No. 1 target

Kon nagtuo si Cebu City Police Office (CCPO) Director Melvin Ramon Buenafe nga ang pagkamatay sa tulo ka gidudahang mga tulisan nga nakigpinusilay sa iyang mga sakop niadtong Lunes sa buntag makapaturok na og kahadlok sa kasingkasing ug panghunahuna sa ubang mga tulisan gikan sa Ozamis City, mahimong nasayop siya.

 Uban sa nadawat nga kasayuran gikan sa Ozamis ug ubang bahin sa Mindanao sa mga ngan sa suspetsadong mga tulisan nga nahilambigit sa nabulilyasong tulis sa teller sa Chinabank sud sa Robinson’s Place duol sa Fuente Osmeña mao ang pasidaan:  Nga ang nahibiling mga tulisan mobalik sa Sugbo aron pagpanimawos sa kamatayon nilang Melencio Quiapo ug kaubanan pinaagi sa pagtumba sa dagkong mga opisyal sa kapolisan.

* * *

 Usa sa gitumbok nga target mao si CCPO Intelligence Chief Romeo Santander.  Nga maoy nakadawat sa pasiunang kasayuran sa plano sa pundok nilang Quiapo ug Jun-Jun Cabando pagpanulis dinhi sa Sugbo usa ka buwan sa wa pa ang aktuwal nilang paglihok.  Si Santander ang nisumpay-sumpay ug nihubad sa hilaw nga kasayuran, nipasidaan sa mga bangko ug ubang mga patigayon ug ni-alerto sa nagkalainlaing units sa kapolisan.

 Maong masabot nganong si Santander ang nag-una sa listahan sa pagdumot sa suspitsadong mga tulisan.  Matod ni Santander andam siya pakigsakbang sa dakong grupo sa mga kriminal.  Nanghinaot lang nga di maduhig ang mga sakop sa iyang pamilya.

* * *

 Laing rason nganong gisigehan ron og balikas sa suspetsadong mga tulisan si Santander:  Ang iyang mapailubon ug determinado nga imbestigasyon ang nakatultol sa kapolisan sa una ug bugtong letrato ni Cabando, ang gipasanginlang pangu sa pundok nilang Quiapo ug kaubanan.

 Ang profile picture sa Facebook account ni Cabando giilisan sa letrato sa action star nga si Victor Neri pila ka buwan ang nilabay kay, segun ni Cabando, init siya kaayo sa mga polis.  Kasarangang imbestigador motahan na unta ug mangita og laing tinubdan sa kasayuran.  Apan mapailubong gi-utingkay ni Santander ang tanang letrato sa FB account.  Hangtod nga iyang natsambahan ang hulagway ni Cabando nga dako kaayo og ngisi.  Nga nagbansiwag na sa mga pamantalaan ug naapud-apod na sa tanang units ug presinto sa kapolisan.

* * *

 Mahimo untang dasonan na lang ni Santander ang mga huhungihong, nga makapasamot kahumot sa kapolisan, nga namatay na si Cabando tungod sa kagrabe sa iyang samad ug gitambog nang patayng lawas sa dagat.  Apan wa niya isalikway ang sulti sa mga molupyo sa Compostela nga tanos na og linakwan si Cabando dihang gikuha og sakyanan pagka gabii na niadtong Lunes.

 Nakahipos sab og kasayuran si Santander nga ang pundok sa Ozamis nagpada og doktor ug namalit og mga tambal ug kahimanan sa Sugbo aron pagluwas ni Cabando.  Kumbinsido si Santander nga mas dako ug mas organisado ang grupo kay sa una nilang gituohan.  Apan di siya mosibog nila.  

* * *

Email:  [email protected]