Hulga sa self regulation

Ang kapakyas sa Kapisanan ng mga Brodkaster ng Pilipinas (KBP) pagsilot sa di niya sakop nga mga sibyaanan nga gipasanginlang nakalapas sa mga lagda sa live coverage sa hostage crisis sa Luneta niadtong Agosto 23, 2010 nakapatumaw sa mga pagsaway nga ang KBP inutil sa iyang tahas pagbantay ug pagpalambo sa industriya sa pagpanibya.

 Ang kamatuoran mao nga way gahom ang KBP pag-imbestigar sa mga pasangil batok sa mga sibyaanan nga di sakop sa kahugpongan.  Di sila mapugos sa KBP pagtubag sa mga pasangil batok nila ni pagsumiter og mga ebidensiya nga gikinahanglan sa imbestigasyon.  Busa makuwestiyon ang kamakiangayon sa KBP kon mangahas pag-apil pagpahamtang og silot sa di niya mga sakop.

***

 Nakadasig ni sa mga sibyaanan nga di sakop sa KBP sa pagpakauwaw sa kahugpongan ug pagbugalbugal sa self-regulation.  Gipasanginlan nila ang KBP nga bunga sa diktadura ni kanhi presidente Ferdinand Marcos ug busa way katungod sa pagpahamtang sa iyang mga lagda ngadto sa mga sibyaanan ug mga magsisibya.  Pulos nangangkon nga gilugpitan sila sa KBP.

 Usa sa mga sibyaanan nigawas sa KBP kay ganahan nga mosibya og mas daghang commercials kay sa 18-minutos-matag-oras nga limitasyon nga gipahamtang sa Broadcast Code sa KBP.  Laing sibyaanan nigawas kay gustong mosibya sa bola sa sugal, nga higpit nga gidili sa samang Broadcast Code.

***

 Akoy gikuyawan sa ilang sinultihan.  Isog kaayo sila ron kay si Presidente Noynoy Aquino, bisan sa padayong pagdumili pagdason sa Freedom of Information (FOI) bill, wa man igdungog nga may ambisyon sa pag-apiki sa media, print o broadcast man.

 Apan kon si Marcos o si kanhi presidente Gloria Arroyo pa ang nagtungkawo sa Malakanyang, segurong panington sila og bugbog.  Di malalis ang ngil-ad nga implikasyon kon ang gobyerno magsugod na og panghilabot sa media.  Angay silang magpasalamat nga ang National Telecommunications Commission (NTC), nga maoy mo-regulate sa mga sibya anan nga di sakop sa KBP, nalinga pa sa paghusay sa away sa Globe ug PLDT ug sa way kinutobang pagpangita sa nawagtang nga load sa prepaid subscribers.

***

 Ang KBP nilahutay sa diktadurang Marcos ug sa nisunod nga mga pamunoan.  Seguro kong makalahutay kini sa gilab-as nga kampanya pagpahiyos sa iyang kapuslanan.  Mahimo tuod nga mobiya sa KBP ang mga sibyaanan kon di na sila gustong motuman sa iyang lagda.  Apan nganong nagpabilin man ang kinabag-an?

 Kini tungod kay ang 18-minutos-matag-oras nga limitasyon di pagpanlugpit.  Kon dili paglikay sa eskandalo nga mas daghan pa unya ang commercials kay sa unod sa mga programa nga masibya.  Abunda og leksiyon ang kasaysayan sa pagsalikway sa publiko sa mga sibyaanan nga cluttered ang programming.  Ug ang pagdili pagsibya sa resulta sa sugal makaayo sa kinabag-an.  Gawas sa pipila nga mopalabi sa panguwarta kay sa pagpanalipod sa katawhan, labi na sa kabataan.  

***

Email:  [email protected]