Maayo lang mong pangilisan

Maayong mag-inabtik g'yod ang mga tinugyanan sa kamerkadohan ug sa ubang buhatan sa kagamhanan kay dunay ubang mapahimuslanon nga anha magkuha og kuryente sa ilang mga building ug opisina.

Mas nindot pa gani nga panghulipan kining mga market supervisor nga wala makabantay sa maong binuang. Tan-awa, ug wala pa si market administrator Raquel Arce wala unta masakpi ang mga binuang didto sa Taboan public market kaniadtong Biyernes.

Human nako gipublikar ang pagkasakop sa mga kawatan og kuryente didto sa Taboan public market, nakadawat ko og report sa mga binuang usab diha sa Carbon public market.

Gituki man gud nako ang posibilidad nga gawas sa Taboan market, duna usa'y mga kawatan og kuryente diha sa Carbon market ug ubang mga merkado.

Ingon niini ang text message nga akong nadawat. "Sir nang kawat og linya diri sa luyo sa Carbon Unit-1. Ipa-check asa kuha og kuryente ang mga tindera'g isda kay dunay tanod nga ang ngalan Junior maningil inig buntag."

Dihang akong gipangutana kon asa gyud dapit ang illegal connection, mibawos ang informer sa pag-ingon "Luyo g'yod Sir gawas sa Unit-1agianan sa mga sakyanan apil iya Primo isdaan. Kabit lang nang mga tanod og kuryente sulod sa Carbon ilabi na kana si Junior."

"Tsek-apa lang Sir dapit sa Visayan Electric Company sugod alas tres sa kaadlawon kada adlaw na sila."

Kami gani si city treasurer Ofelia Oliva nagtoo man gyud nga kining mga tawo nga mokonektar og mga suga ngadto sa mga "ambulant vendors" nga maninda daplin sa karsada panahon sa gabii hangtod sa kaadlawon, mokabit ra og kuryente sa poste.

Maayong ipasusi kini sa mga tinugyanan sa dakbayan kay kon kini tinuod ug magpadayon, puwerteng dakoa sa maalkanse sa dakbayan. Sayonan ka nga matag tindera kolektahan man nila og bayad nga tag P10 sa usa ka gabii.

Pabor ko sa sugyot ni city treasurer Oliva nga maayo nga kadtong masakpan nga nangawat og kuryente tinud-on gyud, ikiha ug ipapriso. Kadtong dunay mga inpormasyon sa illegal electrical connections, report kamo nako sa 0917-3836645.

Nasayran nako ni market administrator Raquel Arce nga wala diay nila itugot nga dunay maka-operate og water dispenser, tv sets, refrigerator ug ubang appliances diha sa mga merkado.

Kadaghan man ko makakita nga daghang mga tindera nga dunay mga appliances sa ilang tindahan. Dinhi nga nakaingon ko nga kadtong mga market supervisor nga dili makahimo og aksyon niini angay'ng hulipan.

* * *

Ang mga sakop sa LTO-Task Force Alpha giawhag sa kadagkoan sa Land Transportation Office nga moabag pagpatunhay sa trapiko atol sa Huwebes ug Biyernes Santo diha sa mga public terminal.

Usa sa tumong niini aron mapugngan ang pagpakarga og mga pasahero nga sobra kaayo kay sa kapasidad sa mga sakyanan. Ang gidili mao ang pagpasakay nga bisan ang atop sa mga sakyanan pasakyan og pasahero. Kamo usab nga mga pasahero ayaw pagpugos nga mosakay bisan puno na kaayo.

Kon dunay aksidente nga mahitabo, kamong anaa magtung-tong sa atop sa sakyanan sigurado nga maoy unang mangamatay. Huwat lang gud kamo kay makasakay man gyud mo ba. Ang dakponon usab mao kadtong mga dispatchers nga mouna pagsakay unya pabayran ang lingkoranan sa mga pasahero.

* * *

Mga tulo ka semana na ang milabay, ang akong sakyanan gidam-agan og motorsiklo nga gimaneho og usa ka tawo nga walay driver's license. Gawas nga wala siya'y lisensya, namatud-an pa gyud nga siya maoy sad-an sa hitabo. Aw miangkon man gani siya sa imbestigasyon.

Apan hangtud karon ang maong drayber sa motor nga dunay plate No. 9398-GR wala na gyud mo-communicate kanako aron tubagon ang iyang obligasyon.

Napugos ko pagtuki niini dinhi sa lindog aron siya masayod nga mas modako ang iyang obligasyon kon himoon nako ang akong nahuna-hunaan nga pasakaan siya'g kaso nga kriminal sa hukmanan.

Dayon, pananglit kon gilukat na nimo ang imong gi-impound nga motor, mapugos ko pagpa-alarma sa imong motor adto sa LTO operations section aron dili maka-renew sa imong rehistro. Tambag nako sa maong drayber nga pakigkita nako sa labing dali nga panahon.

Kamong uban diha nga nagmaneho og mga sakyanan bisan og walay lisensya, hunonga na kana kay pilegro kaayo kon makasugat kamo og aksidente. Dili mobayad ang inyong insurance kon ang drayber walay lisensya, sama sa nahitabo sa drayber nga mapugos gyud pagkoot sa iyang bulsa.