Alas batok media

Samtang nanumpa ang bag-ong mga opisyal sa Kapisanan ng mga Brodkaster ng Pilipinas (KBP) Cebu Chapter nga gipangulohan ni Atty. Ruphil Bañoc sa DYHP-RMN, dunay nitumaw nga bag-ong kontrobersiya nga mahimong hingpit nga mousab sa dagway sa industriya sa pagpanibya.  Pila ka takna sa wa pa ang pagpanumpa sa bag-ong mga tagduma sa industriya ug bag-ong accredited nga mga magsisibya, gipahibawo ang pagkasuspenso sud sa duha ka semana sa usa sa labing kontrobersiyal nga tulomanon sa bag-ong panahon.

 Di ko maghisgot og mga ngan kay karibal namong network ang hingtungdan.  Gawas pa, di ko motandog sa sibaw nga mga pagsaway batok sa programa.  Kon dili sa mas lapad nga implikasyon sa iyang pagkasuspenso.

***

 Ang mga tagduma sa programa maoy nihukom nga di ni isibya sa mosunod nga duha ka semana sugod karong Lunes.  Wa sila suspensoha sa Movie Television Review and Classification Board (MTRCB).  Nga sama sa Department of Social Welfare and Development (DSWD) ug Commission on Human Rights (CHR) naghimo og buwag nga imbestigasyon sa pasangil nga gi-abusohan ang 6 anyos nga bata nga contestant.

  Ang pagsuspenso sa programa di sab tungod sa mga pagsaway.  Kay ang tagduma ug ang sibyaanan nagdumili man pagpangayo og pasaylo.  Kay alang nila wa nila abusohi ang bata.  Nga gipabalik-balik nila pagpasayaw nga morang macho dancer samtang naghilak.

 Gisuspenso ang programa human biyai sa higante niyang advertisers.

***

 Di dihadiha dayon ang pagbiya sa advertisers.  Sama nga di dihadiha dayon nga niulbo ang kontrobersiya.  Nagsugod ang protesta batok sa programa usa ka semana human sa gikuwestiyon nga sibya dihang gi-post sa Twitter ang link sa video sa sayaw sa bata sa YouTube.

 Ang sibaw nga mga pagsaway sa Twitter dali rang nakaabot sa kalibotanong media organizations nga nagbase sa Estados Unidos ug sa Uropa.  Maong nakita sa mga haring gangis sa higanteng mga kompaniya, apil nang multinational corporations.  Ang twitterers nagkasabot sab nga pabahaan og emails ang mga tagduma sa kompaniya ug kumbinsihon nga tangtangon ang ilang ads sa programa.

***

 Bisan unsa kaadunahan ang network ug ang magsisibya, di molahutay ang ilang programa kon way advertisers.  Ang dagkong premyo ug bisan ang gasto sa pagsibya naggikan sa mas dagkong bayad sa advertisers.  Kon di mahapuhap ang namiya nga advertisers, ug kon di kapulihan og sama kadagkong advertisers, maglisod pagbalik ang programa.  Gawas kon mangayo og pasaylo.  Ug pasayluon.

 Mao nga sa sunod higayon nga may mabati ka sa radyo, o makita sa telebisyon, o mabasahan sa pamantalaan nga di mao, ayaw kahadlok sa pagreklamo.  Mahimong bungul-bungolan lang sa mga magsisibya o mga magsusuwat nga gireklamohan.  Apan kon makighiusa sa ubang mga konsumidor sa media nga susama og sentimento, mahimong madunggan sa advertisers.

***

 Email: [email protected]