Bilib ni Heidi

Panglao, Bohol—Hadlok sab siyang mamatay.  Mao ni kumpisal ni Heidi Mendoza, ang auditor nga isog nga niutingkay sa labing dagkong mga anomaliya sa gobyerno, nga napugos pag-resign human sa 22 ka tuig nga pag-alagad sa Commission on Audit (COA) dihang gibudhian sa iyang kaugalingong kadagkoan.

Si Mendoza niduaw sa Bohol isip pinasidunggang mamumulong sa ika-50 nga anibersaryo sa DYRD sa Bohol Chronicle Radio Corp. (BCRC).  Matud ni Mendoza mas nahadlok siya nga pamatyon ang mga sakop sa iyang pamilya.  Apan ang hugot niyang pagtuo sa Labawng Makagagahom maoy nakapadasig niya pagpadayon paghupot sa paglaom nga masakpan ug masilotan ang labing kukhan nga mga kawatan,

***

Sa Sugbo unang nakabatyag si Mendoza sa kagamhanan sa pagtuo.  Sa Sugbo gihusay ang kasong pagpangawkaw nga iyang gipasaka batok ni kanhi gobernador Zacaria Candao sa Autonomous Region sa Muslim Mindanao.  Nga iyang nasakpan nga nangawat og P21 milyones sa buhis sa katawhan.

Nahugno si Mendoza sa iyang pagtambong sa husay sa Sugbo.  Sa bisperas sa husay, giingnan siya sa prosecutor nga di na lang motunga kay di mahinayon ang husay.  Apan nitunga gihapon siya.  Tuod man, giawhag sa prosecutor ang Sandiganbayan pagsuspenso sa husay.  Nakugang na lang silang tanan dihang nibarug si anhing Presiding Justice Francis Garchitorena ug niawhag sa prosekusyon nga ipasuspenso si Candao, inay ang husay.

***

Di sayon ang imbestigasyon ni Mendoza sa mga transaksiyon ni Candao sa ARMM niadtong 1993.  Nagsabak siya niadtong higayona sa bugtong niyang anak nga babaye.  Gibabagan siyang Candao pagda sa mga kopya sa vouchers nga nimatuod sa anomaliya.  Napun-an ang iyang kalbaryo dihang ang iyang labaw didto pusta ni Candao.

Samang pagbudhi ang iyang nahiagoman sa pagsusi sa kabtangan ni Heneral Carlos Garcia.  Human ni-resign si kanhi Ombudsman Simeon Marcelo, giingnan siya sa tsirman sa COA sa di na lang pagpasaka sa kaso ug gipapili siya og bag-ong assignment.  Gipili ni Mendoza ang pagbiya sa COA.

***

Gikuha dayon si Mendoza isip consultant sa Asian Development Bank (ADB).  Nga nihatag niya og $500 dolyares matag adlaw (dako kaayo kon itandi sa P700 matag buwang suweldo pagsugod niya sa COA).  Nagsugod na unta si Mendoza ug ang iyang pamilya pagpahimus sa bag-o nilang kaharuhay, dihang nabisto ang pag-areglo ni kanhi Ombudsman Merceditaas Gutierrez sa kasong plunder ni Garcia.

Gitalikdan ni Mendoza ang kaharuhay sa ADB ug nipili pagsulti sa kamatuoran.  Gitulisok siya sa iyang anak nga lalaki sa pagsakripisyo sa seguridad sa tibuok pamilya.  Wa mahunong ang pagpanggukod bisan gitudlo na siyang Pres. Noynoy Aquino isip komisyonado sa COA.  Sa adlaw sa iyang pagpanumpa, nikatap ang suwat nga gipanamastamasan sa iyang bana ang ilang anak nga babaye.  Niangkon si Mendoza nga nabuntog niya ang tanang pagsuway tungod sa hugot niyang pagtuo.  

***

Email: [email protected]