Kadudahan g'yud

Wala na ako mahibulong pa pagkasayod nga gidid-an na sa Department of Health ang gamay’ng ospital sa barangay Guba, dakbayan sa Sugbo, sa pagdawat og mga pasyente kay walay klaro ang serbisyo sa maong 10-bed hospital.

Matan-aw sa mga tawo nga si kanhi mayor Tomas R. Osmeña dili makalikay sa pagbasol kay siya man ang chief executive officer sa dakbayan kaniadto. Unsaon, bisan walay maayong serbisyo wala man hulipi ni Tommy ang hepe sa Cebu City Medical Center atol sa iyang termino.

Ang Guba Community Hospital maisip man gud nga “extention medical facility” sa CCMC mao nga ang hepe sa maong ospital giisip nga “immediate boss” sa mga kawani sa maong ospital.

Apan dinhi sa dakbayan, ang mga konsehal gihatagan og executive function ni Tommy kaniadto. Ang chairman sa committee on health and hospital services sa Konseho maoy gitugyanan sa mayor pagsuperbisar sa CCMC.

Ang maong konsehal maisip nga maoy “eyes and ears” ni Tommy sa kalihukan nga naglambigit sa health and hospital services. Gihatagan kini og katungod nga mohimo’g mga maayong sugyot, apan ambot unsay gihimo.

Sama ra gud sa konsehal nga gitugyanan kaniadto sa pagsuperbisar sa atong kamerkadohan, nagpabaya lang ug resulta, tan-awa ang atong mga merkado kon unsay dagway.

Adtoa ang Pasil Fish Market ug hangad sa atop niini dili ba makita nimo ang adlaw. Kon mag-uwan makaligo intawon ang mga tindera ug ang mga pumapalit.

Gihisgotan nako kining maong isyu kay natan-aw man gud nako nga daghan sa atong mga opisyal sa dakbayan ang maayo lang sa porma. Walay maayong serbisyo alang sa kaayohan sa katawhan.

* * *

Kon maghisgot kita og pagpahapsay sa atong mga aseras, labaw pa nga daw natulog ang City Hall clearing team, karon ug kaniadto. Kaniadto ang aseras sa dalan T. Padilla gikan sa eskena Sikatuna malakwan pa.

Karon dili na malakwan ang aseras tungod kay gipangtukoran na kini og mga tindahan. Ingon niini ang sitwasyon sa daghang mga karsada ug aseras dinhi sa atong dakbayan.

Ang clearing team o demolition team sa City Hall wala gayud mohimo’g aksyon sa mga tindahan nga bag-o pa nga gipangtukod. Ang problema gud diha mao nga kon anaa na ang mga straktura maglisud na kamo pagguba.

Usa sa ehemplo niini mao ang Salvador Street sa Labangon. Lapad kaayo ang sidewalk sa maong karsada apan gisigehan na karon pagtukod og mga tindahan.

Ayaw ko’g ingna nga walay mga sakop sa Squatters Prevention Encroachment Elimination Division (SPEED) nga nakakakita sa maong talan-awon.

Kining maong sitwasyon makita usab nimo sa ubang mga aseras dinhi sa dakbayan.

Tan-awa nang aseras diha sa eskena Legaspi ug Manalili, atbang anang karaang building, ang aseras hingpit na g’yud nga natak-opan kay gilakip na paghimo nga kabahin sa building. Tarong ba gud na?

Kinahanglan pa ba gud nga atong kuhaon si Bayani Fernando aron maoy tahasan sa pagpangguba sa mga illegal structures nga gitukod diha sa mga aseras?

No, dili na kinahanglan nga paarion pa nato si Bayani Fernando. Ang angay’ng buhaton ni mayor Michael Rama mao ang pagpursiger sa SPEED nga motrabaho nga walay kukahadlok. Mag-unsa man kanang pagtakin-takin nato og armas unya dili diay kita motrabaho.

* * *

Ang higala nako nga si Noel “Nonoy” Artes, ang hepe sa City Hall clearing team, maingon nako nga wala nagsulti sa tinuod sa iyang pamahayag dihang miatubang sa mga City Hall reporters.

Ingon siya nga ang mga namaligya og baboy nga gisulod og mga tangkal-tangkal diha sa eskena B. Aranas ug Lakandula namalik sa maong dapit tulo ka adlaw gikan adtong miaging Huwebes.

Sa ato pa, kon tuohan nato si Artes, kaniadto ra diay’ng Marso 21, Lunes namalik ang mga tigbaligya’g baboy sa maong dapit.

Apan usa ka Linda Inoc mitawag nako og miingon nga pwerte na man diay’ng dugaya nila nga diha sa maong lugar. Sakpan!

Sagdi lang. Total gipasalig man usab ni Artes nga papahawaon dayon niya ang maong mga tigbaligya og baboy human gibulgar sa media ang pagtugot nila nga sila maka-display diha nga kalapasan sa Sanitary Code.

Apan nganong wala man lagi dayon mapatuman? Matud pang Inoc nga gihangyo nila si Artes nga pangitaan sila’g kabalhinan.

Usahay makatoo ko nga ang SPEED nagdawatan og litsononon gikan sa maong mga tigbaligya’g baboy bugti nga sila matugotan sa maong lugar.