Hain na sila?

Unsa may buhaton sa usa ka whistleblower kon, human sa makabungog nga mga pasidungog sa iyang kaisog ug kaligdong, wa na kinahanglana ang iyang testimoniya:

 Kay nahipos na ang tanang ebidensiya ug wa na kinahanglana ang iyang tabang pagmatuod sa iyang exposé

 Kay napasaka nang kaso sa korte ug busa mamahimo na lang siya nga usa sa mga saksi nga wa pay seguro kanus-a ipatawag, kon mapatawag man, sa husay nga wa mag-apura; ug

 Kay natabonan nang iyang exposé sa mas bag-o ug mas dagko pang mga eskandalo nga mao na say nasentro sa atensiyon sa nasud ug sa katawhan.

***

 Dinhi sa atong kaugalingong nataran, wa na igkita si Davidson Rusia, alyas Tisoy Tagalog, ang kontrobersiyal nga star witness nga nakapakonbikto niadtong 2004 nilang Paco Larrañaga ug kaubanan human sa pito ka tuig nga husay sa kasong pagdagit, paglugos ug pagpatay sa managsuong Marijoy ug Jacqueline Chiong.

 Labaw pang wa na sab igkita si Jessica Alfaro, ang star witness sa Visconde Massacre niadtong 1991, nga samtang nakapakonbikto nilang Hubert Webb ug ubang mga sinumbong sa Parañaque Regional Trial Court niadtong 2000, gideklarar sa Korte Suprema nga bakakon ug di angayng tuohan.

 Wa na sab tang kahibawo unsay gidangatan sa whistleblower sa mga anomaliya sa Land Bank of the Philippines, si Acsa Ramirez, nga nasaypan pagtudlo ni kanhi presidente Arroyo nga maoy suspetsado.

***

 Si Jun Lozada maoy sentro sa atensiyon sa nasud ug sa katawhan dihang gi-detalye niya giunsa pagmaniobra sa pamunoang Arroyo ang multi-bilyones pesos nga eskandalo sa national broadband network (NBN) uban sa ZTE Corp. sa Tsina. Apan wa nay interesadong maminaw niya. Karong sila na sab si retired AFP budget officer George Rabusa ug kanhi auditor Heidi Mendoza ang nibisto sa lapad nga pangurakot sa Armadong Kusog.

 Si Lozada nibalik na pagka IT consultant. Nabalaka gihapon sa seguridad sa iyang asawa ug lima ka anak. Ug nakugang nga bisan human sa iyang exposé naabtan gihapon og pila ka buwan una siya nakakuha og business permit.

***

 Lahi ang kalibre ni Cris Saavedra. Ang responsable di lang sa pagkabisto sa mga anomaliya sa mga proyekto sa niaging Asean Summit kon dili sa pagpasaka sa tukmang mga kaso sa Visayas Ombudsman. Siyay responsable sa pagkasuspenso sa lokal nga mga opisyal nga gilambigit sa overpricing sa decorative lampposts ug pagsalbar sa P350 milyones sa pundo sa gobyerno.

 Apan samtang nagpaabot sa gisiyam-siyaman nang husay sa mga kaso, nidagan ug napilde siya pagka mayor sa Dakbayan sa Sugbo. Maisugong nideklarar og gubat batok ni Gobernador Gwendolyn Garcia pinaagi sa pagkiha niya tungod sa Cebu International Convention Center (CICC) ug Baliligate. Ug samtang nagpaabot sa mas langay nga husay, organisahon niyang mga konsumidor ug taxi drivers sa Sugbo.

***

Email:[email protected]