Arroyo sa VMMC

  Veterans Memorial Medical Center, Quezon City—Higpit nang seguridad dinhi pangandam sa pagbalhin ni kanhi presidente Gloria Arroyo gikan sa St. Luke’s Medical Center sa Taguig City.  Ang mga pasyente ug mga kawani sa VMMC moagi og labing menos tulo ka checkpoints sa di pa makaabot sa ilang destinasyon ning 54.9 ka ektarya nga tambalanan samtang nia pa dinhi si Arroyo.

 Ang VMMC natukod tungod sa pagtinabangay sa Pilipinas ug Estados Unidos paghatag og libreng pangalagad ug tambal sa mga beterano ug sa ilang mga pamilya.  Silang US President Harry Truman ug kanhi presidente Elpidio Quirino ang nimando pagpabarog ning higanteng bantayog pagpasalamat sa kaliboan ka Pilipinhong mga sundawo nga nakigsangka uban sa Amerkanhong puwersa sa ikaduhang gubat sa kalibotan.

* * *

 Ang P848 milyones nga tinuig nga budget sa VMMC di paigo sa dakong gasto sa pagpabilin ni Arroyo dinhi.  Gihangop ni Dr. Nona Legaspi, ang tagduma sa VMMC, ang pasalig ni DILG Secretary Jesse Robredo nga abaghon sa Malakanyang ang tanang gasto.  Hangtod nga molig-on nang panglawas ni Arroyo.  Kanus-a ipabalhog na siya sa Southern Police District headquarters.

 Ang VMMC nag-atiman og hangtod 350 ka pasyente matag adlaw.  Duha ka semana ang labing taas nga pagpabilin sa mga pasyente dinhi.  Mas daghan ang outpatient cases kay libre ang tanang konsultasyon ug tambal alang sa mga beterano ug sa mga sakop sa ilang pamilya.

* * *

 Ang mga beterano ug ilang mga pamilya sa Sugbo ug ubang probinsiya gawas sa Metro Manila di kinahanglan nga moanhi aron makapahimus sa samang mga benepisyo.  Ang Philippine Veterans Affairs Office (PVAO) nipasalig nga makapahimus sila sa P800 matag adlaw nga hinabang hangtod 45 ka adlaw matag tuig sa tanang 250 ka tambalanan nga accredited sa PVAO.

 Nangayo ang PVAO og pundo gikan sa Kongreso aron itukod og Veterans hospitals sa Kabisay-an ug Mindanao.  Gibayran sab sa PVAO ang usa ka tuig nga premium sa mga beterano aron makapahimus sila sa dugang mga benepisyo gikan sa Philippine Health Insurance (PhilHealth).

* * *

 Si Dr. Legaspi gitudlo ni Presidente Noynoy Aquino sa VMMC sa niagi lang tuig.  Karon pa lang gitataw na niya nga higpit nga ipatuman ang mga lagda sa pagpuyo ni Arroyo sa iyang tambalanan:

 ·Di makahupot og cellular phone si Arroyo sud sa presidential suite, bisan sa pangangkon nga gikinahanglan ni niya aron makapadayon pag-alagad sa mga molupyo sa iyang girepresentahan nga ikaduhang distrito sa Pampanga;

 ·Di makahupot si Arroyo og laptop nga may internet connection, busa di siyang ka-chat ni kaggamit sa VoIP; ug

 ·Bisan magda si Arroyo sa iyang mga doktor sa St. Luke’s, ang mga doktor sa VMMC mohiling sa kahimtang sa panglawas ni Arroyo og moluwat og medical bulletin kausa matag semana.  

* * *

Email:  [email protected]