Mahala na sa koryente uy!

Wala g’yoy nasakpang “adis-adis” ang mga sakop sa Cebu City Office for Substance Abuse Prevention (COSAP) sa pagpahigayon nila og kinalit nga drug test sa mga kawani sa barangay Apas.

Makapalipay kini nga balita kay nagpasabot nga walay mga adis-adis nga kawani ang among barangay. Nakasiguro g’yod hinoon ko nga kon duna man, dili magduha-duha si Kapitan Ramil Ayuman pagtaktak kanila.

May gidudahan man god si Ramil nga may duha sa iyang tanod nga tigamitan og gidili nga matang sa drugas, apan matud ni COSAP head Joeling Lazarte nga negatibo man sa drugtest.

Hala, kamong mga opisyal sa ubang barangay nga magduda nga dunay inyong kawani nga adis-adis, request dayon mo og kinalit nga drugtest sa opisina ni Konsehal Augustus Pe Jr. nga maoy nagdumala sa COSAP.

* * *

Semana na man kapin, si Cebu City market administrator Raquel Arce wala pa may report kabahin sa gitoohan nila nga kanang mga suga nga gipangkutay daplin sa karsada aron mahayagan ang mga ambulant vendors gikan kana sa poste, nagpasabot nga kinawat ang koryente.

Kon dugay man nga makahimo’g aksyon niini si Arce, mahimo ba og kadtong dunay kasayoran niini mohatag nako og inpormasyon? Tawaga lang ko sa 511-7984 ug dili na kinahanglan nga magpaila kamo.

Gusto g’yod ko nga kining mga kawatan og koryente masakpan og masilotan. Ang nakaapan lang kay kon mopahibalo ka niini sa Veco ikaw pa man hinoon ang pabuhaton og sketch.

Ang tinuod, kitang katawhan angay man g’yod nga magmata na. Angay kamo nga mosalmot sa kampanya batok sa mga kawatan og koryente.

Abi ninyo og unsa pay laing kusog mangawat og koryente? Kanang maghimo og disco sa kabarangayan, abtik kaayo kana sila mokonektar direkta sa poste.

Dihang didto pa ko nagpuyo kaniadto sa laing barangay, pastilan inigkahapon pa lang, gikonektar na nila sa poste ang mga dagko kaayong kahimanan apil kanang mga higante nga sound boxes.

Pila kaha ang koryente nga magamit nila hangtud magkaadlawon? Ang Veco dili man kaayo masakitan kay ang ilang alkanse sa koryente nga mapalit nila gikan sa supplier, ila ra man nga ipasa kanato.

Mao nga kita g’yod unta nga mga konsumidor ang angay’ng mobarug batok sa mga tawo nga mangawat og koryente. Ayaw kamo kahadlok.

* * *

Nakapalag na g’yod unta og kaatbang si Lahug barangay kapitan Mary Ann delos Santos nga modawat sa iyang hagit nga magdebate sila og isyu nga may kalabotan sa ilang paglansar pagka kongresista.

Si Francisco Ashley Acedillo namahayag nga andam siya ug wala siya mahadlok nga makigdebate ni Kapitan De Los Santos , apan ang kapitan walay gana nga makig-debate kang Acedillo.

Tingali gitan-aw ni De Los Santos nga dili hulga sa iyang kandidatura si Acedillo mao nga wala siya’y tinguha nga makig-debate. Ang iya kay si Rachel “Cutie” del Mar g’yod maoy gusto niya nga ikadebate.

Basin og ang baruganan ni De Los Santos sama ra usab sa huna-huna ni Cutie nga dili na lang siya makig-debate sa kapitan kay tan-aw niya wala man kini’y dag-anan sa eleksyon.

Kay mosuroy man g’yod ko sa lainlaing dapit ug magpangutana, dunay mga dapit sa Lahug nga hugot nga misuporta sa ilang kapitan. Kini ilabi na niadtong mga ginikanan kang kansang mga anak pirmi nga makasakay sa bus sa barangay padulong ug gikan sa eskwelahan.

Apan duna usa’y uban nga samtang ganahan unta sila ni De Los Santos apan mipatigbabaw g’yod ang ilang pagsalig ni kongresista Raul del Mar mao nga adto sila mosuporta ni Cutie.

Bitaw, husto g’yod sila. Kaniadto nakaingon ko nga sayon-sayon ra ni Mary Ann nga buntogon si Cutie, apan sa tanto nako nga paniid dili diay makaya.

Tungod kini sa daghang tabang ni Del Mar, ilabi na sa pag-atiman sa panglawas sa katawhan sa iyang distrito. Ang maayong mga binuhatan ni Del Mar maoy makapaaghat sa mga botante nga mopili gihapon sa iyang bansagon.

* * *

Daw sa gikubalan na pagsugod ang palad sa mga kandidato karong panahona. Dili ra kay usa ka libo ka tawo ang ilang malamano sa usa ka adlaw. Buntag ug hapon, apil na gabii ang hand shaking sa mga kandidato.

Sa City Hall, wala didto sila si Mayor Tomas Osmena ug Vice Mayor Michael Rama kagahapon kay “busy” kaayo pagtambong og mga graduation sa lainlaing tunghaan.

Dili sila maka-estar og dugay kay gikan sa usa ka dapit moadto na usab sa laing lugar sa susama nga kalihukan. Na hala, fight g’yod sa inyong pangampanya!