Kilkil sa gradwasyon

Mga ginikanan sa mga tinun-an sa Cebu City National Science High School (CCNSHS) sa Salvador St., Labangon, Cebu City nagpakisayod nganong wa mapahamtang batok sa ilang tulonghaan ang lagda sa Department of Education (DepEd) nga nagdili sa paghimong kundisyon sa gradwasyon sa pagbayad sa tanang amotan? Matud nila gawas nga pinugos ang pagpangolekta sa bayranan gitakda pa gyud ang mga petsa pilay pasiuna nilang ibayad ug kanus-a hutdan pagbayad.

Nitiyabaw ang mga ginikanan nga napugos sila pagtakilid pagbayad sa makalilisang nga mga amotan aron nga makaapil og paso ang ilang mga anak sa gradwasyon. Pagmatuod sa ilang pangangkon, gihatagan ko nila og listahan sa tanang bayranan.

* * *

Nia ang mga bayranan nga gitakda sa Parents Teachers Association, Inc., nga nikabat og P6,150 matag tinun-an, ug ang gitakda nga mga lugway sa petsa sa pagbayad:

P2,840 alang sa yearbook (P2,190) ug photoshoots (P650) nga gipabayran niadtong Oktubre 30, 2010;

P850 alang sa career orientation (P70), plant tour (P250), retreat (P500) ug JS prom (P30) nga gipabayran niadtong Oktubre 15, 2010;

P625 alang sa family day nga gipabayran niadtong Nobyembre 15, 2010;

P1,500 alang sa graduation rites nga gipabayran niadtong Enero 5, 2011; ug

P335 sa wa nganli nga special projects nga gipabayran niadtong Enero 16, 2011.

* * *

Ang P6,150 nga bayranan wa pay labot sa PTA dues nga P1,500 matag tinun-an nga gipabayran sab niadtong Nobyembre 30, 2010. Usa sa mga ginikanan nitug-an namo nga, sukwahi sa listahan sa PTA, P1,800 ang gikolekta sa matag tinun-an sa third year alang sa JS prom. Sa ato pa, moabot og dul-an sa P10,000 ang tinuig nga bayranan sa matag tinun-an, labi na sa third year.

Di pribado ang CCNSHS. Di adunahan ang mga tinun-an ug ilang mga ginikanan. Maong may sukaranan ang mga ginikanan nga nangreklamo nga nagkalisudlisod sila pag-ayo. Kay gawas sa pinugsanay nga bayranan, gihasol pa gyud ang ilang mga bata pag-apud-apod og solicitation letters.

* * *

Hinaot nga susihon sa DepEd kining reklamo sa mga ginikanan batok sa CCNSHS. Bisan kon way bisan usa nila nga gustong magpaila. Way makabasol nila nga mahadlok nga bawosan ang ilang mga bata, labi na kon duna pay ubang mga anak nga naa pa sa CCNSHS hangtod sa mosunod nga mga tuig tingtungha.

Hinaot nga, inay mopasalipod na sab sa technicality nga wa silay mahimo kon way formal complaint, ilang panalipdan ang kabos nga mga tinun-an ug mga ginikanan. Nga gisigehan lang og ulug-ulog nga boluntaryo ang tanang bayranan ug nga ilegal ang pinugsanay nga pagpangolekta sa mga bayranan sa mga eskuylahan. Apan ang matag gradwasyon ug pagtak-op sa matag tuig tingtungha gihimong kahigayonan pagpangilkil nila.

* * *

Email: [email protected]