Angay g'yod ang wage increase

Husto g'yod ang lakang sa Trade Union Congress of the Philippines (TUCP) nga pagpangayo'g usbaw sa atong suweldo.

Dili na man tingali angay'ng moreklamo ang mga "employers" kay makita man nila nga sila nagsige og pausbaw sa presyo sa ilang mga baligya.

Tinuod nga misaka usab ang presyo sa produkto nga ilang gipalit, apan wala usab kini magpasabot nga sila naalkanse kay gisakahan man nila ang presyo sa ilang pagbaligya.

Angay'ng daygon ang TUCP sa lakang niini pagpangayo'g usbaw nga tag P100 matag adlaw sa suweldo sa mga kawani sa pribadong sektor.

Sa padayon god nga pagmahal sa presyo sa palaliton, unya walay wage increase, daghang mga kawani nga motrabaho nga sila ra ang makakaon.

Hinuktuki ra god, ang minimum wage karon P267, apan dul-an sa P100 ang imong magasto sa matag kaon.

* * *

Ang kadagkoan sa Cebu Energy Development Corporation nga maoy tag-iya sa bag-ong planta sa kuryente sa dakbayan sa Toledo, masaligon nga dili na isyu ang kakuwang og kuryente sa Sugbo, ilabi na sugod karong Hunyo.

Si Ed Satina, ang CEDC assistant vice president for commercial, mitataw nga gawas nga pagka karon, nagsuplay na sila og 72 megawatts, madugangan pa kini karong Hunyo kon moandar na ang ikaduha nila nga planta.

Gibisitahan sa media ang planta sa CEDC kaniadtong Dominggo. Mga editors sa newspapers, manager sa radyo ug mga kulumnista maoy nangadto, apil ako sa grupo.

Human sa pag-operate sa ikaduha nga planta karong Hunyo, gitakda nga moandar na usab ang ikatulo nga makina sa CEDC sa Enero sunod tuig. Daghan na kita og kuryente.

Apan ang pag-andar sa maong mga planta sa kuryente, apil na sa uban pang planta sa kuryente sama sa KEPCO diha sa Naga City, wala diay kini magkahulogan nga mobarato na ang presyo sa kuryente.

Ang Visayan Electric Company nga maoy distributor og kuryente sa Metro Cebu, adto direkta nga mokuha'g kuryente sa CEDC kay ang Aboitiz nga tag-iya sa Veco usa man usab sa mga tag-iya sa CEDC.

Mas mahal ang presyo sa kuryente sa CEDC kay sa kuryente nga gibaligya sa National Power Corporation tungod kay ang kagamhanan mi-subsidized man sa ubang bayranan sa kuryente nga gibaligya sa Napocor.

Apan matud ni Satina nga tungod kay duna may lakang karon nga putlon na sa nasudnong kagamhanan ang pag-subsidize sa kabahin sa bayranan sa gibaligya nga kuryente sa Napocor, momahal ra gihapon ang presyo nga ibaligya sa Napocor.

Ang pag-privatize sa kagamhanan sa operation sa Napocor maoy usa sa rason nga putlon na usab nila ang pag-subsidize sa kabahin sa ibaligya niini nga kuryente.

Gipasabot kami ni Satina ug sa ubang engineer sa planta nga ang ilang power plant dili makahatag og kadaut sa panglawas sa katawhan, bisan niadtong anaa magpuyo kilid sa planta.

Aw, atol sa among educational tour, wala g'yod tinuod kami makakita og aso gikan sa panghaw sa planta bisan og nag-andar kini ug nagsuplay og 83 megawatts.

Nag-generate og 83 megawatts ang unang makina sa CEDC nga gipaandar kaniadtong Biyernes, apan 72 megawatts ra ang ilang gisuplay sa "grid" kay ang ubang kuryente gigamit man nila sa planta pagpaandar sa ilang mga makita.

Ang planta migamit og tubig gikan sa dagat pagpabugnaw sa ilang makina, apan matud ni Satina nga duna sila'y kahimanan nga mapabalik nila ang kalimpyo sa tubig apil na ang iyang giiniton sa pagbalik nila sa tubig ngadto sa dagat.

Pagmatuod nga walay abog nga makadaug nga mogawas sa panghaw, gipakita ni Satina ang nagtapun-og nga "coal ash" nga natangtang nila gikan sa aso ug gihakot kini sa mga trak.

Ang coal ash ibaligya kini sa CEDC sa mga tawo nga mogamit niini alang sa pagsagol sa semento niadtong maghimo og mga building ug panimalay.

* * *

Angay'ng kanunayon ug suportahan sa katawhan ang pagpanangtang sa mga propaganda materials sa mga kandidato nga anaa gipamutang sa wala itugot nga dapit.

Dinhi hinoon sa dakbayan, bisan og daghan na sa mga local candidates, nga namutang og campaign posters, apan anaa kini sa pribadonag lugar sama sa kabalayan. Bisan og dili unta kini angay, apan dili kini mahilabtan.

Natan-aw nako nga ang milapas sa lagda sa Comelec pinaagi sa pagpapilit sa mga election campaign posters mao ang mga kandidato sa nasudnong katungdanan, sama sa presidente, bise presidente, pagka senador ug partylist.

 Kon kanunayon ang pagpanangtang sa mga campaign posters nga anaa gibutang sa gidili nga dapit sigurado ko nga likayan na sa mga mapahimuslanong kandidato ang pag-abuso.