, apan ang uban pabiling nagmagahi sa ilang ulo.

Duna sa’y uban nga ang plate numbers gitaptapan og “dark” kaayo nga bildo. Nganong taptapan man gayud ninyo ang plate numbers sa inyong sakyanan? Duna mo’y binuang?

* * *

Maayo baya ang gihimo sa mga opisyal sa City Hall nga sukdon nila ang kahibalo sa mga bata nga moaplay pagka “city scholars” aron sutaon unsa ang kurso nga haum kanila.    

Dunay ubang mga ginikanan nga wala makagusto kay ngano man kuno nga pagbut-an man ang ilang anak unsay kurso nga kuhaon. 

Kon ang bata gud hinay-hinay ra og pangisip, tabla ra og mausik ang kwarta sa kagamhanan nga gastohon sa kurso nga dili kaayo nila masabtan.

Matud pa bitaw sa akong eldest daughter nga daghan kaayo sila nga mikuha sa kurso nga architecture, apan nag-anam og kagamay kay ang uban namalhin og kurso kay dili makasugakod.

Sa akong giingon nga kon pugson gayud nga sila mokuha sa kurso nga dili kaayo nila masabtan, hayan mausik ra ang gasto sa ilang pagtungha kay dili man nila magamit.

Kadaghan sa akong nahibaw-an nga migradwar og kurso nga upat ka tuig apan tan-awa, lahi ang trabaho nga ilang gisudlan. Sa ato pa, sayop ang ilang pagtimbang-timbang.

Aw gradwado gayud hinoon, adunay diploma nga magpakita nga nakahuman sa kurso apan posible nga dili kaayo sila makasugakud. Pareho ra sa uban nga mitapos sa pagka abogado apan kutob ra sa pangnotaryo og dukomento.

***

Email: [email protected]