Suholan sa buses

Wa diay himoa ang lagda aron lang pakatulgon.Gipakaingon nako nga magpabilin ra sa papel ang kamandoan sa pagtakda og regular nga suholan, paghatag og mga benepisyo ug pagpatigbabaw sa katungod sa pamuo sa mga drayber ug konduktor sa buses.Kay human sa kusganong pagsupak sa bus operators, wa nay laing nadunggan mahitungod sa lagda.

Gipahibawo sa Land Transportation Franchising and Regulatory Board (LTFRB) ang pagkaumol sa mga lagda niadtong Enero ning tuiga.Gitataw ni LTFRB Chairman Jaime Jacob nga pormal nang tapuson ang karaang sistema pagbayad og komisyon sa mga drayber ug konduktor sa bus sugod sa Enero 16 ning tuiga.

* * *

Nahuman na lang ang Enero, way nahitabo.Nagpabiling komisyon ang bayad sa mga drayber ug mga konduktor sa mga bus.Nagpadayon ang mga drayber paghimong mas paspas sa ilang dagan.Aron nga madugangan ang tuyok sa ilang mga ruta, uban ang panghinaot nga mas daghan ang ilang mga pasahero, mas dako ang ilang kita ug madugangan ang madawat nilang komisyon.

Wa nay ek ang kadagkoan sa LTFRB.Gipasa ang responsibilidad sa pagpatuman sa lagda ngadto sa Department of Labor and Employment (Dole).Ang kasibaw sa pagsupak sa bus operators gitubag sa makabungog nga kahilom gikan sa hingtungdang mga buhatan sa gobyerno.

* * *

Hangtod nga nitingog si Labor Secretary Rosalinda Baldoz.Matud niya ang mga drayber ug mga konduktor sa Metro Manila maoy unang makadawat sa regular nga suholan ug mga benepisyo sa Pebrero 1 ning tuiga.Gipahibawo ni Baldoz nga naluwatan na niya ang Department Order No. 118-12, series of 2012, nga nag-umol sa rules and regulations nga moduma sa pagtrabaho sa mga drayber ug mga konduktor sa buses.

Gipasabot ni Baldoz nga igo lang niyang gigamit ang gahom sa National Wages and Productivity Commission (NWPC) sa pagtakda sa minimum nga suholan sa nagkalainlaing industriya.Matud ni Baldoz madawat na unya sa mga drayber ug mga konduktor sa buses ang mga benepisyo sa PhilHealth, Social Security System (SSS) ug Pag-ibig.

* * *

Kanus-a man makatilaw sa mga benepisyo ang mga drayber ug mga konduktor sa buses sa Sugbo ug Central Visayas?Sa Hulyo karong tuiga, segun ni Baldoz.Gipahigayon nang Dole 7 Regional Director Gloria Tango ang konsultasyon sa nagkalainlaing sektor sa Sugbo ug sa rehiyon mahitungod sa mga lagda.

Hinaot nga mapatuman suma sa gitakda ang mga lagda.Nga naghatag sa mga drayber ug mga konduktor og security of tenure.Sa ato pa, matangtang lang sila pinasikad sa makiangayon nga mga hinungdan nga gitakda sa Labor Code.

Ang mga drayber ug mga konduktor may katungod na sab nga marepresentahan sa komitiba.Nga maoy motakda sa makiangayong suholan, mga oras sa trabaho ug dugang benepisyo base sa maayo nilang performance.

* * *

Email:[email protected]