Masuko man diay

Duna mga politiko nga tingali gusto gyud nga sila na lang ang tagdon kanunay sa media nga mahiubos kon hatagan og pagtagad ang ilang mga kaatbang.

Nabantayan kini nako niining milabay'ng kampanya. Usa ka politiko dili na motubag sa akong mga text messages kon mokuha ko kaniya og reaksyon sa mga isyu nga naglambigit sa iyang gidumala nga grupo.

Ang laing politiko usab, pinaagi sa iyang tigpamaba, mihunong pagpadala og mga press statement kanako kay nagduda kuno nga atua ko modapig sa ilang kaatbang.

Tungod niini, ang imbitaron nila nga mo-cover sa ilang kalihukan mao na ang akong kauban sa klaro kaayo nga rason. Wala ba ninyo masabti nga patas man kaayo ang akong dinad-an sa balita?

Kon sa akong lindog duna koy isyu nga suportahan, apan patas ako sa pagsuwat sa balita.

Niining milabay'ng mga adlaw, nagbawos-bawos ang duha ka nagkaatbang nga kandidato pag-angkonay kon kinsa kanila ang gidapigan sa mga tiguwang.

Nasayod g'yod ako og unsay tinuod kabahin niining maong isyu Apan sanglit balita lagi, wala gyud ko mobutang sa akong personal nga nahibaw-an ug gibasi nako kini sa pamahayag sa mga hingtungdang politiko.

Angay ba god ninyo kini nga ikasuko?

* * *

Pagsuwat nako niining lindog, wala pa masayri kon kinsa ang midaug nga kandidato pagka mayor dinhi sa dakbayan.

Apan sigurado na ako nga bisan hain kanila ni Vice Mayor Michael Rama ug kanhi mayor Alvin Garcia ang modaug, ang matag usa kanila nagtinguha gayod nga mapalambo ang atong Cebu City Medical Center.

Sigurado na usab kaayo ko nga si Ginang Margot Osmeña nga asawa sa mayor, modaug gayod sa pagka konsehal. Dugay na ako nga naghangyo ni Ma'am Margot nga siya ang modumala sa chairmanship sa committee on health and hospital services.

Si Margot maoy maisip nato nga "kabugason" sa sayong kabuntagon nga maoy maghatag kanato og dan-ag alang sa usa ka mahayag nga pag-atiman sa atong panglawas.

Ang CCMC wala gayod mamaayo sa pag-atiman sulod sa nanglabay'ng katuigan. Unsaon, gamay ra kaayo ang budget nga gigahin sa maong ospital. Tiaw mo nga P139 milyones ra alang sa usa ka tuig.

Ang uban tingali nagtoo nga dako na ang maong kantidad, apan angay ninyong masayran nga ang kapin sa P100 milyon niini para lang sa sweldo sa kapin sa 500 ka kawani.

Resulta, P14 milyones na lang niini ang gigahin alang sa pagpalit og mga tambal. Mao kana ang rason nga kuwang kaayo'g tambal ang CCMC.

Unya, samtang ang CCMC duna unta'y plantilya nga kapin sa 700 ka kawani, gibutangan ra man og kapin sa 500 mao nga magkadagan-dagan tawon ang mga doktor ug nurses. Kinsa may sad-an niini? 

Sa akong pagsabot, kon ang hepe sa ospital nakakita sa maong problema unya mihimo siya'g sugyot apan wala aprobahi sa kadagkoan sa dakbayan ug sa mayor, nasayud na kamo kinsa ang mabasol.

   Makagasto man gani ang dakbayan pagpanghatag og minilyon-milyon ka pesos nga hinabang sa mga biktima sa bagyo sa ubang lugar, ang CCMC pa kaha ang dili magahinan.

Maka-hire man gani ang dakbayan og daghang consultants nga walay klarong trabaho. Daghan diha ang mga klaro kaayo nga "political accommodation" ra. Unsa molimod kamo?

* * *

Sa panahon sa kampanya, makapanglingo-lingo gyud ko sa ubang "reelectionist" nga konsehal nga maayo kaayo manulti panahon sa pulong-pulong nila sa kabarangayan.

Usba ra gud ang inyong batasan nga isalig ra ninyo sa mga executive assistant ang inyong trabaho. Kaming mga reporters sa City Hall makabantay gyud nga ang uban sa mga konsehal maayo lang sa barug, apan wala masayod sa ilang mga proposed resolution ug ordinances.

Kon dili kamo magtoon sa inyong trabaho, maayo tingali nga ang inyo na lang executive assistant maoy palingkoron nato sa konseho.

Tinuod, dunay accomplishment reports ang City Secretary sa Sangguniang Panlungsod kon tagpila ka resolution ug ordinansa ang napasaka sa mga konsehal.

Apan ang tinuod, dili basihanan nga angay'ng daygon na ang usa ka konsehal kay daghan siya'g resolution og ordinansa. Ang ubang konsehal naapil lang ang ngalan kay kusog kaayo nga mosinggit og "second!" kon ang ilang kauban moawhag na nga aprobahan ang ilang gihimong resolusyon ug ordinansa.