Luoya g'yud tawon

Nalipay kaayo ko kay ang report gamay ra ang mga nabuthan og rebentador dinhi sa dakbayan sa Sugbo atol sa pagsugat nato sa miaging pasko.

Tiaw mo nga 13 ra kuno ka tawo ang nabuthan nga reporter pa ako niadto sa ospital, tag kapin sa usa ka gatos ang mabuthan sa pasko ug lain usab sa bag-ong tuig.

Nindot unta nga likayan lang nato ang paggamit og rebentador. Abi ninyo og ngano? Ang aso sa rebentador makadaut g’yud sa atong panglawas.

Ikaduha, ang kwarta nga inyong ipalit og pabuto mas maayo pa nga gastohon lang ninyo pagpalit og pagkaon kay masaw-an pa sa inyong pamilya. Dili ba maayo?

* * *

Samtang nalipay ko kay minus ra ang mga naaksidente sa pabuto atol sa pasko, naguol ko pagkasayod nga mosaka ang pletehan sa taksi.

Bisan dili ko tigsakyanan og taksi, apan nalooy ko kay mosamot kadako ang gastohan sa katawhan nga mapugos sa pagsakay og taksi kay magdali.

Tiaw mo nga ang patak sa pletehan inig lingkod pa lang nimo sa taksi P40 na, unya imbes tag P2.50 sa matag 300 metros nga pagdagan himoon na nga P3.50.

Hinoon, mahal na g’yud karon ang presyo sa gasolina ug LPG nga maoy gigamit sa kadaghanang taksi.

Daghan sa mga higala nako nga taxi driver mitug-an nga karon moganansya sila og sobra sa P500 sa usa ka adlaw nga pagpamasahero.

Sa ato pa, kon ibutang nato nga sa usa ka taxi makapasakay sila og 50 ka tawo sa usa ka adlaw, ang ilang kita madugangan og P500.

Unya kay sa matag 300 metros nga biyahe madugangan man usab og P1 ang pletehan, bana-bana nako nga mokita na og kapin sa usa ka libo ka pesos ang taxi driver sa usa ka adlaw.

Buyno, higayon na tingali nga angay’ng estriktohon na usab pag-ayo ang mga taxi driver kon sila masakpan nga wala motuman sa tukmang lagda sa pagmaneho og sakyanan.

* * *

Dunay plano nga ang Land Transportation Office (LTO)-7 nga gipangulohan nila ni Director Raul Aguilos ug Assistant Director Arnel Tancinco mo-hire pa og dugang deputized agents.

Pagka karon, walay laing grupo sa mga civilian dinhi sa rehiyon nga gitugotan nga mahimong deputized agents sa LTO gawas lang sa mga sakop sa Task Force Alpha.

Nagplano ang Task Force Alpha nga sugod Enero, adlaw-adlaw na nga ang TFA mopahigayon og operation batok sa mga masalaypong drayber.

Giplanohan usab ang pagmugna og TFA Motorcycle Team nga panahon sa gabii magpatrolya aron kadtong mga dili magpasiga sa suga ug kadtong depiktoso og suga, dakpon.

Busa kamo diha nga tag-iya og mga sakyanan, mga drayber, sutaa g’yud ninyo kanunay nga magsiga ang inyong suga sa sakyanan aron dili kamo madakpan.

Sunda ninyo ang higala ko nga si Joe Orcullo, tag-iya sa mga PUJ nga Mariners nga nagbiyahe sa Busay, matag abot sa sakyanan sa grahe tsek-ap g’yud.

Kon may mga suga nga dili magsiga, ayuhon dayon. Dihay nasugatan niya sa karsada nga wala mosiga ang usa ka suga, gipapauli niya sa grabe aron maayo dayon.

Apan baya kining uban, maayo lang modawat sa abangan apan wala mag-atiman sa ilang mga sakyanan.

* * *

Awhagon nako ang mga taxi driver nga pagsul-ob g’yud mo og uniporme nga gi-require sa Land Transportation Franchising and Regulatory Board aron dili kamo madakpan. Puti nga polo shirt, kon T-shirt mahimo ra basta puti gihapon ug dunay kwelyo. Unya kinahanglang magsapatos g’yud.

Karon malooy pa kaayo mi sa Task Force Alpha nga moestrikto sa mga drayber kay moingon man nga alkanse sila sa kita, apan kon dagko na ang pletehan, dili na tingali kami malooy pa. Ilabi na kadtong mga taxi driver nga kusog kaayong “manglubag” sa mga pasahero ug mamili kinsa ang ilang pasakyon, angay sila nga tudloan og leksyon.

* * *

Si LTFRB-7 regional director Ahmed Cuizon makigtambayayong sa mga opisyal sa kabarangayan sa pagpatuman sa tukmang lagda ngadto sa mga operators ug public utility vehicles.

Usa sa unahon mao kadtong requirements nga ang mga PUVs duna g’yuy iyang kaugalingong grahe ang mga operators.

Apil sa among gikasabutan mao nga ang mga sakop sa media hatagan og kopya sa sketch kon hain ang grahe sa mga PUV operator.

Kadtong mga walay grahe ug anha ra sa karsada moparking sa ilang sakyanan, aw “sikwati” g’yud mo. Apil ko sa mosusi sa inyong mga grahe.

Email: [email protected]