Whistleblower!

Dako kaayo ang akong pagdayeg ni Land Transportation Franchising and Regulatory Board (LTFRB-7) regional director Benjamin Go kay siya mismo ang mibulgar sa mga anomaliya sa gidumala niyang buhatan.

Tagsa ra g'yud kini mahitabo kay ang sagad mao nga ang hingtungdang mga opisyal maoy pwerte mangulipas kon dunay anomaliya sa ilang ahensya.

Pero nasayod na ako kon kinsa ang nagpasiugda sa binuang diha sa LTFRB nga nakapadaghan sa mga taxi apan dili na lang nato hisgutan kay dili na kini makatubag pa.

Usa sa mga anomaliya mao nga kon dunay moaplay og renewal sa mga prangkisa sa usa ka taxi unit, inig lusot sa dukomento mahimo na nga lima o sobra pa gani.

Gabaan baya mo diha. Lagmit dunay uban diha sa LTFRB nga nataptan na tingali'g mga sakit tungod sa gaba nga pwerte kaayo mo mangwarta. Dili ba tinuod?

* * *

Nag-atubang karon og kaso nga kriminal diha sa Visayas-Ombudsman ang kanhi mayor sa Sagbayan, Bohol nga si Jimmy L. Torrefranca.

Sigun sa complainant nga si Josephine C. Moreno, taga barangay Sagbayan Sur, nga ang lungsod sa Sagbayan atol nga si Torrefranca pa ang mayor miabang og yuta nga iya ni Justina Mascariñas.

Gigamit kini isip "mechanical dryer" sa mga mais ug palay sa mga mag-uuma.

Sa ngadto-ngadto nakurat na lang ang taga Sagbayan kay matud ni Moreno nahibaw-an nila nga ang yuta ni Mascariñas gipalit na man ni Torrefranca.

Gani si Moreno nakakuha man og kopya sa deed of sale nga gipirmahan nila ni Mascariñas ug Torrefranca kaniadtong Enero 27, 2010 nga mayor pa siya.

Ang dukomento ginotaryo kini ni Atty. Rey Rafael Montuya ug natala nga Document No. 17, Page 75 Book X, Series of 2010 sa Notarial Register sa abogado.

Kining maong dukomento maoy gigamit ni Moreno nga basihanan sa pagpasaka niya'g kaso batok ni Torrefranca didto sa Ombudsman.

Ang argumento ni Moreno mao nga bisan og mayor pa si Torrefranca nakadawat na siya sa abang sa yuta nga giabangan sa lungsod.

Gikutlo ni Moreno ang lagda sa section 3 (h) sa Republic Act 3019 kon Anti-Graft and Corrupt Practices Act nga nalapas gayud ni Torrefranca.

"Directly or indirectly having financial or pecuniary interest in any business, contract or transaction in connection with, which he intervenes or takes part in his official capacity, or which he is prohibited by the constitution or by law from having any interest."

Buot ni Moreno nga ang Ombudsman mosusi sa maong kaso kay bisan og mayor pa si Torrefranca makadawat siya'g abang sa yuta nga ibayad sa lungsod atol nga siya maoy pa gikan adtong Enero.

Bitaw, angay'ng dalion kini sa Ombudsman pagresolbar ang maong isyu kay daghang mga taga Sagbayan nga misaway sa kanhi nila mayor tungod sa maong binuhatan.

Kini si Torrefranca milansar na lang pagka bise mayor sa eleksyon niadtong Mayo 10 kay napupos na man ang iyang termino pagka mayor, apan napilde siya.

Buyno, angay'ng lig-onon g'yud nimo ang imong argumento nga itubag sa kaso nga gipasaka kanimo Sir kay kon mosipyat ka, sigurado nga adto ka punita sa prisohan.

* * *

Gikataw-an ra diay kuno sa manager sa Sikatuna Security Agency ang pagdiskuter nako sa reklamo sa ilang gwardya nga wala nila remiti sa contribution niini sa Social Security System.

Bisan og nagsugod na kamo sa pag-remit karong panahona sa SSS contributions sa inyong mga gwardya human nato gidiskutir kining maong reklamo apan maoy pagaingnon nga nahimo na nila ang kasaypanan.

Nasayod ko nga nagkukatawa lang sila aron masalimbongan ang ilang kasubo kay sigurado man g'yud nga mag-atubang sila'g kaso niini sa SSS.

Mora'g karong semanaha may mga gwardya na nila nga mosang-at og kaso sa SSS kay giibanan ang ilang sweldo og para SSS contribution apan wala dayon ibayad.

Maayo ba gud na? Unya ang inyong giiban sa sweldo sa gwardya sobra gani sa 20 porsiyento nga gilatid sa lagda sa Philippine Association of Detective and Protective Agency Operators (PADPAO).

Sagdi lang, katawa usa mo karon. Pero hunonga ninyo ang pagpasiatab nga ipakanselar ninyo ang lisensya sa mga gwardya nga mireklamo ninyo kay wala giremit ang ilang SSS contributions.

You can tell than to the dead marines Sir!