Sad experience

Gidemalas g'yod ko niadtong Dominggo sa gabii kay mopalit unta ko og computer printer ink human ko mikaon sa usa ka fast food store diha sa SM City, apan dunay mga babaye ug lalaki nga misugat nako atubangan sa usa ka bangko.

Mitunol og papel nga kuno promotion sa ilang kompaniya nga kuno maghatag kanako og higayon nga makadaug og bag-ong kotse, ug may pakapin pa kuno nga dies mil dolyares.

Ila ko nga gipangutana kon duna ba koy ATM card ug credits cards. Dihang akong gitubag nga duna, giingnan ko nga tan-awon nila. Diha-diha giingnan ko nga qualified moapil sa ilang promotion.

Nagtoo ko nga promotion g'yod kadto sa Banco de Oro kay diha man sila nagpundok sa atubangan sa banko. Wala man sila motug-an nga mga ahente diay sila sa Philippine Prudential Insurance Company.

Gidala ko nila sa second floor kay adto kuno duwaon kon madaug ba nako ang kotse ug ang kwarta. Ako pa gani nga giingnan nga dili ko makamao sa bisan unsa nga matang sa gimmick o sugal, kay dili ko sugarol.

 Nahibulong ko kay gipalingkod man usa ko sa lobby sa ilang opisina. Dantan og mga 10 minutos, gipasulod na ko. Nakita nako didto sa sulod nga dunay daghang mga lamesa nga may mga naglingkod apan wala may mga kahimanan aron mahibaw-an kon modaug ba kami.

Didto misugod na ang babaye pag-esplikar pinaagi sa pagpakita sa mga office profiles nga gibitay sa bongbong nga nagpakita nga kadto opisina diay sa insurance company ug dayon gipakita ang hulagway sa ilang presidente ba kadto.

Nakabantay na ko nga nahulog ko sa laang. Misinta na ko dihang ila ko nga gihatagan og "form" aron suwatan sa akong mga personal information. Dihay nagpaila nga kuno manager, nga miduol ug mipasabot unsa ang ilang tumong.

Sa laktud, buot ra g'yod sila mokombinsir nga mokuha og insurance coverage sa ilang kompaniya. Mohimo usa sila og lecture bali'g 45 minutos usa ka nila pasuwayon sa gimmick nga kuno, kon swertehon, makadaug og kotse.

Apan wala nako tiwasa ang pagpaminaw sa pag-lecture niadtong babaye. Tiaw mo akong gipangayoan og brochures sa ilang promotion, dili makahatag. Sigurado ko nga bisan kadtong maong babaye, wala mokuha'g insurance coverage sa ilang kompaniya.

Sa laktud, wala ko makapalit sa akong tumong hangtud nanira na lang ang mga tindahan sa SM. Pagka-demalas. Kamo diha, ayaw ninyo tagda kon dunay moduol kaninyo nga mohimo'g lakang sama sa akong na-ekperyensya.

Sama diha sa usa ka tindahan sa north reclamation nga inig sulod nimo kon bag-o ang imong dagway diha sa maong tindahan, tapuk-an ka nianang mga kawani nga unipormado. Tunolan ka usab nila og daw raffle coupon aron kuno makadaug.

Automatic tuod nga ila kang pakiskison sa silver diha sa coupon ug dayon makita ang numero. Unya patoohon ka sa maong mga kawani nga nalipay kaayo sila kay kuno nakadaug ka.

Guroyon ka dayon ngadto sa ilang tindahan kay kuno ang imong nadaug 50 percent discount sa ilang produkto. Sa ato pa, mopalit ka pa sa ilang produkto aron kuno makuha ang imong daug nga katunga sa presyo sa ilang baligya.

Ha! Ha! Abi ninyo og pila ang presyo sa ilang baligya? Mora'g gidoble ang kantidad sa ilang produkto kon itandi sa ubang baligyaanan.

* * *

Ang higayon nga gihatag sa kagamhanan aron kadtong mga naghupot og armas nga walay lisensya makapalisensya sa tumang kasayon, mapupos na karong Oktobre 31.

Awhag nako kaninyo nga pahimusli ang nahabiling mga adlaw. Dad-a ang inyong mga armas ngadto sa FESSAGS diha sa Police Regional Office-7 nga nagbase sa Camp Sergio Osmena Sr.

Dunay karaan kaayo nga Thompson sub-machinegun nga kabilin sa akong Lolo, gibutang kuno niya sa sekretong lungag sa silong sa karaan nilang balay sa probinsya sigun sa suwat nga nakit-an nako sa iyang kaban, ako to nga kuhaon ug palesensyahan.

Maayo na lang tong Thompson submachinegun nga akong ikalib-ay, kay ang higala nako nga si reporter Philipp Cerojano nagpalisensya kuno sa karaang kalibre 45 nga gihatag kaniya sa iyang Lolo. He! He!

Bitaw, iparehistro na ang inyong mga armas Bay kay aron legal ang pagdala-dala ninyo og armas.

Usa ka libo ka pesos ra ang bayranan sa mga "loose firearms" unya P650 niadtong mga lisensyado apan mi-expire lang ang lisensya. Wala nay multa ug daghang pangutana.