Buslot sa MVIS

CEBu, Philippines - Labing uwahing ebidensiya nga ang Motor Vehicle Inspection Section (MVIS) wa magsilbi sa pagtino sa kaluwas sa mga sakyanan nga nagdagan sa kadalanan kon dili nahimo na hinuong kahimanan sa panguwarta sa kadagkoan sa Land Transportation Office (LTO): Duha ka buses sa V & JA, ang tag-iya sa bus nga naaksidente sa Toledo City niadtong Sabado, nasakpan nga way hand brakes.

Nganong narehistro man ang duha ka buses nga wa man diay hand brakes? Di ba nga sa di pa marehistro o malab-as ang rehistrasyon sa mga sakyanan kinahanglan man nga moagi ug makapasar sa MVIS? Nataligam-an ba lang sa MVIS ang pagka way hand brakes?

* * *

O tinuod ang pasangil nga kun bundakan og kuwarta ang taga MVIS mahimong di na kinahanglan nga ipakita sa mga tag-iya ang ilang mga sakyanan? Ang bugtong lusot sa mga tagduma sa MVIS ug sa kadagkoan sa LTO mao ang pagpasangil nga gitangtang sa operator sa V & JA ang hand brakes human nasusi ang duha nila ka buses.

Mao nga kun duna pay bisan gamay na lang nga lama sa kauwaw nga nahibilin ang taga MVIS ug LTO, angay nilang ilubong ang ilang mga dagway sa yuta. Among isugyot nga adto ni nila himuon sa kanunay’ng gibahaan nga nataran sa LTO sa Mandaue. Gawas nga humok nang daan ang yuta, nangalisbo nang daan ang palibot.

* * *

Akong gipangutana si Regional Director Benjamin Go sa Land Transportation Franchising and Regulatory Board (LTFRB) nganong inay silotan ang operators sa buses nga nangahagbong sa MVIS hatagan man hinuon og higayon nga maka "take 2" o maka "take 3" pa gani. Iyang tubag? Dunay pipila ka bahin sa pakisusi sa MVIS nga mahimo rang usab-usabon nga di maapektahan ang kaluwas sa mga sakyanan.

Unang susihon sa MVIS mao ang mga suga ug brakes. Dayon ang suspension system ug wheel alignment nga susihon sa computer. Dayon ang pagsusi sa headlight alignment. Karong nasakpang way hand brakes, nganong gitugotan mang operator nga makataod og brakes inay silotan na unta?

* * *

Pait nga kamatuoran mao nga way take 2 sa tinuod nga kinabuhi. Kun moambak nang bus sa pangpang, di makasawo ang MVIS ug hatagan og laing higayon ang operator ug drayber pagkurihir sa depekto sa sakyanan.

Laing buslot sa MVIS mao nga magpaabot lang kanus-a ganahan magpasusi sa mga sakyanan ang operators. Nga dunay tanang kahigayonan pagtabon sa ilang kalapasan. Sama sa drug test sa mga motorista. Ang mga ungo sa drugas mahimong di lang una mohithit sud sa pila ka adlaw sa dayong pa-renew sa ilang lisensiya. Mas sayon ug mas laktod pa gyod kun kaila nila ang way paglubad ni kamatayon nga fixers sa LTO.

* * *

Email:[email protected]