Fight mayor Mike!

Makapaabot kita nga sa administrasyon ni Cebu City mayor-elect Michael Rama basin putlon niya kining paghatag og dagko kaayong allowance sa City Hall ngadto sa mga judges ug Court of Appeals justices.

Usa ka pag-usik-usik sa kwarta sa dakbayan ang paghatag og dagkong allowance sa mga huwes. Dugay ra man nga ang mga huwes gihatagan og allowance sa dakbayan, apan walay mireklamo.

Ang gihatag kaniadto nga tag P5,000 ang buwan maisip man gud nga tinuoray gyud nga allowance ngadto sa mga huwes, apan ang allowance nga katumbas sa gidawat nila nga sweldo, pastilan maisip na kini nga suborno.

Gidayeg gyud nako si Regional Trial Court (RTC) judge Gabriel Ingles kay siya ra ang wala modawat og allowance nga gihatag sa dakbayan. Saludo ko nimo Sir.

Pwerteng dagkoa ang sweldo sa mga huwes kay duna sila'y gipatuman pagpaumento sa ilang sweldo aron pagdasig og dugang mga abogado nga mag-huwes.

Kadaghan sa gastohanan sa dakbayan sa Sugbo nga wala matagad kay kuwang og budget. Tan-awa ra god, nagsugod na hapit ang uwan-uwan apan wala pa maatiman ang atong drainage system.

Bisan si Rama miangkon niining maong kakuwangan sa dakbayan. Kon ang kwarta nga gihatag isip dagkong allowance sa mga judges gigasto pa sa mga proyekto, daghan ang makapahimulos.

Alang kanako dili gayud angay'ng dugangan ang sweldo sa mga huwes. Gawas pa, ang maong mga abogado wala na magkinahanglan og dagkong sweldo.

Kon nag-agap pa sila og kwarta nagpabilin unta sila sa private practice. Kwartahan na ang maong mga abogado pagsulod nila pagka huwes busa nganong hatagan pa man?

Anhi nato masukod ang "political will" ni Rama kon makaako ba siya pagtuis sa lakang ni Mayor Tomas Osmeña nga maoy utok sa pagpahatag og dagko nga allowances sa mga court judges ug sa mga justices sa Court of Appeals.

Nalipay ko kay gitug-anan ko ni Rama kagahapon nga iya kini karon nga gi-review uban sa mga sakop sa Local Finance Committee aron maoy basihan niya paghukom kon padayonon pa kini o iyang putlon.

* * *

Giklaro gayud sa Department of Education (DepEd) nga ang mga tinun-an sa Kinder ngadto sa Grade 4 sa public elementary schools dili gayud kolektahan bisan sa mga "authorized voluntary contributions."

Pagkanindot niining maong balita kon tumanon lang sa mga magtutudlo. Ang kamandoan ni DepEd Secretary Mona Valisno mao nga kadto rang mga tinun-an sa Grade 5 ngadto sa 4th Year High School nga mahimo sila nga mokolekta, apan dili usab pinugsanay.

Sunda gyud ninyo kini aron kamong mga magtutudlo dili mag-atubang og reklamo. Kamong mga ginikanan, pananglit may mga maestra nga molapas sa kamandoan, tawga ko sa 511-7984.

Ang gitugot nga voluntary contributions mao ang Boy ug Girl Scouts of the Philippines nga tag P50, Anti-TB Fund Drive P5, School publications nga tag P60 sa elementary ug P90 sa high school, kon dunay publication ang tunghaan.

Apan kini maoy angay'ng bantayan ninyo. Kwestyona gyud ninyo kon ang kadagkoan sa Parents Teachers Community Association (PTCA) sa mga tunghaan mokolekta og amot nga wala pa sila makahatag og kwentada sa ilang kwarta sa miaging tuig.

Ang DepEd Order No. 54 naglatid g'yud nga kinahanglang ang mga opisyal sa PTCA mopahibalo atol sa general meeting kon giunsa nila pagasto ang kwarta nga ilang nakolekta.

* * *

Kon tinuod man gani nga si Kamagayan barangay captain Celestino "Tony" Avila nasakpan gayud sa kapolisan nga diha sa hantakan atol sa ilang pagronda, angay kini nga ilang ikiha.

Usa kini ka lakang aron matudloan og leksyon si Kapitan Avila kon tinuod man nga wala siya'y gihimo sa problema sa illegal nga sugal sa iyang barangay.

Ubos sa balaod, ang konseho sa dakbayan sa Sugbo maoy makapahamtang og silot sa mga elected barangay officials apan kinahanglan usab nga hatagan sila og "due process" pinaagi sa pagpatubag sa kaso batok kanila.

Nasayod ko nga daghan pang mga kapitan sa barangay nga inay mohimo'g aksyon sa mga illegal nga sugal, moapil pa hinoon.

Sama ra gud sa estorya nga ang mga polis mi-raid og tigbakayan. Human sa raid, nakit-an sa mga polis nga nagpaingon sa ilang nahimutangan ang barangay kapitan.

Wala gyud motagad ang kapitan sa mga polis dihang gitimbaya nila kay nagsige diay og pangita sa usa niya ka tsinelas nga nawala sa pagdinaganay.