Higala ni Rama

Dihang niduaw si James Philip Tiongko sa DYAB Abante Bisaya sayo ning semanaha, kaingon nako’g magpa-interview mahitungod sa iyang kandidatura pagka konsehal sa amihanang distrito sa Dakbayan sa Sugbo. Apan dihang niingon nga ang iyang hisgutan mao rang kawsa batok ni Cebu City Vice Mayor Michael Rama, nakumbinser ko nga lain diay og tuyo ang iyang pagdagan.

Di mi suod ni Tiongko. Mas nakaila ko sa iyang amahan, si Philip, dihang siya pay presidente sa Cebu Chamber of Commerce and Industry (CCCI). Nahibaw-an nako nga ang batan-ong Tiongko suod ni kanhi senador Sonny Osmeña. Gani, niadtong kongresista pa si Osmeña sa ikatulong distrito, didto sab magkanunayan si Tiongko sa Toledo ug kasilinganang kalungsoran.

* * *

Kumbinsido ko nga gigamit ni kanhi senador Osmeña si Tiongko paglawgaw sa kandidatura ni Rama. Kay dihang nahinabi namo siya sa Arangkada pila ka semana ang nilabay, niangkon si Osmeña nga nadapit ang iyang pagtagad sa pasangil sa anak ni kanhi mayor Alvin Garcia nga si Raymond mahitungod sa giingong kalambigitan ni Rama sa usa ka gipasanginlang durugista.

Gani, gitawgan ni Osmeña ang batan-ong Garcia ug gidasig pagpadayon sa kawsa batok ni Rama. Human sa pila ka adlaw, nilihok si Tiongko. Nga mas agresibo kay ni Garcia-naglubos itom, gilumpong tanang taho sa pamantalaan sa pasangil ni Mayor Tomas Osmeña nga nanalipod si Rama ni Tata Negro, nag-press conference ug nagprotesta atubangan sa City Hall.

* * *

Apan bisan unsa pay motibo ni Osmeña ug ni Tiongko, di angayng moulbo si Rama. Kay tinuod man gyod siyang gipasanginlan ni Osmeña. Ug kay tinuod man gyod nga hangtod karon wa siyay klarong katin-awan sa pasangil nga gikasab-an niya pinaagi sa telepono ang mga polis nga nag-hot pursuit operation batok ni Tata Negro nga maoy hinungdan nga nakaikyas ang suspetsado.

Ang labing epektibong sagang sa pagbanhaw nilang Osmeña ug Tiongko sa karaang isyu batok ni Rama di ang pagkiha og libelo kon dili ang pagluwat og tubag nga mas tarong kay sa pagsumbalik nga nagdamgo lang ang mga namasangil niya ug nga di makapa-adik sa drugas ang pag-basketbol.

* * *

Samang di kabuot si Margot Osmeña kinsay himuon ni Rama nga iyang first lady, way makabuot niya kinsay himuong mga higala. Way makabuot niya kinsay ikaduwa og basketbol. Samang way makapugos niya pagputol sa ilang panaghigalaay ni Tata Negro nga, bisan sa kadaghan sa mga pasangil batok niya, wa pa makonbikto og bisan unsang kaso.

Apan kon magsugod na’g panawag sa mga polis atol sa ilang mga operasyon, tungod lang kay iyang mga higala ang maapiki, lain na nang istoryaha. Way balaod nga malapas kon makighuguy-hugoy bisan sa labing gikaintapang mga sakop sa katilingban. Apan kon gamiton nang gahom pagbaraw sa pagpatuman sa balaod, di lang protesta ang angay niya.

* * *

Email:[email protected]