Abuso kuno sa BOPK

Ang kampo ni congressional aspirant Jonathan "Atan" Guardo kusganong misaway karon sa administrasyon ni Mayor Tomas Osmeña nga migamit og mga kawani sa City Hall sa ilang pagpangampanya.

 Gihulagway ni Guardo nga usa kini ka pagpanikas kay gigamit sa mga kandidato sa Bando Osmeña Pundok Kauswagan (BOPK) ang resources sa dakbayan alang sa ilang personal interest.

Gipadad-an ko og text message ni Guardo sayo kagahapon sa buntag nga padayon diay sila nga naghipos og mga ebidensya, sama sa hulagway niining mga kawani sa City Hall nga miapil sa pagpangampanya.

Mibahad si Guardo nga ikiha kining maong mga kawani sa City Hall nga nagpagamit sa iyang mga kontra. Daw sa nagpamenti si Guardo sa kasuko nga miingon "enough is enough."

Kay motambong man ko og pulong-pulong sa tanang pundok, sa BOPK ug sa Kugi Uswag Sugbo (Kusug), nakabantay tinuod ko nga dunay mga kawani sa City Hall nga mao pa gani ang emcee.

Kaswal hinoon kining maong mga kawani og mao tingali nga sila naninguha nga makadaug gyud ang mga kandidato nga nagpatrabaho kanila aron dili sila matangtang.

Gihulagway ni Guardo nga ang gihimo sa ilang mga kaatbang usa ka "naked arrogance" kay gigamit na gyud ang resources sa City Hall gikan sa financial ngadto na sa personnel alang sa ilang pagpamolitika.

Dili ganahan nga motubag niining maong isyu si Tommy kay matud niya adto ra sila motubag niini sa Commission on Elections kon tinud-on ni Guardo ang paghimo'g reklamo.

* * *

Tan-aw nako makabentaha gyud ang mga kandidato sa BOPK sa ilang mga kontra tungod sa pagpanghatag sa City Hall og cash assistance sa mga tiguwang ug sa mga disabled persons, apil na ang scholarship sa mga high school graduates.

Tiaw mo sugod kagahapon gisugdan sa City Hall ang pagpang-apod-apod sa laing tag P4,000 nga cash assistance ngadto sa kapin sa 30,000 ka senior citizens. Sigurado ko nga tungod niini kadaghanan sa mga tiguwang mobotar gyud sa mga kandidato sa BOPK.

Samtang tinuod dili pa makabotar ang mga high school graduates sa public schools dinhi sa dakbayan nga nakadawat og tag P10,000 nga scholarship gikan sa City Hall, apan ang ilang mga ginikanan sigurado ko nga dili makalimot kinsa ang naghatag sa scholarship atol sa eleksyon.

Mao kini ang rason nga angay'ng dugangan pa sa mga kandidato sa Kusug ang ilang pagpaninguha aron makombinsir nila ang mga botante nga sila ang botahan.Sa akong tan-aw, dili epektibo pag-awhag og suporta sa mga botante ang ilang pasalig nga kon sila modaug hunongon nila ang pagpangguroy sa mga sakyanan nga ipataka lang pagparking sa daplin sa karsada.

Kadaghanan god sa mga tawo walay sakyanan ug nasabtan nako nga kadaghanan kanila malipay man gani nga makakita nga guroyon sa mga towing companies ang mga makababag sa ilang pag-agi diha sa karsada o sa aseras.

Sama ra nga kon dili kampanyahan ang mga sidewalk vendors nga makabalda sa ilang pag-agi sa aseras, dili g'yod kini hingpit nga makatabang sa pagkabig og botos ngadto sa mga kandidato sa Kusug.

Pila ra man kabuok ang mga tindera nga maoy makabenepisyo apan daghan g'yod ang mga tawo nga mahasol kon dili na makaagi sa aseras tungod sa mga sidewalk vendors ug sigurado ko nga adto sila sa pikas mobotar kon mao kini ang inyong plataporma.

* * *

 Wala na ko masayod kon nadayon ba ang paghulip ni Arturo Lomibao isip hepe sa Land Transportation Office kay gitan-aw nako ang website sa LTO naa man gihapon ang iyang ngalan.

Diha man go'y report nga gitangtang na ni Presidente Arroyo si Lomibao pagka hepe sa LTO ug giingong gibalhin sa Department of National Defense. Duna usa'y report nga igo ra gi-promote si Lomibao sa pagka Undersecretary sa Department of Transportation and Communication.

Dako man god kaayo og kadaut nga nahimo si Lomibao dihang gipahunong niya ang operasyon sa mga LTO deputized agents, ilabi na ang Task Force Alpha nga kugihan kaayo manakop sa mga masalaypong drayber.

Tungod sa gihimo ni Lomibao, midagsang ang mga abusadong drayber. Mga tawo nga bisan og walay lisensiya mopugos pag-drive og sakyanan sama niining usa ka Rogelio Casicas nga taga barangay Busay.

Unya kon makasala gahi ra ba kaayo nga motubag sa iyang obligasyon. Nabanggaan man god ang akong sakyanan ni Casicas nga bisan og walay lisensiya nag-drive gyud og motorsiklo.

***

Email: [email protected]