Away sa PNA

Kaluoy sa bag-ong nurses sa Sugbo. Naduhig sila sa away sa mga opisyal sa Philippine Nurses Association (PNA). Nga gipasanginlan nga nag-ilog sa dakong kuwarta sa kahugpongan. Pasiunang kahasol nga nahiagoman sa bag-ong nipasar nga nurses mao ang kalibog pagpili sa duha ka petsa sa oathtaking. Mas dako nilang kabana kun unsay dangatan sa ilang kuwarta nga gitampo sa kahugpongan.

Nisuway ang karaang mga haligi sa PNA paghusay sa panagsungi tali sa lokal ug nasudnong mga opisyal sa kahugpongan. Matod ni Babes Sanchez, kanhi presidente sa PNA, gusto nilang luwason ang PNA gikan sa eskandalo sa ilogay sa dakong kuwarta. Labi na nga way klarong proyekto ang PNA alang sa ilang mga sakop ug sa katilingban.

***

Gipasalig sa Professional Regulation Commission (PRC) nga di maapektahan ang lisensiya sa bag-ong nurses bisan asa ug kanus-a sila manumpa: Sa mass oathtaking ba nga gipasiugdahan sa mga kolehiyo ug unibersidad sa Sugbo sa Cebu International Convention Center (CICC) sa Marso 25; o sa gipasiugdahan sa PNA sa Grand Convention Center sa Marso 28.

 Apan ang mas dakong suliran sa bag-ong nurses mao nga kaduha sila kolektahi og P400 nga membership fee sa PNA. Nakabayad na sila sa lokal nga chapter apan gikolektahan na sab sa nasudnong chapter nga giingong gitugotan nga makabutang og lamesa sa rehiyonal nga buhatan sa PRC.

***

Gipakita sa nurses ang ilang resibo gikan sa local chapter apan giawhag sila sa nagpailang mga representante sa national chapter sa pagpangayo nga iuli sa local chapter ang ilang kuwarta. Sa wa pang katin-awan ni PRC 7 Director Dan Malayang, gipasidan-an pa sila nga di kahatagan og lisensiya kun di mobayad sa national chapter.

 Matod ni Sanchez bisan kinsay mokolekta sa membership fee, magpabilin ang naandan nga binahinay—60% sa national chapter ug 40% sa local chapter. Apan iyang nahibaw-an nga mas dako ang hinungdan sa away sa lokal nga mga opisyal sa PNA.

***

Segun sa pipila ka mga sakop sa PNA nga nihangyo nga di lang ilhon ang sentro sa away, nga nisangpot na gani sa kinihaay, sa ilang kadagkoan mao ang minilyon ka pesos nga pundo sa bangko sa kahugpongan. Nga gikatahong gi-invest sa money market bisan kun ang PNA usa ka non stock ug nonprofit organization.

 May sukaranan ang pakisayod sa nurses unsay nahimo sa PNA alang sa mga sakop sa kahugpongan nga nagkinahanglan og dinaliang mga hinabang. Nganong niburot mang pundo ngadto sa minilyon ka pesos sa local chapter ug binilyon ka pesos sa national chapter nga way klarong hinabang nga nahatag ang PNA ngadto sa nurses nga gawas nga way trabaho gipangilkilan pa gyod sa mga tambalanan nga nipaubos nila sa on the job training?

***

 Email: [email protected]