Defensive driving

Kon magtarong lang ang mga drayber, malikayan man g’yud ang aksidente bisan pa og ang mga trak de karga pasakyan og daghang tawo.

 Mosagop ko sa argumento ni Mayor Michael Rama nga ang mga trak de karga mas luwas pa gani sakyan kon itandi sa mga motorsiklo nga gitawag og “habal-habal.” 

 Kadtong aksidente sa Barili nga nalintuwad ang trak sa basura nga giluwanan sa mga tawo nga maglubong unta og usa ka patay paingon sa lungsod gikan sa bukid posible nga malikayan kon nagmatngon pa ang drayber.

 Lugsongon ang dapit nga nahitaboan ug puno kaayo sa mga tawo ang cargo truck nga gikargahan usab sa lungon sa minatay. Angay unta nga kay bug-at man ang karga sa trak, ibutang sa siguro ug ang drayber mogamit g’yud og “low gear.”

 Ang makina moabag sa pagpahinay sa sakyanan kon maglugsong nga bug-at ang karga ug dili na kaayo angay nga tamakan sa drayber ang brake kon preno. Apan kon “high gear” ang gamiton sa drayber samtang maglugsong, sutoy ang sakyanan ana.

 Dunay ubang drayber nga magsalig lang sa brake. Kon maglugsong sila mag-high gear unya motamak sa preno. Anha diha nga hayan mobuto ang rubber cap sa brake kay mapugos man, ilabi na kon may pagka-gabok na ang goma.

 Husto si Rama nga ang angay’ng himoon, pasalmoton lang og “defensive driving lesson” ang mga drayber unya ang mga sakyanan sa kagamhanan kanunay’ng ipasusi ang iyang kalig-on.

 Kon ipatuman gud ang kamandoan ni DILG-7 regional director Pedro Noval nga dili na ipagamit ang mga cargo trucks pag-transport og mga tawo, maproblema intawon ang taga bukid.

 Kami nga mga law enforcers sa Land Transportation Office dili man gani modakop sa mga trak de karga nga tag-as og bung-bong bisan og daghang sakay basta dili lang magtungtong sa atop o maglingkod sa ali sa kilid.

                                                                        * * *

 Mas kuyaw pa nga masunog ang barko kay sa malunod kini taliwala sa kadagatan. Abi ninyo og ngano? Kon malunod ang barko unya makamao ka molangoy mahimo ka man nga mabuhi.

 Si Cebu City Councilor Edgardo Labella direyot g’yud makasakay sa fast craft nga nasunog gikan sa Bohol adtong Dominggo.

 Ang nasakyan ni Konsehal Labella mao ang barko nga nagsunod niadtong nasunog nga nag-una pagbiyahe. Gipasalamatan ni Labella ang mga opisyal sa barko nga iyang nasakyan kay sila ang nakaluwas sa ubang pasahero sa nasunog nga barko.

 Awhagon ni Labella ang iyang mga kauban sa Cebu City Council nga pasidunggan sila si Captain Camilo Debalubos, Chief Engr. Geminiano Alo ug mga tripulante ug ang tag-iya sa Sea Jet sa Aleson Shipping nga si Alex Tan sa pagsalbar nila sa kinabuhi sa mga pasahero sa kakompetensya nila nga barko.

 Angay na g’yud nga ang Maritime Industry Authority mopaspas sa ilang paghimo og pakisusi sa kaluwas sa mga barko. Ang Coast Guard angay usab nga mosusi kabahin sa Safety of Life and Properties at Sea.

 Nagpakabana g’yud si Labella sa mga barko kay usa siya sa survivors pagkalunod sa Princess of the Orient sa Sulpicio Lines pipila ka tuig na ang milabay nga nag-utaw-utaw siya sa kadagatan sulod sa duha ka gabii ug duha ka adlaw sa wala pa siya maluwas.

* * *

 Usa ka higayon, giduol ko ni The FREEMAN Editor-in-ChiefJerry S. Tundag ug miawhag nga paspasan ang pagpanakop sa mga drayber nga dili mopasiga sa suga sa ilang sakyanan samtang magdagan sa karsada panahon sa gabii.

 Ang iyang gipasabot niini mao ang mga PUJ nga nagbiyahean sa Guadalupe ug ngadto sa Labangon, agi sa Banawa. Ako siya nga giingnan nga kami sa LTO walay hunong ang pagpanakop sa maong mga drayber, apan subo lang nga ang mga CITOM enforcers magsiga lang ang mata nga magtan-aw niini.

 Dugay na kaayo ko nga nagsige og reklamo kabahin niinang mga traffic enforcers sa CITOM nga dili manakop sa mga drayber nga dili mopasiga sa suga sa ilang sakyanan.

Apan wala gihapon mausab. Kon ako pa ang opisyal sa CITOM, panid-an nako kinsa kining maong mga traffic enforcers ug akong ipataktak sa trabaho ug mangita’g lain nga makamao mopatuman sa balaod.