26 ka gobernador

Haskang pinangitaay nako sa listahan sa tanang mga gobernador sa Sugbo. Aron mabasa sa among tulomanon sa radyo atol sa ika-441 nga sumad sa pagkatukod sa Sugbo. Apan tungod ba kaha sa akong kabanga sa internet, o wa lang gyoy nakahunahuna pag-upload sa listahan online, wa gyod koy nakit-an. Mao nga nagpatabang ko sa mga tigpaminaw sa DYAB Abante Pa, Bisaya.

Akong 26 ka tuig nga pagpanibya nagtudlo nga, kon motarung la’g hangyo, di ka pakyason sa mga tigpaminaw. Mao nga dayong tapos sa Arangkada, wa ko hingpit nga nakugang pagkakita ni Pablo Tinga. Nagda sa iyang libro nga gawas nga nilista may mga hulagway pa gyud sa mga gobernador sa Sugbo.

* * *

Ang Sugbo nga nahimong lalawigan niadtong 1927 dunay 26 ka gobernador, apil nang mga tinudlo sa mga Katsila ug mga Amerikanhon. Labing unang gobernador mao sila si Gobernador Heneral Junquera (nga maoy nagtukod sa dan Junquera gikan sa Colon paingon sa Ramos) ug Heneral Arcadio Maxilom (nga gipasidunggan sa kanhi Mango karon Maxilom Ave.).

Duha ang nakalaagad sa labing tag-as nga termino (managsama nga tag-napu ka tuig): Silang Manuel Roa, nga nag-alagad gikan sa 1912 ngadto sa 1922; ug Eduardo Gullas, nga maoy nagduma sa Sugbo gikan sa 1976 (sa kinapungkayan sa Martial Law ni Ferdinand Marcos) hangtod sa 1986 (sa pag-ulbo sa Edsa People Power Revolution).

* * *

Ubang mga gobernador sa Sugbo: Julio Llorente (1900-1901); Juan Climaco (1902-1903); Sergio Osmeña Sr. (1904-1905); Dionisio Jakosalem (1907-1912); Arsenio Climaco (1923-1930); Mariano Jesus Cuenco (1931-1933); Sotero Cabahug (1934-1937); Buenaventura Rodriguez (1937-1940); Hilario Abellana (1941-1943); Jose Delgado (1943-1944); Jose Leyson (1944-1945);

Fructuoso Cabahug (1945-1946); Manuel Cuenco (1946-1951); Sergio Osmeña Jr. (1952-1955); Jose Briones (1956-1961); Francisco Remotigue (1961-1963); Rene Espina (1964-1969); Osmundo Rama 1969-1976 ug 1986-1988); Lito Osmeña (1988-1992); Vicente de la Serna (1992-1995); Pablo Garcia (1995-2004); ug Gwen Garcia (2004 hangtod karon).

* * *

Si Tinga, nga nagtrabaho sa kagamhanan sud sa 40 ka tuig ug siyam ka buwan, nakaalagad sa 13 ka mayor sa Dakbayan sa Sugbo, gikan ni Serging Osmeña ngadto ni Alvin Garcia. Lumad siyang taga Bantayan. Ang librong "Cebu: Yesterday, Today and Tomorrow" mao nay ikatulo ni Tinga. Nakabasa sab ko sa una niyang libro mahitungod sa talagsaong mga kadaogan ni Serging sa mga piniliay nga iyang gisalmotan.

Si Tinga maayo nga mosuwat apan di kamao nga mamaligya sa iyang mga libro. Gipanghatag ra ang mga kopya ngadto sa senior citizens. May 200 pa hinuon ka kopya nga gipakatug lang sa iyang bay sa St. Jude Acres, Bulacao, Cebu City. Kon gusto kang motabang aron di hingpit malubong sa kalimot ang kasaysayan nga iyang gihagoan paghipos, mahimo nimong tawgan si Tinga sa 2722557 o i-text sa 09164275139.

* * *

Email:[email protected]