Aron dili maglibog ang publiko ug ang kadagkoan sa Department of Environment and Natural Resources (DENR) mas labing maayo nga iklaro sa developer sa giplano nga Ciudad Project nga duna g’yud sila’y mga kahoy nga pamutlon diha sa ilang project site.
Bisan ako dili man motoo nga walay mga kahoy nga maputol diha sa kapin sa duha ka hektareya nga luna nga anha tukora ang mga commercial buildings nga maglangkob sa Ciudad Project.
Ang gipasabot ni Jonji Gonzales, ang spokesman sa Fifth Avenue Property Development Corporation, mao nga dunay mga kahoy nga maputol pero dili kanang mga karaan nga kahoy.
Miingon si Jonji nga kon aduna may mga karaan nga kahoy nga apektado sa pagtukod og mga commercial buildings, ilang paningkamotan nga kini maibot ug ikatanom pagbalik sa laing dapit.
Kadtong mga kahoy nga magkinahanglan og permit sa DENR ang pagputol, dili nila putlon kon wala pay permit. Gipasabot ni Jonji nga ang mga kahoy nga ilang putlon mga ordinaryo ra nga kahoy sama sa mansanitas, kaimito ug uban pa.
Buyno, gipasalig man hinoon sa mga opisyal sa Environmental Management Bureau nga huwaton nila nga maresolbar ang kaso nga gipasaka ni Tommy kanila usa sila mohimo’g sunod nga lakang.
Si EMB-7 director Fernando Quililan miingon nga tungod sa wala kaayo maklaro nga pamahayag gipasakaan sila’g kaso ni Congressman Tommy Osmeña.
Wala gayud motoo si Osmeña kay imposible matud niya nga magtukod og mga dagko nga commercial building diha sa project site nga walay kahoy nga maapektahan.
Matud ni Tommy, “Tell that to the dead marines.”
Ang hepe sa EMB-Environmental Impact Assessment division nga giapil pagkiha ni Tommy angay usab nga mobantay pag-ayo kon ang developer sa Ciudad Project motuman ba gayud sa gilatid nga lagda kana kon moisyu gayud sila og Envoronmental Compliance Certificate.
Ang City Traffic Operations Management (CITOM) angay usab nga mohatag sa ilang baruganan kon mograbe ba kaayo ang traffic diha sa Mariano Cuenco Avenue kon anaa na ang Ciudad Project.
Nabalaka man gud si Tommy nga mograbe pag-ayo ang problema sa trapiko dihang lugara. Wala malilong kanato nga panahon sa “peak hours” gikan sa sayo nga hapon hangtud na sa gabii, ug sa buntag, grabe kahoot ang mga sakyanan diha sa Salinas Drive ug sa Mariano Cuenco Avenue.
Angay gayud lagi unta nga palapdan ang maong karsada apan ang kagamhanan wala pay budget alang sa bilyon-bilyon ka pesos nga gikinahanglan aron ibayad sa mga yuta nga apektado sa pagpalapad sa karsada.
Daghan na man gud kaayo ang atua manimuyo sa Talamban ug kanait nga mga barangay mao nga maghuot ang mga sakyanan. Basi gud sa statistics sa Land Transportation Franchising and Regulatory Board, ang Talamban ug ubang kanait nga dapit maoy labing daghan og mga PUJ nga nagbiyahean.
Ang Hernan Cortes Avenue magamit usab unta nga “alternative road” alang niadtong mga sakyanan nga mopaingon sa Talamban ug kadtong gikan didto nga moari sa dakbayan, apan utro pa man ang maong karsada nga kanunay’ng makasinati og traffic congestion kay gamay man kaayo.
* * *
Tan-aw nako dili makiangayon ang presyo sa yuta nga buot ipabayad sa Kapitolyo ngadto sa nag-ukopar sa ilang luna diha sa barangay Busay. Giusa ra man nila ang presyo nga tag P3,300 ang matag metro-kwadrado.
Nagpasabot kini nga swerte kadtong tag-iya sa yuta nga anaa daplin sa karsada og alkanse kadtong tag-iya sa luna nga tua mahimutang sa suok na kaayo nga apil pa gani ang pangpang.
Gipasaligan hinoon ni Mayor Michael Rama ang mga sakop sa Skyview Park Homeowners Association tabangan sila pagsulbad sa ilang problema. Angay nga tukion kini sa mga opisyal sa Kapitolyo ang maong punto.
Kon dili masulbad, matud sa ubang lumolupyo nga tua sa kinaubsan ang luna nga pagka swerte sa duha ka fiskal nga bag-o lang nakapalit og pwesto daplin sa karsada.