Asa diay kamo laban?

Dunay reklamo gikan sa mga drayber og mga passenger jeepney nga kuno sila ra ang kanunay nga pangdakpon sa mga tinugyanan sa balaod.

Ang akong ikasulti niini mao nga ang sagad gud mohimo'g kalapasan sa balaod sa tukmang pagmaneho og sakyanan sila man nga mga passenger jeepney drivers.

Bisan og nasayod sila nga ang dapit dili mahunongan og sakyanan, sama sa mga dapit duol sa eskena, tuyoon man g'yud nila pagparking aron nga maghuwat og pasahero.

Usa niining maong mga dapit nga sagad hunongan sa mga abusadong drayber mao ang eskena Gorordo Avenue ug Archbishop Reyes Avenue.

Bisan og nasayod kining maong mga drayber nga sa paghunong nila sa maong dapit makamugna sila og traffic congestion dili g'yud magpakabana ug magsige lang og "paugat." Maayo tingali nga kamong mga abusadong drayber usbon na ninyo ang inyong batasan.

Karon nga si Land Transportation Office (LTO) Chief Virginia Torres mitugot na nga maka-operate pagbalik ang mga sakop sa Task Force Alpha sa pagpanakop sa mga abusadong drayber, hunonga na ang inyong abuso.

Sa pagbalik sa TFA sa operation sugod karong semanaha, sigurado ko nga daghan na usab nga mga drayber ang madakpan kon pabilin nga dili motuman sa tukmang lagda sa pagmaneho'g sakyanan.

Isip media liaison officer sa LTO-Task Force Alpha, akong tambagan ang mga drayber, ilabi na gayud sa PUJ nga siguroa g'yud nga ang inyong mga sakyanan mosiga ang "tail light" ingon man pasigaon ninyo ang "head light" kon magdagan panahon sa gabii.

Unya, kadtong mag-drive og motor kinahanglang magsul-ob g'yud og crash helmet, unya dunay side mirrors ang inyong motor. Dia pay lain, kadtong mga mag-drive og taxi ayaw g'yud pagsul-ob og short pants ug sleeveless nga sinena.

Timan-i nga dunay lagda ang Land Transportation Franchising and Regulatory Board (LTFRB) nga ang mga drayber sa PUJs, mga bus ug taxi mag-uniporme g'yud. Kadtong mga sakyanan nga expire na ang rehistro ayaw na lang padagana kay puwerte kadako sa multahan kon kamo masakpan. Kon expire ang inyong lisensya, ayaw pagmaneho. Maayo unta kon maminaw kamo sa tambag kay ang among tumong sa TFA dili aron nga kamong mga drayber makabayad og multa kon dili ang "safety" diha sa atong karsada.

* * *

Nalooy ko sa sitwasyon ni LTFRB-7 regional director Benjamin Go nga mihimo'g kampanya batok sa mga binuang diha sa gidumala niya nga ahensya nga wala g'yoy mitabang kaniya.

Bisan ang iyang mga labaw didto sa LTFRB-Manila ug sa Department of Transportation and Communications (DOTC) nagpabuta-bungol lang sa iyang pagpangayo'g tabang.

Masabot ba kini nato nga kadtong binuang sa mga nangagi nga regional direktors sa LTFRB-7 nga miisyu gihapon og prangkisa sa mga taxi bisan og wala na itugot, dunay "go signal" kanila?

Nasubo usab ko kay dunay ubang mga reporters nga mihimo hinoon og lakang nga daw mikontra ni Go sa iyang kampanya. Mora ba og masabot nato nga tua sila nakapusta sa pikas. Dili ba diay nato angay'ng suportahan ang kampanya ni Go batok sa mga binuang diha sa gidumala niyang ahensya?

Kon nagbinuang si Go sa iyang gibutyag nga mga inpormasyon, hagiton nato ang mga nangagi nga regional direktor sa LTFRB-7 nga ilang ikiha si Go. Labaw pa nato nga hagiton mao sila si Atty. Evelyn Misal ug Atty. Douglas Sanson, mga hearing officers sa LTFRB-7, nga mokiha ni Go kon wala g'yud sila'y gihimong dautan.

Sayonan ka nga si Atty. Misal giingnan ni Go atol sa usa nila ka hearing nga apil sa "most guilty" sa pagpang-isyu og mga prangkisa sa taxi bisan og gihunong na unta. Nganong si Misal nga usa ka abogado daw dili man makamao manubag dihang gisukna siya ni Go atol sa hearing kon ngano nga miendosar siya sa pag-aprobar sa dugang mga taxi franchises?

Unya dihang buot nako nga kuhaan og pamahayag mibalibad. Dili basta-basta ang pag-ingon ni Go nga si Atty. Misal usa sa "most guilty" sa anomaliya sa LTFRB-7.

Gitug-anan ko ni Go nga duna siya'y daghan kaayong mga dukomento nga magpakita nga si Atty. Misal ug Atty. Sanson maoy miendosar nga pa-aprobahan ang mga franchises nga naisyu sa mga 2,000 ka dugang taxi units nga nagdagan karon sa Metro Cebu.

Kaniadtong 2003 dihang gimando sa LTFRB-Manila nga hunongon ang pagpang-isyu og prangkisa sa mga taxi sa Metro Cebu, mga 4,000 pa ka taxi ang nag-operate niadto.

Pero karon? Kapin na sa 4,000 ka taxi ang nagdagan-dagan sa atong kadalanan mao nga pwerteng huota na g'yud sa atong mga karsada. Kinsa'y nakakwarta niadto?

* * *

Email: [email protected].