Napukan nang daan

Nikakak si Floyd Mayweather Jr.Mao ni pasangil di lang sa kampo ni Pacquiao kon dili, ug labi na, sa tinuod nga mga eksperto ug sa labing banggiitan nga mga sakop sa langyawng media nga nagsunod sa boksing.Usa nila si Kevin Iole sa Yahoo!Sports.Kinsa nakumbinser na nga nitalaw gyud si Mayweather sa pagpakigsangka ni Pacquiao.

Gitumbok ni Iole ang pagtingog na ni HBO Sports President Ross Greenburg.Kinsa nimatuod nga may napahigayon gyud nga sabotsabot tali sa mga representante nilang Pacquiao ug Mayweather.Ug katuohan gyud si Greenburg kay siya ang nagpasiugda sa sabotsabot sugod niadtong Mayo 2.

* * *

Gawas pa, nagkasungi silang Greenburg ug Top Rank Chairman Bob Arum.Mas suod silang Greenburg ug Golden Boy Promotions President Oscar De La Hoya.Kinsa maoy kusganong nipasangil ni Arum nga namakak sa iyang pangangkon nga ang kampo ni Mayweather ang nibiya sa sabotsabot alang sa gikahinaman unta pag-ayong sangka karong Nobyembre 13.

Si De La Hoya maoy nasakpan sa iyang bakak, klarong nagpaggamit ni Mayweather.Si De La Hoya ang nideklarar niadtong Hunyo nga nakabuylo nang sabotsabot tali nilang Pacquiao ug Mayweather ug gamay na lang og kuwang paghingpit sa mga detalye sa sangka nga gituohang maoy labing adunahan sukad masukad sa kasaysayan.Ang paglikoy na sa sulti ni De La Hoya karon maoy laing timaan nga nibahag nang ikog sa iyang boksidor.

* * *

Gitunglo ni Iole si Mayweather nga way pagtahod ni utang kabubut-on sa boksing nga nakapadato pag-ayo niya.Matud ni Iole gihikawan sab ni Mayweather ang minilyon ka boxing fans sa tibuok kalibotan sa kahigayonan pagtan-aw sa sangka nga ilang gihandom sud na sa dugayng panahon.

Nitataw si Iole nga way katungod si Mayweather pagtandi sa iyang kaugalingon sa labing bantogan nga mga boksidor, sama nilang Sugar Ray Robinson ug Sugar Ray Leonard.Matud niya hukman si Mayweather sa kasaysayan nga hambogero apan nisibog dihang ikasakbang na unta ang labing takos niyang kaatbang.

* * *

Sa pikas nga bahin, napamatud-an ni Pacquiao nga wa siyay gikahadlokan.Di ang kakabos sa General Santos, ni ang mga bugoy sa pantalan ug kadalanan sa Manila, ni ang mas dagko, mas kusgan ug mas utokan niyang mga kaparang ibabaw sa ring.

Bisan ang kamatuo-tuohon nga maibanan ang iyang kusog kon kuhaan og dugo pila ka adlaw sa di pa ang away.Karong Nobyembre 13 (Nobyembre 14 sa oras sa Pilipinas), duha ang pakamangon ni Pacquiao:Si Antonio Margarito nga maoy masugamak sa aktuwal nga kulata; ug si Mayweather nga maoy labing dakong pildero--kay napukan nang daan bisan sa wa pa tumana ni Pacquiao ang tanang binuang niyang mga lagda nga, segun pang Iole, morang siyay nag-imbento sa boksing.

* * *

Email:[email protected]