Gun Smuggling

Nagtoo g’yud ko nga may mga shipment sa mga “chop-chop” nga armas nga nakalusot na sa atong pantalan samtang ang uban posible nga nagpaingon pa dinhi sa Sugbo.

Nasakpan dinhi dili pa dugay ang gipayuhot unta og mga pyesa sa lainlaing matang sa armas ug gani naalarma niini ang mga opisyal sa US Home Security Department kon ngano nga nalutsan man sila kay gikan man sa ilang nasud ang kontrabando.

Sa akong pagsabot, gisundog sa mga gun smugglers ang gihimo sa mga tigpayuhot og mga segunda-mano nga sakyanan nga ilang buwag-buwagon ang pagpadala aron dili masakpan.

Dili iponon sa usa ka shipment ang mga pyesa apan kon mangabot na ang tanang kargamento mahimo na kining tibuk-on. Giunsa pagkasakop adtong mga pyesa sa armas diha sa pantalan dili pa lang dugay?

Ang sulod sa container van nga dunay serial No. NYKU 5962407 gideklarar lang nga ordinaryong kagamitan sa balay apan dihang ang mga sakop sa X-ray Inspection Project (XIP) misusi niini pag-ayo mga alas 6 sa gabii niadtong Nobiyembre 10 ilang nasakpan nga may sulod kini nga mga motorsiklo.

Human buksi ang container van, nadiskobrehan ang daghang pyesa sa armas, mga bala nga giapil sa ubang kagamitan.

Ang report nagkanayon nga ang kargamento gikan sa California, USA, ug ang nag-broker niini mao ang usa ka “Dodong.”

Diha-diha si Ronald Dadole sa XIP- Cebu Field Office mihukom nga mangayo’g Alert Order sa opisina ni Customs District Collector Ronnie Silvestre aron mapugngan ang pagpagawas sa kargamento.

Apan kay gabii na man ang XIP-Cebu Field Office mipugong lang sa “gate pass” sa maong kargamento.

Pagka buntag sa Nobiyembre 12, ang XIP mipadala og Alert Order request sa opisina ni Silvestre, apan wala danti’g oras ang opisina sa Customs Collector nakadawat og susama nga request gikan sa Customs Police Division sa mao gihapong kargamento.

Sa ato pa, gusto usab ang Customs Police nga maapil sa dungog. Dia dinhi karon ang isyu kay nakadungog ko’g report nga nahiubos ang ubang sakop sa XIP kay giisyuhan man gihapon ni Silvestre og Alert Order ang Customs Police.

Misamot ang ilang kahiubos kay sa uwahi nga mga report, gikataho nga wala na g’yud gi-recognize ang XIP nga maoy orihinal nga “alerting unit” sa mga nasakmit nga butang kontrabando. Paita uy!

Uy ngano man kini “my friend” Collector Silvestre? Dunay mga kauban nimo diha sa Customs nga nakapangutana kon nahadlok ka ba kuno kang Customs Police chief Rolando Cascolan.

Ang lagda mao nga kon aduna nay “unit” nga miaplay og Alert Order sa kargamento nga gitoohang kontrabando, wala nay laing “unit” nga hatagan pa og Alert Order.

Kay ang “gate pass” ug ang ubang dukomento sa kargamento gigunitan na man sa XIP angay unta nga dili na tagdon pa ni Collector Silvestre ang request sa Customs Police. Dili kita makabasol kon mahiubos ang mga sakop sa XIP.

***

Laing container van SN No. KKFU 1510814 nga gikan sa California nga gideklarar nga mga ginamit nga “metal-wood working machine” apan pag-X-ray sa mga sakop sa XIP nasakpan nga daghang mga gibungkag nga motor ang sulod.

Mi-apply na usab ang XIP og Alert Order request sa opisina ni Silvestre adtong Nobiyembre 14. Giaprobahan kini sa Collector. Ang kopya niini giapod-apod sa mga opisina aron nga walay “overlapping.”

Apan diha na usab ang Customs Police. Ang akong informer diha sa Customs nagkanayon nga ang petsa sa request gihimo pa nga Nobiyembre 11 aron ipatoo nga mas una ang Customs Police nga mi-apply og Alert Order.

Gipatubag nako niini si Collector Silvestre apan wala motubag. Ambot ngano kaha.

Nahukman nako nga tukion kining maong isyu kay naglambigit man gud kini og armas. Angay’ng daygon ang mga sakop sa XIP nga nag-inabtik sa ilang trabaho ug nasakpan ang pagtinguha pagpayuhot og mga “chop-chop” nga mga armas dinhi sa ato.

Ang pangutana. Nganong mosakay man g’yud ang Customs Police sa kalampusan sa uban? Paningkamot mo og inyo aron walay mahiubos. Kadaghan diha nga angay’ng trabahoon kon gusto mo.