Diin gikan ang inpormasyon?

Sa sunod nga higayon, mas maayo nga magmatngon na si Kongresista Tomas R. Osmeña pagdawat og mga inpormasyon kay posible nga dili tinuod ang uban niya nga madawat nga kasayuran ug gitumong lang aron pagdaut kaniya.

Sama sa giingong pagputol na sa mga kahoy diha sa dapit nga giplanohang tukoran sa Ciudad Project, namatud-an kini nga dili tinuod ug sa akong tan-aw nakahatag hinoon og dili maayo nga dungog.

 Posible tingali nga ang mi-report ni Tommy nakakita lang niadtong mga pinutol nga kahoy nga gipundok daplin sa Mariano Cuenco Avenue nga sakop sa barangay Apas ug nagtoo na kini nga ang maong mga kahoy giputol gikan sa project site.

Tungod niini, nahukman ni Tommy ang pagpasaka og kaso batok sa duha ka opisyal sa Environmental Management Bureau (EMB) sa kapakyas nila pagsanta sa mao nga kalihukan.

Apan nahibaw-an nga wala g’yud diay mga kahoy sa proposed project site nga gipangputol. Tiaw mo karon, nahasol na si Tommy sa paghikay sa maong kaso, ug ang mga opisyal sa EMB-7 mahasol usab pagtubag niini didto sa Ombudsman.

Ambot og nakahinumdom ba si Tommy nga kaniadto nabiktima usab siya sa sayop nga inpormasyon nga miabot kaniya dihang iyang gibutyag sa media nga si Cebu Governor Gwen Garcia dunay balay diha sa Maria Luisa Estate Park, apan wala diay.

Ang mga hingtungdang opisyal sa EMB hinoon mipasalig nga ang pagpasaka kanila og kaso dili makapausab sa ilang baruganan kon angayan ba o dilinga hatagan og Environmental Compliance Certificate (ECC) ang Ciudad project.

* * *

Maayong balita kay ang mga opisyal sa Yokohama City, Japan mopadala og ilang experts dinhi sa Sugbo aron pagtabang sa dakbayan nga mapalambo nato ang atong solid waste ug water waste management.

Kalamboan kini nga nakuha ni Mayor Michael Rama sa pag-adto niya sa Japan sa milabay’ng semana. Gitataw sa mga opisyal sa Yokohama nga tungod kay ang dakbayan sa Sugbo usa man ka mauswagon nga dapit sa Pilipinas, natural g’yud nga makasugat kini og problema.

Kini maoy rason nga kinahanglan ang maayo nga urban development management, traffic management, waste management ug ang mga environmental protection measures.

Basi sa kasaysayan, ang Yokohama City kaniadto nakasugat usab og susama nga mga problema nga nasinati karon sa mga opisyal ug sa katawhan dinhi sa dakbayan sa Sugbo.

* * *

Akong daygon ang kapolisan dinhi sa dakbayan sa Sugbo kay nakahimo sila og maayong kalampusan pagpakunhod sa krimen kaniadtong miaging tuig apan wala lang kaayo mahatagi og tukmang pagpasabot.

Si Cebu City police director Melvin Ramon Buenafe mihatag kanako sa crime statistics nga gikan sa Police Regional Office-7 ug nasabtan nako ang dako nila nga kalampusan.

Tiaw mo nga napaminus sa mga polis dinhi sa dakbayan og kapin sa 3,000 ang kaso kaniadtong 2010. Gikan sa 8,565 ka kaso sa maong tuig napakunhod nila kini ngadto na lang sa 5,801 sa miaging tuig.

Kon imong tan-awon pag-ayo ang statistics, samtang ang dakbayan sa Sugbo mao tuog ang labing taas og crime volumes, apan mao usab kini ang nakahimo og maayong lakang pagpakunhod sa mga krimen.

Dili man ikahibulong nga taas ang krimen dinhi sa dakbayan kay kapin na sa 800,000 ang atong mga lumolupyo ug panahon sa adlaw daghan usab ang mga gikan sa laing dapit nga moanhi kay magtungha ug magtrabaho, mosuroy sa mga department stores.

Nakaingon ko nga angay silang daygon ang kapolisan kay bisan kuwang ang ilang gidaghanon (kapin lang sa 900) nga unta basi sa police-to-population ratio, angay unta ngaang dakbayan sa Sugbo adunay labing minus 1,500 ka polis.

Sa mga highly-urbanized city sama sa dakbayan sa Sugbo, kinahanglan unta nga sa matag 500 ka lumolupyo dunay usa ka polis. Kay 800,000 man ang lumolupyo sa dakbayan, angay unta nga ang Cebu City Policfe Office dunay 1,600 ka polis.