Silotan g'yud!

Angay gayud nga silotan kadtong mga opisyal o mga kawani sa Land Transportation Franchising and Regulatory Board nga gituohang nakabulsa og dakong kantidad pinaagi sa pagbaliwala sa kamandoan gikan sa ilang central office.

Ang gipasabot nako nga kamandoan gikan sa LTFRB-Manila nga wala tumana sa maong mga opisyal mao ang moratorium sa pag-isyu og taxi franchise gikan kaniadtong 2003.

Tiaw mo, ang team sa mga imbestigador gikan sa Manila nga gipangulohan ni Nida Quibic ug gipadala dinhi sa Sugbo aron pag-imbestigar sa binuang sa maong mga opisyal daw nakapanglingo-lingo.

Kinsa man gud tawo'y dili makapanglingo-lingo nga gikan sa kapin lang sa 4,000 ka taxi franchises kaniadtong 2003, karon miabot na man og kapin sa 6,000 ang mga prangkisa sa taxi nga naisyu sa LTFRB-7.

Bi nganong kining maong mga opisyal miinsister man g'yud nga moisyu og dugang mga taxi franchises nga gidid-an man sila? Sigurado ko nga dili kay lingin ra, kwadrado g'yud kaayo ang katarungan niini.

Nangandoy ko nga ang team nila ni Quibic morekomendar gayud nga kadtong mga responsable sa binuang pasakaan og kaso. Unya, sugyot usab nako nga sutaon ang mga kabtangan niining mga hearing officers sa LTFRB dinhi sa ato.

Sila man maoy mipahigayon kunohay og hearing sa mga application sa renewal sa mga prangkisa, dayon ang usa ka taxi manganak ug inig-aprobar sa kanhi mga director, mokalit na lang og kahimo nga tulo o upat ka taxi.

Ang pangutana nako ngadto sa mga hearing officers sama nila ni Attorney Douglas Sanson ug Evelyn Carmelita Misal, nganong mirekomendar man kamo nga dugangan ang mga taxi units sa applicants?

Unya, kadto usab nga mga kanhi regional directors mipirma usab mao nga midaghan pag-ayo ang mga taxi dinhi sa ato. Nakita tingali ninyo nga duna gani'y mga taxi nga green pa ang plate numbers, sa ato pa private cars.

Tungod gud sa pagdali-dali nila'g isyu sa mga prangkisa sa mga taxi units, wala na lang nila sutaa kon ang mga applicants duna bay grahe sa ilang mga sakyanan.

Resulta, panahon sa gabii makita nimo nga ang mga taxi anha ra iparking daplin sa mga karsada. Gusto mo'g hulagway? Kamong taga LTFRB aria ko kay ipakita dayon nako ang hulagway sa mga nanaglinya nga taxi diha sa mga subdivisions ug kadalanan panahon sa gabii.

Ang mga higala lagi nako nga mga taxi operators nga nagtinarong nag-ampo g'yud nga unta moabot ra ang gaba niining mga tawo diha sa LTFRB nga nakabulsa og dagkong kantidad.

Awhagon nako ang Ombudsman nga ipatuman usab unta nila ang balaod ngadto sa mga corrupt nga opisyal sa LTFRB-7. Ang Republic Act 1379 naglatid nga sakmiton sa kagamhanan ang katigayonan sa mga opisyal ug kawani sa kagamhanan nga naangkon sa kwestyonable nga paagi.

Dali ra man kana nga masuta ba. Kon nakahupot sila sa maong mga katigayonan sulod lang sa mubo kaayo nga termino ug nga bisan ug isumadala ang ilang kinitaan dili gani paagi, basihanan na kana nga sila nakahimo og pagpangawkaw.

Daygon nako si LTFRB-7 regional director Benjamin Go nga maoy personal nga mireklamo sa binuang sa mga opisyal nga iyang nasundan diha sa maong ahensya.

* * *

Kadtong mga tunghaan nga mosalmot isip participating school sa scholarship program sa dakbayan sa Sugbo, siguroa nga inyo gayud nga matuman ang gilatid sa kasabutan.

Kon dili gud ninyo matuman makaapekto kini sa mga tinun-an. Sama niadtong pagbukas sa second semester dunay mga unibersidad dinhi sa dakbayan nga wala na modawat og tinun-an kon dili makabayad.

Kini bisan pa sa pasalig ni Mayor Michael Rama nga ipadayon nila ang paghatag og laing P10,000 sa matag usa ka beneficiary sa scholarship program karong second semester.

Sama diha sa CIT University, dili sila motugot nga ang pasiunang bayronon ma-charge sa Scholarship Grant sa dakbayan kay wala pa kuno'y klaro nga bayran sila sa City Hall.

Resulta, mibayad ra intawon ang mga bata. Ang kasabutan gud nga gipirmahan sa mga tagdumala sa tunghaan ug City Hall mao nga inig pirmahay nila sa memorandum of agreement, mobayad ang tunghaan og katunga sa kinatibuk-ang kantidad sa ilang business permit sa nangaging katuigan.

Ang laing katunga ibanon pinaagi sa paghatag og scholarship. Unya kay wala man kini matuman. Karon, mosulod na usab ang University of the Visayas, nindot kaayo apan kinahanglang tumanon g'yud nato ang kasabotan.