Kumbira sa kamunggay

Ang Kumbira sa Kapamilya nagsugod tungod sa awhag sa mga tigpaminaw sa DYAB nga mag-abot ug mag-ila-ila. Mao nga napahigayon ang unang kumbira atol sa anibersaryo sa sibyaanan pila ka tuig nang nilabay. Ang ikaduhang kumbira gihimo sa Sabado sa tungatunga sa Pasko ug Bag-ong Tuig. Sukad niadto, napahigayon nang kumbira kaduha matag tuig--matag Hunyo ug matag Disyembre.

Magda ang mga tigpaminaw sa ilang kinaham nga mga pagkaon. Ang labing kabos magda og buwad ug ginamos. Ang mga arang-arang magda og steamed fish ug lechon. Human sa mubo nga tulomanon nga gitumong pagpaila-ila nila, hukaron nang pagkaon, magsaw-anay sila ug magbinayloay og mga sugilanon.

* * *

Sama sa ubang kalihokan, ang kumbira nahimo sang salamin sa hulagway sa mas dakong katilingban. Bisan sa tugon nga BYOB (bring your own bawon), may pipila nga di magda og pagkaon. Ang uban mangilog pa gani sa pagkaon sa uban. May mas mapangahason pa gyod nga magda og putos ug tagoan ang daghang pagkaon isip "bring house."

Nasulbad namong suliran pinaagi sa pagdugang og mga suga ug pagbutang sa mga pagkaon sa taliwa sa mga nanambong aron nga mas daghang makakita ug mabadlong ang may mga di maayo og tinguha. Apan sa kumbira, sama sa tinuod nga kinabuhi, mas daghan ang motuman sa lagda. Bisan ang labing kabos magda gyod og sobrang pagkaon.

* * *

Lisod balibaran ang mga mangapil sa kumbira nga way dalang pagkaon. Labi na ang magtiayon nga magda sa gagmay ug daot kaayo nilang mga bata. Maong mag-amut-amot ang mga tigpasiugda aron sa pagpalit og sobrang mga puso ug sud-an. May manggiluy-on sang mga tigpaminaw nga bisan di katambong sa kumbira magpada og lechon ug ubang pagkaon.

Apan ang pagkaon may katakos nga mamahimong taytayan pagsumpay sa mga sakop sa nagkalainlain nga hut-ong sa katilingban. Ang pagkaon nagtanyag sab sa tanang kahigayonan sa katawhan pagpasundayag sa ilang taras. Sa kahangol ug kamapahimuslanon sa pipila. Ug sa kamahigalaon ug kamanggihatagon sa kasagaran.

* * *

Kamunggay ang sentro sa kumbira karong buwana. Gidasig namo ang mga tigpaminaw sa pagda sa mga putahe nga may kamunggay. May nisaad na nga magbawon og humba nga kinamunggayan, cake ug cupcake nga kamunggay, kamunggay pie ug lechon nga kamunggay.

Mga eksperto sa kamunggay sa Department of Science and Technology (DOST) mopahibawo sab sa mga manambong sa labing bag-ong mga produkto ug teknolohiya sa kamunggay. Hinaot nga mas mapalambo pa ang kasayuran sa katawhan sa kamapuslanon ning utanon nga mahimong itanom ug molambo bisan sa labing pansil nga yuta sa kalungsoran ug bisan sa yuta nga gibutang sa plastik o sako sa kabalayan sa dagkong mga dakbayan.

* * *

Email:[email protected]