Tabangan ta's mayor

Angay g’yud nga daygon si Mayor Michael Rama kon matuman niya ang iyang tinguha nga ibalik ang tres metros nga bakante sa atong kasapaan.

Ang pag-ukopar gud sa “three-meter easement” gikan sa tampi sa kasapaan maoy makapalisod nga malimpyohan ang atong mga sapa kay gilahos man kini paggamit sa mga tag-iya og balay-patigayon ug tag-iya’g kabalayan.

Nindot gayud kining plano ni Rama kay ang daplin sa kasapaan mahimo na man nga malakaw-lakawan sa mga tawo, sama sa gihimo sa mayor diha sa barangay Pasil nga makalakaw-lakaw ang mga tawo daplin sa dagat.

Apan makaingon ko nga dako kaayo kini nga trabaho. Makasugat si Rama og grabeng pagsupak gikan sa mga apektado nga magpapatigayon kang kansang mga edipisyo nga gitukod lahus na sa tampi sa sapa.

Duna gani’y uban diha nga mitukod pa og edipisyo ibabaw sa kasapaan apan nahibulong kita kay giaprobahan man sa Office of the Building Officials (OBO). Mao kana nga makaduda kita kon wala ba kaha sila makadawat og dakong suborno.

Ang mga opisyal sa Barangay Santo Niño mibutang na og marka sa maigo sa “three meter easement” sa sapa-sapa nga dia molagbas sa D. Jakosalem ngadto na sa dalan Mabini lapos na sa barangay Tinago.

Kon tinud-on ni Rama ang iyang bahad paglimpyo sa three-meter easement sa kasapaan pwerteng daghana nga mga tag-iya og buildings ang manghilak. Kami hinuon sa The Freeman giandam na daan ang among building.

Gibakante na namo daan ang three-meter easement sa pagtukod sa building mao nga walay problema kon tinud-on ni Rama ang iyang plano ug gani dasigon namo siya nga dayona kini sa labing dali nga panahon nga dili pa mapupos ang imong termino mayor.

Apan tungod sa kahinay motrabaho sa mga opisyal ug kawani sa dakbayan sa Sugbo dako ang akong pagtoo nga maglisod si Mayor Rama pagtuman sa iyang tinguha atol sa unang termino sa iyang katungdanan.

* * *

Sayon ra man gud ang paglimpyo sa kasapaan kon bakantihon ang daplin niini unya mahimo pa kini nga kaagian sa mga tawo.

Kon mahawan na gud ang daplin sa kasapaan, dako kaayo ang akong pagtoo nga maikog na ang mga tawo nga molabay og basura sa sapa. Apan mao lagi, magkinahanglan kini og “political will” ug sa pagka karon wala pa kini nako makita ni mayor Rama.

Dugay man gani kaayo niya mahawani ang Belgium Street nga maoy agianan paingon sa Pasil Fish Port. Ipabalhin kuno ni mayor Rama ang pagpamaligya og mga isda gikan sa Pasil Fish Market ngadto na sa Fish Port nga nahimutang daplin sa dagat.

Apan ang Belgium Street paingon sa Fish Port gamay na kaayo tungod kay ang mga tag-iya’g balay mipalapad sa ilang kabalayan ngadto na sa karsada.

Nasiguro hinoon ko nga kon palihukon lang ni Rama ang iyang mga sakop nga karon walay klarong trabaho molampos gayud siya sa iyang tinguha.

* * *

Makatabang baya kining mga tigbaligya og mga segunda-mano nga mga butang kay makapalit man kita og barato nga kagamitan nga atong gikinahanglan.

Ang nakadaot lang kay wala man gud tumana sa atong mga opisyal sa kagamhanan, apil na sa kapolisan, ang tukmang mga lagda.

Sagad sa mga kawatan anha mobaligya sa ilang mga butang-kinawat sa mga surplus shops ug ang mga tagdumala niini mopalit ra usab dayon nga walay pagsuta kon diin kini gikan.

Ang Presidential Decree 1612 kon Anti-Fencing Law dunay mga lagda nga dili gayud angay’ng paliton dayon ang mga butang nga ibaligya kon walay kamatuoran ang nagbaligya nga iya kining butang.

Buyno, kon gusto g’yud kining paliton sa mga tagdumala og surplus shop dili nila kini ibaligya dayon ug maghuwat pa sila og 15 ka adlaw human nila kini ika-report sa kapolisan ang mga butang nga ilang pinalit.

Ang tumong niini mao nga kon dunay biktima sa kawat ug moreport sa kapolisan mahimo pa nga ma-recover ang mga kinawat nga butang.

Gawas nga walay mga permit ang kadaghanan sa mga surplus dealers dinhi sa Sugbo, wala pa gayud sila maghatagan og lista sa kapolisan kon unsa ang mga butang nga ilang pinalit gikan sa walay klaro nga tigbaligya.

* * *

Email: [email protected]